ၵႃးသိုၵ်းမၢၼ်ႈပိၼ်ႈတူၵ်းႁူၺ်ႈ မၢၼ်ႈၼႄး သိုၵ်းတႆးပႂ်ႉယိုဝ်း



ရူတ်ႉၵႃးသိုၵ်းမၢၼ်ႈ ဢၼ်ၵႂႃႇထႅမ်ႁႅင်းသိုၵ်း တၢင်းလၢဝ်ႇၵၢႆး ၼႃႈလိၼ်ၵူဝ်းၵၢင်ႉ ပွၵ်ႈၶိုၼ်း၊တူၵ်းႁူၺ်ႈ ၼႂ်းၸႄႈဝဵင်းသႅၼ်ဝီ၊ မၢၼ်ႈၼႄးသိုၵ်းတႆးယိုဝ်းၶဝ်၊ ႁဵတ်းႁႂ်ႈၵူၼ်းမိူင်းမႆႈၸႂ် လွင်ႈသိုၵ်းမၢၼ်ႈပူၼ်ႉပႅၼ် သုၼ်ႇလႆႈၵူၼ်း။


ၵႃးသိုၵ်းမၢၼ်ႈ ၵႂႃႇထႅမ်ႁႅင်း မုင်ႈၼႃႈၸူးၼႃႈလိၼ်ၵူဝ်းၵၢင်ႉ
ဝၼ်းတီႈ 30/03/2015 (မိူဝ်ႈဝႃး)ယၢမ်းပွတ်းၼႂ်  ၵႃးသိုၵ်းမၢၼ်ႈ ဢၼ်တၢင်ႇမၢၵ်ႇမိုဝ်ႈၸိုၼ်းယၢမ်းၵႂႃႇထႅမ်ႁႅင်း တၢင်းလၢဝ်ႇၵၢႆးပွၵ်ႈၶိုၼ်း ၵိူတ်ႇၽေးဢုပၢတ်ႈ ပိၼ်ႈတူၵ်းႁူၺ်ႈ ႁိမ်းၵၢတ်ႇၸၢမ်လဝ်း ၼႂ်းၵႄႈမိူင်းလီ- ၼႃးသေႃႉ ဢိူင်ႇမိူင်းလီ ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။ ၽေးဢုပၢတ်ႈပွၵ်ႈၼႆႉ ဢမ်ႇမီးၵူၼ်းတၢႆ၊ ၵႅဝ်ႈ(မၢၼ်ႇ)ၵႃး တႅၵ်ႇလႅဝ်ၵူၺ်း။

ၵူၺ်းၵႃႈ သိုၵ်းမၢၼ်ႈၸီႉၼႄးဝႃႈ သိုၵ်းတႆးမႃးငွႆးယိုဝ်းၶဝ်လႄႈ ဢဝ်မၢၵ်ႇၵႃးၶဝ်ပိၼ်ႈတူၵ်းတၢင်း။ လွင်ႈၼႆႉ ႁဵတ်းႁႂ်ႈၵူၼ်းမႃးၶဝ်ႈၵၢတ်ႇၸၢမ်လဝ်း တိုၼ်ႇသၢၼ်ႈသေ ၵၢတ်ႇဝၢႆးၵႂႃႇ- ၼႆယဝ်ႉ။


ၾၢႆႇၼိုင်ႈၵေႃႈ ၵူၼ်းဝၢၼ်ႈၵူၼ်းမိူင်း ဢွၼ်ၵၼ်မႆႈၸႂ်၊ ယွၼ်ႉပိူဝ်ႈဝႃႈ ၵႃႈၵွၼ်ႇပူၼ်ႉမႃး ပေႃးၾၢႆႇသိုၵ်းမၢၼ်ႈမၢပ်ႇၽၢမ်း ၸီႉၼႄးဝႃႈပဵၼ်သိုၵ်းတႆးမႃးယိုဝ်းၶဝ်၊ ၶဝ်ၵႆႉမႃးႁဵတ်းႁၢႆႉတေႃႇ ၵူၼ်းဝၢၼ်ႈၵူၼ်းသူၼ်ၸိူဝ်းပဵၼ်တႆး- ၼႆယဝ်ႉ။

ၼႂ်းၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈထႅမ်ႁႅင်းသိုၵ်း ၶိူင်ႈသိုၵ်းၵွင်ႈၵၢင်ႇယူႇၶိူဝ်းယႂ်း။ ပူၼ်ႉမႃးမိူဝ်ႈဝၼ်းတီႈ 20/03/2015 ၵႃးသိုၵ်းမၢၼ်ႈ ၶိုၼ်ႈၵႂႃႇတၢင်းမိူင်းတႆးပွတ်းႁွင်ႇ လတ်းသႅၼ်ဝီ မုင်ႈၼႃႈၸူးၼႃႈလိၼ်ၵူဝ်းၵၢင်ႉ 34 လမ်း။ ဝၼ်းတီႈ 22 ၶိုၼ်ႈၵႂႃႇထႅင်ႈ 32 လမ်း၊ ၵႃးသိုၵ်းၸိူဝ်းၼႆႉ တၢင်ႇၶိူင်ႈၵွင်ႈလူင် မၢၵ်ႇလူင်ၸိူဝ်းၼႆႉ။

ၵႃးသိုၵ်းမၢၼ်ႈ ၵႂႃႇထႅမ်ႁႅင်း မုင်ႈၼႃႈၸူးၼႃႈလိၼ်ၵူဝ်းၵၢင်ႉ
ထိုင်မႃးဝၼ်းတီႈ 23/03/2015 ယၢမ်းဝၢႆးဝၼ်း ၵႃးၵၢပ်ႇလဵၵ်းသိုၵ်းမၢၼ်ႈ ၶိုၼ်ႈမႃးႁွတ်ႈထိုင်ၼႂ်းဝဵင်းသႅၼ်ဝီ မွၵ်ႈ 10 လမ်းသေ ပူၼ်ႉၵႂႃႇတၢင်းလၢဝ်ႇၵၢႆး ၼႃႈလိၼ်ၽွင်းငမ်းတူဝ်ၵဝ်ႇၵူဝ်းၵၢင်ႉ။ ရူတ်ႉၵႃးၵၢပ်ႇလဵၵ်းၸိူဝ်းၼႆႉ မီးၵႃးၵူၼ်းသိုၵ်း ၸွမ်းဢဝ်ႁူမ်ႇလူမ်ႈပၼ် 4 လမ်း၊ ၼိုင်ႈလမ်း မီးႁႅင်းသိုၵ်းမွၵ်ႈ 20-30 ၵေႃႉ ။

ထိုင်မႃးဝၼ်းတီႈ 30/03/2015 (မိူဝ်ႈဝႃး) ယၢမ်းဝၢႆးဝၼ်း မီးၵႃးၵၢပ်ႇလဵၵ်းသိုၵ်းမၢၼ်ႈ မွၵ်ႈ 10 လမ်း ပႃးၵႃးသိုၵ်းၸွမ်းဢဝ်လွင်ႈႁူမ်ႇလူမ်ႈမွၵ်ႈ 4 လမ်း တိုၵ်ႉၶိုၼ်ႈမႃးၽႅဝ်တၢင်း ၵျွၵ်ႉမႄး - သီႇပေႃႉ မုင်ႈၼႃႈၸူးတၢင်းသႅၼ်ဝီ။ ဝၼ်းတီႈ 31/03/2015 (မိူဝ်ႈၼႆႉ) ၵၢင်ၼႂ်မွၵ်ႈယၢမ်း 8 မူင်းၶိုင်ႈ ၵႃးၵၢပ်ႇလဵၵ်းၸိူဝ်းၼႆႉ လတ်းသႅၼ်ဝီးၵႂႃႇ တၢင်းၼႃႈလိၼ်ၵူဝ်းၵၢင်ႉထႅင်ႈ။






 
© 2012 All Rights Reserved | Asean Celebrity | Fonts @ AtFonts | Free Templates