ၸဝ်ႈၸၢႆးယီႈ ၵၢဝ်ႇလၢတ်ႈ ၵူၼ်းဢမ်ႇႁၵ်ႉ ၸိူဝ်ႉၸၢတ်ႈ ႁၢႆႉၸႃႉလိူဝ်သတ်း



ၸွမ်ႁၢၼ်ၸၢႆးယီႈ ၵၢဝ်ႇလၢတ်ႈၶေႃႈၵႂၢမ်း တီႈပၢင်ၵႅဝ်ႈ ဝၼ်းလုၵ်ႉၽိုၼ်ႉ ၸိုင်ႈတႆး ၶွပ်ႈၶူပ်ႇ 57 ပီ၊ လိူၼ်မေႊ 21 ဝၼ်း (2015) ဢၼ်ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းတီႈငဝ်ႈၸိုင်ႈ လွႆတႆးလႅင်း။ ၵိူတ်ႇပဵၼ်ၵူၼ်း ပုၼ်ႈၽွၼ်းႁၵ်ႉၸိူဝ်ႉၸၢတ်ႈ တိုၼ်းၵိုၵ်းမႃး။ ၵူၼ်းဢမ်ႇႁၵ်ႉၸိူဝ်ႉၸၢတ်ႈ ႁၢႆႉၸႃႉ လိူဝ်သတ်း။


(သၢႆႉၵႂႃႇၶႂႃ-တႅဝ်းၼႃႈ) ၸဝ်ႈယွတ်ႈသိုၵ်း၊ ၸဝ်ႈၸၢႆးယီႈ၊ ၸဝ်ႈၶိူဝ်းငိုၼ်း
မၼ်းၸဝ်ႈၵၢဝ်ႇလၢတ်ႈဝႃႈ- ပုၼ်ႈၽွၼ်း ပိူဝ်ႈတႃႇႁဵတ်းၵၢၼ်ၸိူဝ်ႉၸၢတ်ႈၼႆႉ မၼ်းဢမ်ႇၸႅၵ်ႇၵေႃႉလႂ် ၵေႃႉၼၼ်ႉ။ ၵူၼ်းၵူႈၵေႃႉၼႆႉ ၵိူတ်ႇပဵၼ်ၵူၼ်းမႃးယဝ်ႉ တႃႇႁၵ်ႉၸိူဝ်ႉၶိူဝ်းဢၼ်ဝႃႈၼႆႉ  ပုၼ်ႈၽွၼ်းတိုၼ်းၵိူတ်ႇ ၵိုၵ်းမႃး။ ၵူၼ်းၼႆႉ ပေႃးဢမ်ႇမေႃႁၵ်ႉၸိူဝ်ႉၶိူဝ်းၼႆ မၼ်း ႁၢႆႉၸႃႉလိူဝ်သေသတ်းၵႂႃႇယဝ်ႉ။ သတ်းၶဝ်ၼႆႉ ၵႆႇၶဝ်မႃၶဝ်ယင်းႁၵ်ႉလုၵ်ႈၶဝ်၊ ႁၵ်ႉၶိူဝ်းၶဝ်။ ႁဝ်းသမ်ႉပဵၼ်ၵူၼ်း၊ ႁဝ်းပဵၼ်တႆး၊ ႁဝ်းၵိူတ်ႇမႃးၼိူဝ်ၼင်လိၼ်တႆး၊ ႁဝ်းသမ်ႉလီဢၢႆ၊ ႁဝ်းၵူဝ်ပဵၼ်တႆး၊ ပေႃးယဝ်ႉၵုမ်ႇဢဝ်တူဝ်လွတ်ႈသေ ဢမ်ႇႁဵတ်းပၼ်ၵၢၼ်တႃႇတႆးၼႆ ဢၼ်ၼႆႉႁၢႆႉၸႃႉလိူဝ်သေ ဢၼ်ပိူၼ်ႈလၢတ်ႈ (သတ်း) ၼၼ်ႉယဝ်ႉ။

ၵွပ်ႈပိူဝ်ႈၼၼ်လႄႈ ၵူၼ်းမိူင်းႁဝ်းလႄႈသိုၵ်းႁၢၼ်ႁဝ်း ႁႂ်ႈမီးၸႂ်ႁၵ်ႉၸိူဝ်ႉၶိူဝ်း ၸႂ်ႁၵ်ႉဝၢၼ်ႈမိူင်းႁဝ်း။ ဢၼ်ၵဝ်ၶႃႈႁဝ်းလၢတ်ႈဝႃႈ ႁႂ်ႈႁၵ်ႉၸိူဝ်ႉၶိူဝ်း ႁႂ်ႈႁၵ်ႉတႆးၼႆၼၼ်ႉ ၵမ်ႈၽွင်ႈတႄႉႁၼ်ထိုင်ဝႃႈ ႁၼ်ၵႅပ်ႈ၊ ႁၼ်ပွတ်း၊ ႁူႉတႃႇတႆးၵူၺ်း။ မိူင်းတႆးၼႆႉ မီးၸၢဝ်းၶိူဝ်းပဢူဝ်း ၸၢဝ်းၶိူဝ်းဝႃႉ ၸိူဝ်းၼႆႉၸွမ်း။ ၵူၺ်းၵႃႈ ဢၼ်ၵဝ်ၶႃႈႁဝ်းဝႃႈၼႆႉ ႁဝ်းပဵၼ်တႆး ႁဝ်းႁၵ်ႉတႆး၊ ဢမ်ႇၸႂ်ႈႁဝ်းတေလႆႈၸင်းပဢူဝ်း၊ ႁဝ်းတေလႆႈပေႉၵိၼ်ဝႃႉ ပေႉၵိၼ်ပလွင်ႈဢမ်ႇၸႂ်ႈ။ ႁဝ်းပဵၼ်တႆး ႁဝ်းထုၵ်ႇလႆႈႁၵ်ႉတႆးၼႆ ပဵၼ်ၵၢၼ်ၵိူတ်ႇၵိုၵ်းမႃးယဝ်ႉ။ ပေႃးဝႃႈႁဝ်း ပဵၼ်တႆး ၵၢၼ်တႃႇတႆးႁဝ်း ႁဝ်းယင်းဢမ်ႇႁဵတ်းလႆႈ ဢမ်ႇပဵၼ်လႆႈၼႆ ႁဝ်းသမ်ႉတေႁဵတ်းၵၢၼ်ၵူၼ်းတင်းၼမ် ၵၢၼ်ပိူၼ်ႈဢၼ်ဝႃႈၼႆႉ ယႃႇပေဝူၼ်ႉယဝ်ႉ။

ၸိူင်ႉၼင်ႇ ၵူၼ်းၶႂ်ႈလူႇၶႂ်ႈတၢၼ်း၊ တႃႇၼႃႈႁိူၼ်းမၼ်းၵုမ်ႇၵူၺ်း ယင်းဢမ်ႇမီး ဢမ်ႇပေႃး၊ မၼ်းသမ်ႉၶႂ်ႈလူႇၶႂ်ႈတၢၼ်း ဢၢၼ်ႇမိုၼ်ႇဢၢၼ်ႇသႅၼ်တိၵ်းတိၵ်းၼႆ ပေႃးမၼ်းလူႇမၼ်းတၢၼ်းတိၵ်းတိၵ်းၵေႃႈ မၼ်းၽၢၼ်တိၵ်းတိၵ်းၵူၺ်း၊ မၼ်းတေမီးမႃးဢမ်ႇၸႂ်ႈ။ ၵွပ်ႈပိူဝ်ႈၸိူင်ႉၼၼ်လႄႈ ႁဝ်းထုၵ်ႇလႆႈႁဵတ်းတႃႇႁဝ်း ဢွၼ်တၢင်း။ ႁဝ်းႁၵ်ႉၸိူဝ်ႉၶိူဝ်းၼႆႉ ယႃႇပေမိူၼ်သတ်း၊ သတ်းၼႆႉတႄႉ ပေႃးဝႃႈၶႄတူဝ်ၽႂ်တူဝ်မၼ်း ၶဝ်ႁၵ်ႉၸုမ်းၽႂ်ၸုမ်းမၼ်းယဝ်ႉၵေႃႈ ၶူပ်းပိူၼ်ႈ၊ ပေႉၵိၼ်ပိူၼ်ႈ။

တႆးႁဝ်းၼႆႉ ႁဝ်းပဵၼ်ၵူၼ်းလႄႈ ႁဝ်းႁၵ်ႉၸိူဝ်ႉၶိူဝ်းႁဝ်းၼႆႉ ႁဝ်းပူၵ်းပွင်ၵႂၢမ်းလၢတ်ႈႁဝ်း လိၵ်ႈလၢႆးႁဝ်း ၾိင်ႈႁဝ်း၊ ၵူၺ်းႁဝ်းယႃႇပေယႃႉပိူၼ်ႈ၊ ယႃႇပေပေႉၵိၼ်ပိူၼ်ႈ။ ယူႇတီႈယူႇၼႂ်းပၢင်ပွႆးသေယဝ်ႉ ၶႂ်ႈၵၢဝ်ႇလၢတ်ႈ ၶေႃႈၵႂၢမ်းသင်ႇ ၼင်ႇၼႆ။

(ၶႅၼ်းတေႃႈပႂ်ႉသိုပ်ႇဢၢၼ်ႇ ၸဝ်ႈၸၢႆးယီႈ ၵၢဝ်ႇလၢတ်ႈလွင်ႈ SSNA တင်း RCSS ႁူမ်ႈႁွမ်းၵၼ် တဵမ် 10 ပီ)




 
© 2012 All Rights Reserved | Asean Celebrity | Fonts @ AtFonts | Free Templates