ၸုမ်းၸၢဝ်းၶိူဝ်း NCCT တင်း လူင်ပွင်ၸိုင်ႈမၢၼ်ႈ UPWC သိုပ်ႇဢုပ်ႇဢူဝ်းၵၼ်ထႅင်ႈ ၊ လႆႈၸႂ်ၵၼ်ႁူဝ်ႁႅၵ်ႈႁူဝ်တီး ပိူဝ်ႈတႃႇ လူင်းလၢႆးမိုဝ်းၵိုတ်းယိုဝ်း ပတ်းပိုၼ်ႉၸိုင်ႈမိူင်း။

ဝၼ်းတီႈ 30/03/2015 (မိူဝ်ႈဝႃး)ၼႆႉၸုမ်းၵပ်းသၢၼ် ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCCT) တင်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၶိုၼ်းသိုပ်ႇ ပၢင်ႁူပ်ႉထူပ်းဢုပ်ႇဢူဝ်းၵၼ် ပွၵ်ႈၵမ်း 7 ထႅင်ႈ၊ ဝၢႆးသေတႄႇပၢင်ၵုမ်မႃး မိူဝ်ႈဝၼ်းတီႈ 17/03/2015 ၼႂ်းဝဵင်းလူင်တႃႈၵုင်ႈသေ ၵိုတ်းလိုဝ်ႈပၢင်ၵုမ်ၵႂႃႇ မိူဝ်ႈဝၼ်းတီႈ 18/03/2015 ။ ပၢင်ဢုပ်ႇၵုမ် လႆႈၸႂ်ၵၼ်ယူင်ႉၶၢပ်ႈ တႃႇတေလူင်းလၢႆးမိုဝ်းၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCA) ။

ယူင်ႉၶၢပ်ႈဢုပ်ႇဢူဝ်းၵၢၼ်မိူင်း ပိူဝ်ႈတႃႇလူင်းလၢႆးမိုဝ်းၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCA)ၼႆႉ တင်းမူတ်းမီး 7 ၵၼ်၊ 33 တွၼ်ႈ လႄႈ တွၼ်ႈယွႆႈ 86 တွၼ်ႈ။ 7 ၵၼ်ၸိူဝ်းၼႆႉ လႆႈၸႂ်ၵၼ်မူတ်းယဝ်ႉ၊ ဝၼ်းတီႈ 31/03/2015 (မိူဝ်ႈၼႆႉ) တေတႄႇလူင်းလၢႆးမိုဝ်း ႁူဝ်ႁႅၵ်ႈႁူဝ်တီးၵႂႃႇ။

ႁူဝ်ၼႃႈၸုမ်းၸၢဝ်းၶိူဝ်း ၼၢႆႁူင်သႃ လၢတ်ႈဝႃႈ- မိူဝ်ႈလဵဝ် တၢင်းၾၢႆႇ NCCT တင်း UPWC လႆႈၸႂ်ၵၼ်ယဝ်ႉ ဝႃႈၼႆသေတႃႉၵေႃႈ ပိူဝ်ႈတႃႇလူင်းလၢႆးမိုဝ်းၵိုတ်းယိုဝ်း ပတ်းပိုၼ်ႉတူဝ်ႈမိူင်းၼႆႉ NCCT ယင်းပႆႇၸၢင်ႈတႅပ်းတတ်း။ ယွၼ်ႉပိူဝ်ႈ NCCT ယင်းမီးၸုမ်းၽူႈၼမ်းယူႇ၊ ယင်းတေလႆႈႁဵတ်းပၢင်ၵုမ်ၵၼ်ထႅင်ႈသေ ၸင်ႇတေၸၢင်ႈတႅပ်းတတ်းဝႃႈ တေႁဵတ်းၸိူင်ႉႁိုဝ်။ ၾၢႆႇၽူႈၼမ်း NCCT မီးၵၢင်ၸႂ်ၸိူင်ႉႁိုဝ်၊ ၶႂ်ႈတၢင်ႇလၢတ်ႈမႃးၸိူင်ႉႁိုဝ်၊ ၶႂ်ႈႁဵတ်းႁိုဝ်ထႅင်ႈၸိူဝ်းၼႆႉ။ တေလႆႈဢဝ်ၶေႃႈတႅပ်းတတ်းဢၼ်လႆႈၸႂ်ၵၼ်သေ တူဝ်ၽူႈၼမ်းၶဝ်ၵေႃႈ တေၸၢင်ႈမႃးလူင်းလၢႆးမိုဝ်းၸွမ်း။ ၵွပ်ႈၼႆ ၾၢႆႇ NCCT ၼၼ်ႉ ပေႃးဝႃႈလႆႈၸႂ်ၵၼ် ၼႂ်းၶၵ်ႉတွၼ်ႈၸိူဝ်းၼႆႉယဝ်ႉ တေၼမ်းဢဝ်မိူဝ်းႁၢႆးငၢၼ်း ၸၼ်ႉၽူႈၼမ်း ၼႂ်း NCCT ထႅင်ႈ၊ ၸင်ႇၵွႆႈတႅပ်းတတ်းသေ ပႃးၵၼ်လူင်းလၢႆးမိုဝ်း- ဝႃႈၼႆ။

ဢူးလႃႉမွင်ႇသူၺ်ႇ (MPC) လၢတ်ႈဝႃႈ- ဢၼ်ႁဝ်းၶႃႈလႆႈၸႂ်ၵၼ် ၵမ်းလိုၼ်းသုတ်းၼႆႉ ပိူဝ်ႈတႃႇတေလူင်းလၢႆးမိုဝ်းၸွမ်းၵၼ် ယူင်ႉၶၢပ်ႈဢုပ်ႇဢူဝ်းၵၢၼ်မိူင်း တွၼ်ႈၵၼ်လူင် 7 ၵၼ်၊ 33 တွၼ်ႈ လႄႈ တွၼ်ႈယွႆႈယႅမ်းထႅင်ႈ 86 တွၼ်ႈ။ တွၼ်ႈၸိူဝ်းၼႆႉ လႆႈၸႂ်ၵၼ်ဝႆႉမူတ်းယဝ်ႉ။ ၾၢႆႇၸၢဝ်းၶိူဝ်းၵေႃႈ တေမိူဝ်းႁဵတ်းပၢင်ၵုမ်လူင် ၸၼ်ႉၽူႈၼမ်း ၶွင်ၸၢဝ်းၶိူဝ်းသေ ပေႃးလႆႈၶေႃႈတႅပ်းတတ်းယဝ်ႉ ၸင်ႇၸၢင်ႈမႃးၶိုင်ပွင်ႁဵတ်းသၢင်ႈၵႂႃႇ- ဝႃႈၼႆ။

ပၢင်ၵုမ်ဝူင်ႈၵၢင်ၸုမ်းၸၢဝ်းၶိူဝ်း NCCT တင်း ၸုမ်းလူင်ပွင်ၸိုင်ႈမၢၼ်ႈ UPWC ပွၵ်ႈၵမ်းၼႆႉ ပဵၼ်ၵမ်းထူၼ်ႈတီႈ 7 တီႈဝဵင်းလူင်တႃႈၵုင်ႈ မိူင်းမၢၼ်ႈ။ ပွၵ်ႈၵမ်းၼႆႉ  ၸတ်းမႃးမိူဝ်ႈဝၼ်းတီႈ (17-18/03/2015) သေ ၵိုတ်းလိုဝ်ႈၵႂႃႇ၊ ၶိုၼ်းသိုပ်ႇပၢင်ဢုပ်ႇဢူဝ်းၶိုၼ်း ဝၼ်းတီႈ 31/03/2015 ၼႆႉ။

ပၢင်ႁူပ်ႉထူပ်းဢုပ်ႇၵုမ်ပွၵ်ႈၼႆႉ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ- ၸိုင်ႈတႆးပွတ်းဢွၵ်ႇ NDAA-ESS (ၸုမ်းမိူင်းလႃး) ၶဝ်ႈႁူမ်ႈပဵၼ်ၽူႈလဵပ်ႈႁဵၼ်း၊ ယွၼ်ႉပိူဝ်ႈဢမ်ႇၸႂ်ႈလုၵ်ႈၸုမ်း NCCT - ၼႆယဝ်ႉ။

ပၢင်ဢုပ်ႇဢူဝ်း NCCT တင်း UPWC  ပူၼ်ႉမႃးမိူဝ်ႈဝၼ်းတီႈ 17-18/03/2015 တီႈဝဵင်းလူင်တႃႈၵုင်ႈၼၼ်ႉ လႆႈၸႂ်ၵၼ် ၼင်ႇႁိုဝ်ပေႃးတေဢမ်ႇပဵၼ်ပၢင်တိုၵ်းၵၼ်ထႅင်ႈ။ ပၢင်တိုၵ်းဢၼ်ပဵၼ် မိူဝ်ႈပူၼ်ႉမႃးၸိူဝ်းၼၼ်ႉၵေႃႈ ႁႂ်ႈမၼ်းယဝ်ႉၵႂႃႇ- ၽူႈၵမ်ၵပ်းလုမ်း ၸိုင်ႈမိူင်းႁူမ်ႈတုမ် (Pyidaungsu Institute-PI) ၸဝ်ႈၶိုၼ်းသႂ် ယၢမ်ႈလၢတ်ႈၼင်ႇၼႆ။