ၾၢႆႇႁဵတ်းဝႂ်ၵပ်းတူဝ် (မၢတ်ႈပူင်ႇတိၼ်ႇ) လဝၵ တူင်ႇဝဵင်းသီႇပေႃႉ လူင်းပိုၼ်ႉတီႈ တၢင်းၵိင်ႇၸႄႈဝဵင်း ၼမ်ႉလၼ်ႈ တွၼ်ႈတႃႇၵူၼ်းၸိူဝ်းပႆႇယၢမ်ႈမီးဝႂ်ႇၵပ်းတူဝ် ၵူၼ်းၵိုၵ်းမိူင်းၼၼ်ႉ လႆႈၸၢႆႇငိုၼ်း 1 ၵေႃႉ မိုၼ်ပျႃးပၢႆ။

ဝႂ်ၵပ်းတူဝ် ၵူၼ်းၵိုၵ်းမိူင်း ၸိုင်ႈမိူင်းႁူမ်ႈတုမ်မၢၼ်ႈ

ဝၼ်းတီႈ 6 တေႃႇထိုင် 14 လိူၼ်မေႊၼႆႉ ၸုမ်းႁဵတ်းဝႂ်ၵပ်းတူဝ် ( လဝၵ) ဝဵင်းသီႇပေႃႉ လူင်းႁဵတ်းပၼ်ဝႂ်ၵပ်းတူဝ် ၵူၼ်းမိူင်း ၸွမ်းၼင်ႇၽႅၼ်ၵၢၼ် “မူဝ်းပုၼ်ႉ” ၶဝ်။ ၽႅၼ်ၵၢၼ်ၼႆႉလူင်းႁဵတ်းပၼ် တွၼ်ႈတႃႇၵူၼ်းပႆႇယၢမ်ႈမီး(ႁဵတ်းပၼ်မႂ်ႇမႂ်ႇ)ၵေႃႈဝႃႈလႆႈ။ ၸိူဝ်းၶႂ်ႈႁဵတ်းသဵၼ်ႈမၢႆႁူဝ်ႁိူၼ်း ဢၼ်မႂ်ႇလႄႈသင် မႄးလၢႆႈပိၼ်ႇမႂ်ႇလႄႈသင်ၸိူဝ်းၼႆႉ ၸိူဝ်းယိပ်းဝႆႉ ဝႂ်ၵပ်းတူဝ်မူတ်းဢႃႇယုၸိူဝ်းၼႆႉ ၶႂ်ႈလႅၵ်ႈၶိုၼ်းၵေႃႈ ဢမ်ႇႁဵတ်းပၼ် ဝႃႈၼႆ။

ၵူၼ်းၸိူဝ်းလႆႈၵႂႃႇႁဵတ်းဝႂ်ၵပ်းတူဝ်ၵေႃႉၼိုင်ႈလၢတ်ႈဝႃႈ - “ၶဝ်မႃးႁဵတ်းပၼ်ႁဝ်းၶႃႈ ထိုင်တီႈၼမ်ႉလၼ်ႈၼႆႉလႄႈ ငိၼ်းၸူမ်းတႄႉၶႃႈ ။ ႁဝ်းဢမ်ႇလႆႈသဵင်ႈၵႃႈၸႂ်ႉၸၢႆႇတႃႇၵႂႃႇသီႇပေႃႉၼၼ်ႉၼႃႇ။ ငိုၼ်းတႄႉလႆႈ သဵင်ႈမွၵ်ႈ မိုၼ်ႇသွင် မိုၼ်ႇသၢမ်ၼႆႉၶႃႈဢေႃႈ။ လႆႈပၼ်တီႈလုမ်း ပႃးတင်းၵႃႈၵူတ်ႇထတ်းလိူတ်ႈ ၵႃႈၶႅပ်းႁၢင်ႈ ၵႃႈၽိုၼ်မိူၼ်ၸိူဝ်းၼႆႉ - ဝႃႈၼႆ။

ၽူႈယႂ်ႇၼႂ်းပွၵ်ႉၵေႃႉၼိုင်ႈ သမ်ႉလၢတ်ႈဝႃႈ  - မိူဝ်ႈၶဝ်မႃးႁဵတ်းပၢင်ၵုမ်တီႈၵျွင်းၵၢင်ၼၼ်ႉ ႁူဝ်ပဝ်ႈၸုမ်း လဝၵ သီႇပေႃႉ ၸၢႆးထုၼ်းဢေး လၢတ်ႈတႄႉဝႃႈ  ဢမ်ႇလႆႈသဵင်ႈၵႃႈသဵင်ႈႁူဝ်သင် ၊ သဵၼ်ႈမၢႆႁူဝ်ႁိူၼ်းလႄႈ ဝႂ်ၵပ်းတူဝ် ဢၼ်မူတ်းဢႃႇယု ၸိူဝ်းၼႆႉတႄႉ ဢမ်ႇႁဵတ်းပၼ်တီႈၼႆႈ။ ပေႃးၶႂ်ႈႁဵတ်း ႁႂ်ႈၵႂႃႇသီႇပေႃႉ ။ ၽိူဝ်ၶဝ်မႃးႁဵတ်းသမ်ႉ ၼိုင်ႈၵေႃႉၼႆႉ လႆႈပၼ်ပဵၼ်မိူၼ်ပၢႆ ။ ႁဝ်းၶႃႈႁူႉဝႆႉတႄႉ ၽႅၼ်ၵၢၼ်ဢၼ်မႃးႁဵတ်းပၼ်ၼႆႉ တိုၼ်းဢမ်ႇလႆႈ သဵင်ႈၵႃႈသင်သေပႅၵ်ႉ ။ ဢၼ်လၢတ်ႈၼႂ်းပၢင်ၵုမ်ႇဝႃႈ ၸိူဝ်းဢမ်ႇႁဵတ်းပၼ်လႆႈဢၼ်ဝႃႈၼၼ်ႉ မၢင်ၸိူဝ်းသမ်ႉ ႁဵတ်းလႆႈလၢႆလၢႆယူႇၶႃႈဝႃႇ။ ပဵၼ်ၸိူင်ႉႁိုဝ်တႄႉတႄႉ ဢၼ်ဝႃႈၼၼ်ႉၵေႃႈ ႁဝ်းၶႃႈဢမ်ႇလႆႈႁူႉၸွမ်း။
ဝႂ်ၵပ်းတူဝ်( ၽႅၼ်ၵၢၼ် မူဝ်းပုၼ်ႉ) ၼႆႉ မီးၽူႈၸွႆႈထႅမ်ဝႆႉသေ တေႁဵတ်းပၼ်လၢႆလၢႆၼႆ ၼႂ်းၶၢဝ်ႇလၢႆလၢႆဢၼ်ၵေႃႈ ပိုၼ်ႇၽၢဝ်ႇဝႆႉယူႇ။

ၵူၼ်းမိူင်းမၢင်ၸိူဝ်းဢၼ်လုၵ်ႉတၢင်ႇတီႈသီႇလႅၼ်ၶၢႆႉၶဝ်ႈမႃးယွၼ်ႉလွင်ႈတၢင်းၵူႈၸိူဝ်းၵူႈပိူင်ၼႆႉယႃႇဝႃႈၶၢဝ်ႇ ထီႊဝီႊလႃႈ  တေႃႈၼင်ႇရေ႞ၻီႊဢူဝ်ႊ ၸိူဝ်းၼႆႉၵေႃႈ မၢင်ၸိူဝ်း ယင်းတေဢမ်ႇတွၼ်ႉယၢမ်ႈလႆႈထွမ်ႇ ဢမ်ႇလႆႈတူၺ်း ယွၼ်ႉၵၢၼ်ႁႃၵိၼ်လဵင်ႉတွင်ႉၼႃႈႁိူၼ်းၽႂ်မၼ်း ၵပ်ႉၵိၼ်းဝႆႉ။ မၢင်ၸိူဝ်းလႆႈငိၼ်းၶၢဝ်ႇဝႃႈ တေႁဵတ်းပၼ်လၢႆလၢႆၼႆသေၵႂႃႇႁဵတ်းၵေႃႈမီး ။ ပေႃးထိုင်တီႈလုမ်းၵေႃႈ တေလႆႈဢဝ်ၸေႈတၢင်ႇလဝ်ႈ ၵူၺ်းယဝ်ႉလႄႈ ဢမ်ႇၸၢင်ႈႁဵတ်းႁိုဝ်လႄႈ ၵႃႈလႆႈပၼ်ႁဵတ်းၵေႃႈမီး လႆႈႁူႉၸွမ်းၼင်ႇၼႆ။ ႁွင်ႈၵၢၼ်လူင် ၾၢႆႇၵုမ်းထတ်းၵူၼ်းၶဝ်ႈ ၵူၼ်းဢွၵ်ႇ (ၸႄႈမိူင်းၸိုင်ႈတႆး) ဢွၵ်ႇၶေႃႈ ပိုၼ်ၽၢဝ်ႇ ထိုင်ပေႃႈမႄႈၵူၼ်းမိူင်း ၸိူဝ်းပႆႇလႆႈယိုၼ်ႈ ႁဵတ်းဝႂ်ၵပ်းတူဝ်ၵူၼ်းၵိုၵ်းမိူင်း၊ ႁႂ်ႈယိုၼ်ႈယွၼ်း ႁဵတ်းဝႂ်ၵပ်းတူဝ်။

ၶေႃႈပိုၼ်ၽၢဝ်ႇ ႁွင်ႈၵၢၼ်ၾၢႆႇဝႂ်ၵပ်းတူဝ် ငဝ်ႈလုမ်းတူၼ်ႈတီး ယၢမ်ႈပိုၼ်ၽၢဝ်ႇ မိူဝ်ႈလိူၼ်ၾႅပ်ႊပိဝ်ႊရီႊ ၼၼ်ႉဝႃႈ - တွၼ်ႈတႃႇပေႃႈမႄႈၵူၼ်းမိူင်း ၸိူဝ်းပႆႇမီးဝႂ်ၵပ်းတူဝ်ၵူၼ်းၵိုၵ်းမိူင်းၼၼ်ႉ ဢိင်ၼိူဝ်ၽႅၼ်ၵၢၼ်ၶိုၵ်ႉတွၼ်း တူဝ်ႈမိူင်းသေ တေလူင်းပိုၼ်ႉတီႈႁဵတ်းပၼ်ၵႂႃႇတေႃႇထိုင်ဝၼ်းတီႈ 30/6/2015။ ၵူၼ်းမိူင်းၸိူဝ်း ဢႃႇယုတဵမ်သေ ပႆႇမီးဝႂ်ၵပ်တူဝ်တင်းသဵင်ႈ ၶႅၼ်းတေႃႇၵႂႃႇလူင်းသဵၼ်ႈၸိုဝ်ႈၽႂ်မၼ်း တီႈၽူႈၵွၼ်းပွၵ်ႉယွမ်ႇ ဝၢၼ်ႈ ဢိူင်ႇ လူၺ်ႈလၵ်းထၢၼ် ၸွမ်းၼင်ႇပႃႇတႂ်ႈၼႆႉသေၵမ်း။

တႃႇယိုၼ်ႈယွၼ်းသဵၼ်ႈမၢႆႁူဝ်ႁိူၼ်း -
1.    ၽိုၼ်လိၵ်ႈယိုၼ်ႈယွၼ်းၶွင်ၽူႈၵွၼ်းၼႃႈႁိူၼ်း
2.    ၸဝ်ႈၵဝ်ႇယူႇဝဵင်းလႂ် / ၵမ်းလိုၼ်းသုတ်း / ၶၢႆႉမႃး “လၵ်းပိူင်ၽိုၼ်လိၵ်ႈမၢႆ 10”
3.    လိၵ်ႈၵမ်ႉ ၽူႈၵွၼ်းပွၵ်ႉယွမ်ႇဝၢၼ်ႈဢိူင်ႇ။
4.    လိၵ်ႈၵမ်ႉၽူႈၵွၼ်းၼႃႈႁိူၼ်း ဢၼ်တေႁပ်ႉသဵၼ်ႈၸိုဝ်ႈၽိူမ်ႉထႅမ်ယူႇၸွမ်းၶဝ်။
5.    ပိူဝ်ႈတႃႇလူင်းသဵၼ်ႈၸိုဝ်ႈၽူႈၵိူတ်ႇၼၼ်ႉ တၵ်းလႆႈမီးဝႂ်ၵိူတ်ႇ။