ၶုၼ်ထုၼ်းဢူး တိုၵ်းသူၼ်းမူၼ်ႉမႄး ပိူင်ငဝ်ႈပိုင်းမိူင်း တႃႇလႅၵ်ႈလၢႆႈဝၢၼ်ႈမိူင်း



ၸဝ်ႈၶုၼ်ထုၼ်းဢူး ႁူဝ်ပဝ်ႈ ၸုမ်းဢူၺ်းလီၸၢဝ်းၶိူဝ်း ၽွမ်ႉႁူမ်ႈ (UNA) လႆႈတိုၵ်းသူၼ်းထိုင်လၢႆၾၢႆႇ၊ ႁႂ်ႈၽွမ်ႉႁူမ်ႈမိုဝ်းၵၼ် ၶတ်းၸႂ်လႅၵ်ႈလၢႆႈပႅတ်ႈ ပၵ်းပိူင်ဢၼ်ၸႂ်ႉတိုဝ်းယူႇ ဝၼ်းမိူဝ်ႈၼႆႉလႄႈ ပိူင်ငဝ်ႈပိုင်းမိူင်း။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈ UNA ၸဝ်ႈၶုၼ်ထုၼ်းဢူး လၢတ်ႈတီႈပၢင် ပီၵွၼ်းငိုၼ်း (25 ပီ) မၢႆတွင်း ၶုၵ်းထူပ်း ပၢင်လိူၵ်ႈတင်ႈပီ 1990 ၊ ဢၼ်ၸတ်းႁဵတ်းတီႈႁွင်ႈ ယုတ်ႉတၵၢၼ်ႇ ၸႄႈဝဵင်းတႃႈၵုင်ႈ ဝၼ်းတီႈ 27/05/2015 ၼႆႉ ။

ၸဝ်ႈၶုၼ်ထုၼ်းဢူး လၢတ်ႈဝႃႈ- ပေႃးၵႂႃႇၸွမ်းပၵ်းပိူင် ငဝ်းလၢႆးဝၼ်းမိူဝ်ႈၼႆႉတိၵ်းတိၵ်းတႄႉ ႁဝ်းၶႃႈၼႆႉ တေပဵၼ်ၵူၼ်းယူႇမဝ်ၵိၼ်မၢင်၊ ၵူၼ်းဢမ်ႇႁပ်ႉပုၼ်ႈၽွၼ်းသင် တွၼ်ႈတႃႇၵူၼ်းမႃးၸုပ်ႈသႅၼ်းလင် ၸူဝ်ႈလုၵ်ႈပၢၼ်လၢၼ်ႁဝ်း မိူဝ်းၼႃႈ။ ၵွပ်ႈၼႆ ႁဝ်းဢမ်ႇၶႂ်ႈႁႂ်ႈသႅၼ်းၸုပ်ႈလင် ဢၼ်ပဵၼ်ၸုပ်ႈ လုၵ်ႈပၢၼ်လၢၼ်ႁဝ်း ၸိူဝ်းၼႆႉ မႃးႁူပ်ႉထူပ်းထႅင်ႈ ပၵ်းပိူင်ဝၼ်းမိူဝ်ႈၼႆႉ။ ပၵ်းပိူင်ၸိူဝ်းၼႆႉ ႁဝ်းဢမ်ႇၶႂ်ႈတေႃႉၵႂႃႇထိုင် ပၢၼ်လုၵ်ႈပၢၼ်လၢၼ်မိူဝ်းၼႃႈ။ ယွၼ်ႉပိူဝ်ႈၼႆလႄႈ ႁဝ်းၶႃႈၶႂ်ႈမႃးတိုၵ်းသူၼ်းပၼ် ၵူႈၵေႃႉၵူႈၵူၼ်း၊ ႁႂ်ႈသႂ်ႇၸႂ်သႂ်ႇႁႅင်းသေ သၢၼ်ၶတ်းပႅတ်ႈပၵ်းပိူင်ဢၼ်ၼႆႉ- ဝႃႈၼႆ။

မၼ်းၸဝ်ႈ သိုပ်ႇလၢတ်ႈထႅင်ႈဝႃႈ- ဝၼ်းမိူဝ်ႈၼႆႉ ဢႃယုလူင်ပွင်ၸိုင်ႈလႄႈ ဢႃယုသၽႃး ၸမ်တေမူတ်းသဵင်ႈၸုပ်ႈၼိုင်ႈယဝ်ႉ။ ၸူဝ်ႈဢႃယုၶဝ်တေမူတ်းၼႆႉ ၵႆႉလႆႈငိၼ်းၶေႃႈပၼ်ၵႂၢမ်းမၼ်ႈၵႅၼ်ႇ ၸိူဝ်းၼႆႉယူႇ။ ၵူၺ်းၵႃႈ ဢၼ်လႆႈႁၼ်ၼႆႉတႄႉ ၵႂၢမ်းလၢတ်ႈ ၶေႃႈမၼ်ႈၵႅၼ်ႇ ဢၼ်ပၼ်မႃးၸိူဝ်းၼၼ်ႉ ဢမ်ႇတွၼ်ႉႁဵတ်းၸွမ်းသေပွၵ်ႈ။ ယွၼ်ႉၼၼ်လႄႈ ၵူၼ်းၼုမ်ႇၸူဝ်ႈလုၵ်ႈပၢၼ်လၢၼ် ထုၵ်ႇလီလႆႈႁူႉတူဝ်ယဝ်ႉ- ဝႃႈၼႆ။

ပိူဝ်ႈတႃႇမူၼ်ႉမႄး ပိူင်ငဝ်ႈပိုင်းမိူင်း ဢၼ်ဝႃႈၼၼ်ႉၵေႃႈ ပႃးၸဵမ်ၵူၼ်းႁဵတ်းၵၢၼ်မိူင်း၊ ၵူၼ်းမိူင်း၊ ၵူၼ်းၼုမ်ႇ သႅၼ်းလုၵ်ႈပၢၼ်လၢၼ် ထုၵ်ႇလႆႈႁူမ်ႈမိုဝ်းၵၼ်ၶဝ်ႈပႃး ၸွႆႈထႅမ်။

“ပေႃးမႃးတူၺ်းတႄႉ ၵူၼ်းဝၢၼ်ႈၵူၼ်းမိူင်းၼႆႉ ဢွၼ်ၵၼ်ၶႂ်ႈလႆႈ လွင်ႈငမ်းယဵၼ်လႄႈ ၸိုင်ႈမိူင်းႁူမ်ႈတုမ် ၾႅတ်ႊၻရႄႊလ် 2 ဢၼ်ၼႆႉၼႆၼၼ်ႉ ႁူႉလီယူႇ။ ပေႃးမႃးတူၺ်း ၸုမ်းယိပ်းၵွင်ႈၵၢင်ႇၶဝ်ၵေႃႈ လွင်ႈငမ်းယဵၼ်လႄႈ ၸိုင်ႈမိူင်းႁူမ်ႈတုမ်ၾႅတ်ႊၻရႄႊလ်ၼႆႉ ၶဝ်ၶႂ်ႈလႆႈလိူဝ်ပိူၼ်ႈ။ ၵူၺ်းၵႃႈ လွင်ႈၸိူဝ်းၼႆႉ တေလႆႈၶတ်းၸႂ်တႄႉတႄႉဝႃႈဝႃႈ။ ၵူၼ်းႁဵတ်းၵၢၼ်မိူင်း ၵူၼ်းႁူႉၵၢၼ်မိူင်းၵူၺ်း ၶတ်းၸႂ်ႁဵတ်းၵႂႃႇၼႆႉ မၼ်းတေၼၢၼ်းထိုင်တီႈ၊ ထုၵ်ႇလႆႈပႃးၵူၼ်းဝၢၼ်ႈၵူၼ်းမိူင်း ၵူႈၸၼ်ႉထၢၼ်ႈ၊ ၵူႈၵေႃႉ၊ ပေႃးၼၼ်ၸင်ႇ ၵၢၼ်ဢၼ်ၼႆႉ ၸင်ႇထိုင်လႆႈတီႈတႃႈယိူင်းမၢႆႁဝ်း”- ၸဝ်ႈၶုၼ်ထုၼ်းဢူး လၢတ်ႈတိုၵ်းသူၼ်း ၼင်ႇၼႆ။

ပီၵွၼ်းငိုၼ်း 25 ပီ၊ ၶုၵ်းထူပ်းၵၢၼ်လိူၵ်ႈတင်ႈပီ 1990 ၼႆႉ ၸတ်းႁဵတ်းတီႈဝဵင်းလူင် တႃႈၵုင်ႈ၊ ပဵၼ်ၽွင်းတႅၼ်းၵူၼ်းမိူင်း ၸိူဝ်းလႆႈႁပ်ႉလိူၵ်ႈတင်ႈမိူဝ်ႈပၢၼ်ၼၼ်ႉ လႄႈ ၽွင်းတႅၼ်းသၽႃး ႁူမ်ႈၵၼ်ၸတ်းႁဵတ်း။ ၽွင်းတႅၼ်းသၽႃးပၢၼ်ၼၼ်ႉ ၸိူဝ်းတိုၵ်ႉမီးသၢႆၸႂ်ယူႇဝၼ်းမိူဝ်ႈၼႆႉၵေႃႈ ၶဝ်ႈႁူမ်ႈ။ တူဝ်တႅၼ်းၸၢဝ်းၶိူဝ်း လႄႈ ၽူႈမီးပုၼ်ႈၽွၼ်း ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵမ်ႈၽွင်ႈ၊ ၸဝ်ႈသင်ၶၵမ်ႈၽွင်ႈၵေႃႈ ၶဝ်ႈႁူမ်ႈၸွမ်း။

ၵူၺ်းၵႃႈ ပီၵွၼ်းငိုၼ်း ၶုၵ်းထူပ်းပၢင်လိူၵ်ႈတင်ႈပီ 1990 ဢၼ်ၸတ်းႁဵတ်းယဝ်ႉၵႂႃႇၼႆႉ ပႃႊတီႊၼူၵ်ႉယုင်း (NLD) လႄႈ ၸုမ်းလုၵ်ႈႁဵၼ်း 88 (မူႇၸုမ်းလွင်ႈငမ်းယဵၼ်လႄႈ လွင်ႈလူင်ႉလႅင်းပူင်ႇသႂ်ႇ ၼႂ်းပိူင်ၵူၼ်း) တႄႉ ဢမ်ႇၶဝ်ႈႁူမ်ႈ။




 
© 2012 All Rights Reserved | Asean Celebrity | Fonts @ AtFonts | Free Templates