လူၺ်ႈဢၼ်သိုၵ်းမၢၼ်ႈ တင်းသိုၵ်းတဢၢင်း ထႅမ်ႁႅင်းသိုၵ်း၊ တိုၵ်းယိုဝ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၵူတ်ႉၶၢႆ၊ တွၼ်ႈၾၢႆႇတူၵ်းၶူင်း တေႃႇၼႃႈ ၼႃႈလိၼ်ၵူဝ်းၵၢင်ႉသေ ၵူၼ်းဝၢၼ်ႈၵူၼ်းမိူင်း ပၢႆႈဢွၵ်ႇယၢၼ်ႁိူၼ်းယေးဝၢၼ်ႈသူၼ် ၵႂႃႇႁဵတ်းၵၢၼ်တၢင်းမိူင်းၶႄႇ တင်းၼမ်။

ပူၼ်ႉမႃးမိူဝ်ႈဝၼ်းတီႈ 29/03/2015 တင်ႈတႄႇဝၢႆးဝၼ်း ယၢမ်း 15:30 မူင်းတေႃႇထိုင် 16:00 မူင်း၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) တင်း တပ်ႉသိုၵ်းမၢၼ်ႈ ပဵၼ်ပၢင်တိုၵ်းၵၼ် တီႈဝၢၼ်ႈၼမ်ႉမေႃႇ (ၼႂ်းၵႄႈၼမ်ႉမေႃႇ တင်းမိူင်းၸီး) ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ ပၢင်တိုၵ်းပွၵ်ႈၼႆႉ ၾၢႆႇသိုၵ်းတဢၢင်း ပဵၼ်တပ်ႉၵွင် 223 ပႃႈတႂ်ႈတပ်ႉပိဝ်ႇႁႃႇမၢႆ 5 ဢၼ်တူင်ႉၼိုင် ၼႂ်းၸႄႈဝဵင်းၵူတ်ႉၶၢႆ၊ ပွတ်းတႃႈမိူင်းငႄး၊ မိူင်းၸီးၸိူဝ်းၼႆႉ။ ၾၢႆႇတပ်ႉသိုၵ်းမၢၼ်ႈ ပဵၼ်တပ်ႉၸုမ်းလူင် တပ်ႉမ 11 ။

ပွတ်းတႃႈမိူင်းငႄး မိူင်းၸီး ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ၊ တွၼ်ႈၾၢႆႇတူၵ်းၶူင်း ဢၼ်တေႃႇၼႃႈ ၼႃႈလိၼ်ၽွင်းငမ်းတူဝ်ၵဝ်ႇ ၵူဝ်းၵၢင်ႉၼႆႉ ဢိင်ၼိူဝ်သိုၵ်းမၢၼ်ႈထႅမ်ႁႅင်းသိုၵ်း ၶိုၼ်ႈမႃးတူင်ႉၼိုင်ယူႇ တိၵ်းတိၵ်းလႄႈ ပၢင်တိုၵ်းၸၢင်ႈတေယႂ်ႇၶိုၼ်ႈမႃးထႅင်ႈ- ၵမ်ႈၽွင်ႈထတ်းသၢင် ၼင်ႇၼႆ။

ၼႂ်းဝၼ်းတီႈ 29/03/2015 ၵူၺ်းၼင်ႇၵဝ်ႇ၊ တင်ႈတႄႇယၢမ်း 11:00 မူင်းတေႃႇထိုင် ယၢမ်း 13:45 မူင်း၊ သိုၵ်းတဢၢင်း (ပလွင်ႈ) တပ်ႉၵွင် 335  တင်း သိုၵ်းမၢၼ်ႈ လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၵူတ်ႉၶၢႆ။ ယွၼ်ႉပိူဝ်ႈပဵၼ်ပၢင်တိုၵ်း ပွၵ်ႈၵမ်းၼႆႉသေ သိုၵ်းတဢၢင်းတပ်ႉၵွင် 223 မႃးထႅမ်ႁႅင်းသိုၵ်း ပိူဝ်ႈတႃႇၸွႆႈတိုၵ်းလႄႈ လႆႈယိုဝ်းၵၼ်တင်းသိုၵ်းမၢၼ်ႈထႅင်ႈ ၸင်ႇပဵၼ်မႃးပၢင်တိုၵ်းၵၼ် တီႈဝၢၼ်ႈၼမ်ႉမေႃႇ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။

ပွတ်းၼႃႈလိၼ် တွၼ်ႈၾၢႆႇတူၵ်းၶူင်း ဢၼ်တေႃႇၼႃႈ ၼႃႈလိၼ်ၽွင်းငမ်းတူဝ်ၵဝ်ႇ ၵူဝ်းၵၢင်ႉၼႆႉ ယွၼ်ႉပိူဝ်ႈသိုၵ်းမၢၼ်ႈထႅမ်ႁႅင်းသိုၵ်းတိၵ်းတိၵ်း၊ သိုၵ်းတဢၢင်းၵေႃႈထႅမ်ႁႅင်းသိုၵ်းလႄႈတင်းသွင်ၾၢႆႇပဵၼ်ပၢင်တိုၵ်းၵၼ်။ ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈ မိူင်းၸီး တႃႈမိူင်းငႄး ၸႄႈဝဵင်းၵူတ်ႉၶၢႆၸိူဝ်းၼႆႉ ပၢႆႈဢွၵ်ႇပိုၼ်ႉတီႈ ဢမ်ႇႁတ်းယူႇသဝ်း ၼႂ်းဝၢၼ်ႈသူၼ်။ ၶၢဝ်းၼႆႉ ပဵၼ်ၶၢဝ်းႁဵတ်းႁႆႈၸဝ်ႉ ၵိူင်ႁႆႈ ၸၢတ်ႇႁႆႈ၊ ဢၼ်တေလႆႈၶဝ်ႈၸဝ်ႉ မွၵ်ႈၶၢဝ်းၵၢင်ဝႃႇသႃလႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း တူၵ်းတၢင်းယၢပ်ႇၽိုတ်ႇ ၼႂ်းၵၢၼ်ႁႃၵိၼ်လဵင်ႉတွင်ႉ။

ၵူၼ်းဝၢၼ်ႈၵူၼ်းမိူင်းၸိူဝ်းၼႆႉ ၵမ်ႈၼမ် ပၢႆႈၵႂႃႇႁဵတ်းၵၢၼ်တၢင်းမိူင်းၶႄႇ၊ မႃးတၢင်းမူႇၸေႈ ၼမ်ႉၶမ်း၊ ၵႂႃႇတၢင်းပၢင်ႇသၢႆးသေ ၶၢမ်ႈၵႂႃႇတၢင်းဝၼ်းတဵင်ႈ- မိူင်းမၢဝ်းသေ ၵႂႃႇႁႃႁဵတ်းၵၢၼ်ပွတ်းတွၼ်ႈၼၼ်ႉ ။