တပ်ႉသိုၵ်းၵူၼ်းမိူင်း တွၼ်ႈလိၼ် မိူင်းၶိူဝ်း ဢွၼ်ႁူဝ်ပေႃႈမႄႈၵူၼ်းမိူင်း ၸတ်းႁဵတ်းပၢင်ၵႅဝ်ႈ ၶုၵ်းထူပ်း ဝၼ်းၵိူတ်ႇလၢႆးလုၵ်ႉၽိုၼ်ႉ ၸိုင်ႈတႆး ၶွပ်ႈၶူပ်ႇတဵမ် (57) ပီ၊ တိုၵ်းသူၼ်း ႁႂ်ႈႁူႉလွင်ႈပိုၼ်း လုၵ်ႉၽိုၼ်ႉလႄႈ ပွင်ႇၸႂ်ၼိူဝ် ၵၢၼ်မိူင်းယၢမ်းလဵဝ်။

မိူဝ်ႈဝၼ်းတီႈ 21 လိူၼ်မေႊ ယၢမ်းၵၢင်ၼႂ် 8 မူင်းတေႃႇ 11 မူင်း၊ တပ်ႉသိုၵ်းၵူၼ်းမိူင်း တပ်ႉၸုမ်းမၢႆ (3) တွၼ်ႈလိၼ် မိူင်းၶိူဝ်း လႆႈဢွၼ်ႁူဝ်ပေႃႈမႄႈၵူၼ်းမိူင်း ၼႂ်းပိုၼ်ႉတီႈ ၸတ်းႁဵတ်းပၢင်ၵႅဝ်ႈၶုၵ်းထူပ်း ဝၼ်းၵိူတ်ႇလၢႆးလုၵ်ႉၽိုၼ်ႉယိပ်းၵွင်ႈၵၢင်ႇ ၸိုင်ႈတႆး ၶွပ်ႈၶူပ်ႇတဵမ် (57) ပီ တီႈဝိႁၢရ် လူင်မိူင်းၶိူဝ်း၊ ၸႄႈဝဵင်းသီႇပေႃႉ။

တီႈၼႂ်းပၢင်ၵႅဝ်ႈၼၼ်ႉ ၽူႈၵႂၢၼ်းတပ်ႉၸုမ်းလႄႈ ၽူႈမီးၸၼ်ႉ ၼႂ်းတပ်ႉၸုမ်းလၢႆလၢႆၸဝ်ႈ ဢိၵ်ႇတင်းၽူႈတၢင်တူဝ်ၵူၼ်းမိူင်း မွၵ်ႇလၢတ်ႈၶေႃႈၵႂၢမ်း သင်ႇထိုင်ပေႃႈမႄႈၵူၼ်းမိူင်း ဢိၵ်ႇ လုၵ်ႈတပ်ႉတင်းသဵင်ႈ ႁႂ်ႈႁူႉလွင်ႈပိုၼ်း လၢႆးလုၵ်ႉၽိုၼ်ႉလႄႈ ပွင်ႇၸႂ်ၼိူဝ်ၵၢၼ်မိူင်းယၢမ်းလဵဝ်၊ ဢွၼ်ၵၼ်ယၢတ်ႇၼမ်ႇၽႄၵုသူလ်ပၼ် ၽူႈႁၵ်ႉၸိူဝ်ႉၸၢတ်ႈ ၸိူဝ်းလႆႈလူႇတၢၼ်းၼိူဝ်ႉလိူတ်ႈၵႂႃႇ တႃႇၸိူဝ်ႉၸၢတ်ႈဝၢၼ်ႈမိူင်း ၵူႈၸဝ်ႈၸဝ်ႈသေ ၵၢပ်ႈသွမ်းဝၼ်းသင်ၶၸဝ်ႈယဝ်ႉ ၵိၼ်ၶဝ်ႈႁူမ်ႈမူႇၵၼ်၊ ၽူႈၶိုၼ်ႈႁွတ်ႈၶဝ်ႈႁူမ်ႈ တင်းသဵင်ႈမီး 200 ၵေႃႉပၢႆ။

ၽူႈယႂ်ႇၵူၼ်းလူင် ၼႂ်းတပ်ႉသိုၵ်းၵူၼ်းမိူင်း တွၼ်ႈလိၼ်မိူင်းၶိူဝ်း မွၵ်ႇလၢတ်ႈၶေႃႈၵႂၢမ်း

ၸဝ်ႈသိုၵ်းၸၢႆးဢွၼ် ၵေႃႉပဵၼ်ၽူႈၵႂၢၼ်းတပ်ႉၸုမ်းလၢတ်ႈဝႃႈ “ ဝၼ်းလိူၼ်မေႊ 21 ၼႆႉ ပဵၼ်ဝၼ်းဢၼ်လမ်ႇလွင်ႈ ပုၼ်ႈတႃႇတႆးႁဝ်းၶႃႈတႄႉတႄႉဝႃႈဝႃႈ လႄႈ ၸင်ႇလႆႈၸတ်းႁဵတ်း ႁႂ်ႈပဵၼ်တီႈမၢႆတွင်းၵႂႃႇမိူဝ်းၼႃႈ၊ ၶႂ်ႈႁႂ်ႈႁူႉဝႃႈ ဢမ်ႇလီလူင်လိုမ်း ၽူႈယႂ်ႇၵူၼ်းလူင်တႆးႁဝ်းလႄႈ ၵေႃႉႁတ်းႁၢၼ်တႆးႁဝ်း ဢၼ်လႆႈလူႉသုမ်းၵႂႃႇၼႂ်းၶၢဝ်းတၢင်းလုၵ်ႉၽိုၼ်ႉ တိုၵ်းဢဝ်လွင်ႈ ထၢင်ႇႁၢင်ႈလွတ်ႈလႅဝ်း၊ လူႇၼိူဝ်ႉလူႇလိူတ်ႈ ပုၼ်ႈတႃႇၸိူဝ်ႉၶိူဝ်းလႄႈဝၢၼ်ႈမိူင်းၸိူဝ်းၼၼ်ႉ” ။

ၵဵဝ်ႇလူၺ်ႈပၢင်ၶုၵ်းထူပ်းၼႆႉသေ ၵေႃႉပဵၼ်ၽူႈၸွႆႈပွင်ၵၢၼ် ၸၢႆးသိူဝ်ငွမ် လၢတ်ႈဝႃႈ “ ၼႆႉတႄႉၵေႃႈ ၸတ်းႁဵတ်းမႃးၵူႈပီယူႇလႄႈ တႃႇႁႂ်ႈပဵၼ်တီႈမၢႆတွင်း ဢမ်ႇလိုမ်းပိုၼ်းႁဝ်းၶႃႈၼႆၼၼ်ႉ တေသိုပ်ႇႁူမ်ႈၵၼ်တင်းပေႃႈမႄႈၵူၼ်းမိူင်းသေ ၸတ်းႁဵတ်းၵႂႃႇၵူႈပီယူႇ” ဝႃႈၼႆ။


တပ်ႉသိုၵ်းၵူၼ်းမိူင်း တပ်ႉၸုမ်းမၢႆ (3) မိူင်းၶိူဝ်းၼႆႉ မိူဝ်ႈဢွၼ်တၢင်း ပဵၼ်တပ်ႉၸုမ်းဢၼ်ၼိုင်ႈ ၼႂ်းပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးမႃး၊ ယွၼ်ႉငဝ်းလၢႆးမိပ်ႇဢီးသေ လႆႈလႅၵ်ႈလၢႆႈၶၢႆႉပိၼ်ႇပဵၼ် တပ်ႉသိုၵ်းၵူၼ်းမိူင်းမႃး မိူဝ်ႈၼႂ်းပီ 2009 ႁူမ်ႈၵၼ်တင်းငဝ်ႈငုၼ်း သႅင်ၵႅဝ်ႉ။