ပၢင်ၵုမ်လူင် ဝူင်ႈၵၢင်ၸုမ်းၸၢဝ်းၶိူဝ်း NCCT တင်း ၸုမ်းလူင်ပွင်ၸိုင်ႈမၢၼ်ႈ UPWC ဢၼ်ၸတ်းတီႈ ဝဵင်းလူင်တႃႈၵုင်ႈ ၽွင်းႁၢင်လိူၼ်မၢတ်ႊၶျ်ၼႆႉ ဢၼ်လမ်ႇလွင်ႈသုတ်း ပဵၼ်ၽႅၼ်တၢင်းၵၢၼ်မိူင်း (Roadmap) ။

Photo: Nyo Ohn Myint

ပၢင်ၵုမ်ဝူင်ႈၵၢင် ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) တင်း ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၼႆႉဝၢႆးသေၸတ်းပူၼ်ႉမႃးမိူဝ်ႈဝၼ်းတီႈ 17-18/03/2015 တီႈဝဵင်းလူင်တႃႈၵုင်ႈယဝ်ႉ၊ ၶိုၼ်းၸတ်းထႅင်ႈမိူဝ်ႈ ဝၼ်းတီႈ 30-31/03/2015 ။  ၼႂ်းဝၼ်းတီႈ 30 ၼၼ်ႉ လႆႈၸႂ်ၵၼ်ယူင်ႉၶၢပ်ႈ တႃႇတေလူင်းလၢႆးမိုဝ်းၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCA) ။ ဝၼ်းတီႈ 31/03/2015 တေတႄႇလူင်းလၢႆးမိုဝ်း ႁူဝ်ႁႅၵ်ႈႁူဝ်တီးၵႂႃႇ- ၼႆယဝ်ႉ။

ပၢင်ၵုမ်ၼႆႉ လႆႈဢုပ်ႇဢူဝ်းတင်းမူတ်း 7 ၵၼ်၊ မီး 33 ႁူဝ်ၶေႃႈ၊ 86 တွၼ်ႈ။ ဢုပ်ႇဢူဝ်းၵၼ်ယဝ်ႉတူဝ်ႈၵႂႃႇ မိူဝ်ႈဝႃး (ဝၼ်းတီႈ 31/03/2015)ၼႆႉ။ ၼႂ်းၼၼ်ႉဢၼ်ၼိုင်ႈ ဢၼ်လမ်ႇလွင်ႈမၼ်း ပဵၼ်ၵဵဝ်ႇၵပ်းလွင်ႈ ၽႅၼ်တၢင်းၵၢၼ်မိူင်း (Roadmap) ။ ၽႅၼ်တၢင်းၵၢၼ်မိူင်းၼႆႉ 1.ပိူဝ်ႈတႃႇဢုပ်ႇဢူဝ်း ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်းသေ လူင်းလၢႆးမိုဝ်း။ 2.တေလႆႈမႃးဢုပ်ႇဢူဝ်းလွင်ႈ ယူင်ႉၶၢပ်ႈ။ 3.တေမီးလွင်ႈ ဢုပ်ႇဢူဝ်းၵၼ် ၵၢၼ်မိူင်း။ ၽွင်းတိုၵ်ႉဢုပ်ႇဢူဝ်းၵၼ်ၵၢၼ်မိူင်းၼႆႉ တေဢုပ်ႇပႃးလွင်ႈၵၢၼ်သိုၵ်း။ 4.တေမီးလွင်ႈၸတ်းပၢင်ၵုမ်လူင် ပတ်းပိုၼ်ႉ ဢၼ်ႁွင်ႉဝႃႈ ပၢင်ၵုမ်လူင်လွင်ႈငမ်းယဵၼ် ၸိုင်ႈမိူင်းႁူမ်ႈတုမ်။ ပေႃးၼၼ်ႉယဝ်ႉ 5.တေလူင်းလၢႆးမိုဝ်း ၶေႃႈတူၵ်းလူင်းၶေႃႈလႆႈၸႂ် ပၢင်ၵုမ်လူင် လွင်ႈငမ်းယဵၼ်ပတ်းပိုၼ်ႉ ၸိုင်ႈမိူင်းႁူမ်ႈတုမ်။ 6.တေတၢင်ႇတီႈသၽႃး ၸိုင်ႈမိူင်းႁူမ်ႈတုမ်သေ ဢဝ်လွင်ႈႁပ်ႉႁွင်း/မၵ်းမၼ်ႈ။ 7.တေမႃးလူင်းမိုဝ်း ႁဵတ်းသၢင်ႈႁႂ်ႈဢွၵ်ႇၼမ်ႉဢွၵ်ႇတူဝ် (ၽေႃႇၼမ်ႉၽေႃႇတူဝ်မၼ်း) ၵႂႃႇ- ၽူႈၵွၼ်းလုမ်း ၸိုင်ႈမိူင်းႁူမ်ႈတုမ် (Pyidaungsu Institute-PI) ၸဝ်ႈၶိုၼ်းသႂ် ဢၼ်ၵႂႃႇၶဝ်ႈႁူမ်ႈပၢင်ဢုပ်ႇဢူဝ်းလၢတ်ႈ။

ဢၼ်လမ်ႇလွင်ႈတီႈသုတ်း ဢၼ်ထုၵ်ႇလႆႈႁဵတ်းၵႂႃႇမိူဝ်ႈလဵဝ်ၼႆႉ ၸုမ်းၽႂ်ၸုမ်းမၼ်း တေမိူဝ်းတၢင်ႇလၢတ်ႈ တီႈၵူၼ်းလူင်ၽႂ်မၼ်း၊ ပေႃးတၢင်ႇၼႄၵူၼ်းလူင်ၽႂ်မၼ်းယဝ်ႉ ၵူၼ်းလူင်ၵူႈမူႇၵူႈၸုမ်း ၶဝ်တေႁူပ်ႉထူပ်းၵၼ် ၸတ်းပၢင်ၵုမ်သုတ်းယွတ်ႈဢၼ်ၼိုင်ႈ။ ပေႃးဝႃႈၸတ်းပၢင်ၵုမ်လူင် / သုတ်းယွတ်ႈယဝ်ႉ ၸင်ႇၵွႆႈမႃးႁူမ်ႈၵၼ် တႅပ်းတတ်း။ ပေႃးမႃးတႅပ်းတတ်းယဝ်ႉ သင်ၸိူဝ်ႉဝႃႈ ဢမ်ႇမီးလွင်ႈ တေလႆႈမူၼ်ႉမႄးသင်သေပိူင်ယဝ်ႉၼႆၵေႃႈ ၶဝ်တေတိတ်းတေႃႇၵၼ်တင်း လူင်ပွင်ၸိုင်ႈသေ ၼတ်ႉမၢႆ/ၽတ်းဝၼ်းတီႈဢၼ်တေလူင်းလၢႆးမိုဝ်း ပတ်းပိုၼ်ႉ။

ၵွပ်ႈၼၼ် တေႃႇပေႃးထိုင်လူင်းလၢႆးမိုဝ်းလႆႈၼႆႉ လၢႆၾၢႆႇလၢႆၵေႃႉလၢမ်းဝႃႈ တေလႆႈပႂ်ႉၶၢဝ်းတၢင်းမွၵ်ႈ 2 လိူၼ်။ ယွၼ်ႉပိူဝ်ႈဝႃႈ ၼႂ်းၵႄႈမၼ်းၼႆႉ လိူၼ်ႁႃႈသွၼ်းၼမ်ႉ သၢင်းၵျၢၼ်ႇၵေႃႈမႃးထိုင်သေ ဢၼ်တေၵိုတ်း ယင်ႉၵၢၼ်ၸိူဝ်းၼႆႉၵေႃႈ တေမီးၼမ်။ ၵူၺ်းၵႃႈ ၵဵဝ်ႇၵပ်းလွင်ႈ ၸုမ်းလၢႆးလုၵ်ႉၽိုၼ်ႉ ၶဝ်တႄႉတေမီးလွင်ႈဢုပ်ႇဢူဝ်း လွင်ႈၼႆႉၵႂႃႇတိၵ်းတိၵ်း၊ တေမီးၵၢၼ်သပ်းၸႅင်ႈၼႄ ၵၼ်ၵႂႃႇ ႁႂ်ႈၵူႈၾၢႆႇၾၢႆႇပွင်ႇၸႂ်၊ ၸွင်ႇတေႁပ်ႉဢမ်ႇႁပ်ႉ၊ ပေႃးဢမ်ႇႁပ်ႉသမ်ႉၶႂ်ႈမူၼ်ႉမႄးတီႈလႂ်လၢႆလၢႆ။ ၵူၺ်းၵႃႈ တင်းၼမ်တႄႉမုင်ႈမွင်းဝႃႈ ပၼ်ႁႃဢၼ်ၶွင်ႉၶမ်ယူႇ မီးသင်ၵေႃႈႁႂ်ႈလႆႈဢုပ်ႇဢူဝ်းၵႂႃႇတၢင်းၼႃႈ၊ ႁႂ်ႈလႆႈလူင်းလၢႆးမိုဝ်းၵႂႃႇ- ၽူႈၵွၼ်းလုမ်း PI ၸဝ်ႈၶိုၼ်းသႂ် သိုပ်ႇလၢတ်ႈၵႂႃႇၼင်ႇၼႆ။

ပၢင်ၵုမ်ဝူင်ႈၵၢင်ၸုမ်းၸၢဝ်းၶိူဝ်း NCCT တင်း ၸုမ်းလူင်ပွင်ၸိုင်ႈမၢၼ်ႈ UPWC ပွၵ်ႈၵမ်းၼႆႉ ပဵၼ်ၵမ်းထူၼ်ႈတီႈ 7 ၸတ်းတီႈဝဵင်းလူင်တႃႈၵုင်ႈ မိူင်းမၢၼ်ႈ။ ပၢင်ဢုပ်ႇၵုမ်ပွၵ်ႈၵမ်းၼႆႉ  ၸတ်းမႃးမိူဝ်ႈဝၼ်းတီႈ (17-18/03/2015) သေ ၵိုတ်းလိုဝ်ႈၵႂႃႇ၊ ၶိုၼ်းသိုပ်ႇပၢင်ဢုပ်ႇဢူဝ်းၶိုၼ်း ဝၼ်းတီႈ 30-31/03/2015 ၼႆႉ။ မိူဝ်ႈဝၼ်းတီႈ 17-18/03/2015 ၼၼ်ႉ လႆႈၸႂ်ၵၼ် ၼင်ႇႁိုဝ်ပေႃးတေဢမ်ႇပဵၼ်ပၢင်တိုၵ်း ၵၼ်ထႅင်ႈ။ ပၢင်တိုၵ်းဢၼ်ပဵၼ် မိူဝ်ႈပူၼ်ႉမႃးၸိူဝ်းၼၼ်ႉၵေႃႈ ႁႂ်ႈမၼ်းယဝ်ႉၵႂႃႇ- ၼႆယဝ်ႉ။