ၸွမ်းၼင်ႇ ၸုမ်းၶၢဝ်ႇၽူႈတွႆႇႁွၵ်ႈ ႁူပ်ႉထူပ်းတွင်ႈထၢမ် ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး (RCSS) ၵဵဝ်ႇၵပ်းလွင်ႈ ၵၢၼ်လိူၵ်ႈတင်ႈ ပီ 2015 ၼၼ်ႉ မၼ်းၸဝ်ႈ ပိုတ်ႇလၢတ်ႈဝႃႈ - မိူဝ်ႈလဵဝ် တႃႇႁဝ်း/ တႃႇမုၵ်ႉၸုမ်းႁဝ်း သူၼ်ၸႂ်လွင်ႈၵၢၼ်ဢုပ်ႇဢူဝ်း ၵၢၼ်မိူင်း လိူဝ်သေၵၢၼ်လိူၵ်ႈတင်ႈ၊ ၵၢၼ်လိူၵ်ႈတင်ႈ ပဵၼ်ၵၢၼ်ၵႄႈလိတ်ႈ ၵၢၼ်မိူင်း ၼိုင်ႈပွတ်းၼိုင်ႈတွၼ်ႈၵူၺ်း။

ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး RCSS ၸွမ်သိုၵ်းယွတ်ႈသိုၵ်း

ထၢမ်- ၼႂ်းပီ 2015 ၼႆႉ ပေႃးမွၵ်ႈႁၢင်ပီၸိူဝ်းၼႆႉ တေမီးပၢင်လိူၵ်ႈတင်ႈ၊ လွင်ႈၼႆႉၵေႃႈ လၢႆၾၢႆႇၵေႃႈတိုၵ်ႉမႆႈၸႂ်ၵႂင်ၸႂ်ၸွမ်း၊ လၵ်းလၵ်းမၼ်းပဵၼ် သွင်ပႃႊတီႊၵၢၼ်မိူင်း။ ပၢင်လိူၵ်ႈတင်ႈၼႆႉ သွင်ပႃႊတီႊတေလူင်းလိူၵ်ႈတင်ႈႁိမ်ၶၼႅၼ်း (မၢၵ်ႈ) ဝႅင်ႇသဵင်ၵၼ်၊ ပိူၼ်ႈၵေႃႈ ၸၢင်ႈမႃးၸႅၵ်ႇၸိမ်ၼႂ်း ၵႄႈၵၢင်မၼ်း။ ယူႇတီႈၸဝ်ႈႁဝ်းၵေႃႈ လႆႈၵႂႃႇႁူပ်ႉထူပ်း ပႃႊတီႊသိူဝ်ၽိူၵ်ႇမႃး မိူဝ်ႈဢမ်ႇႁိုင်ၼႆႉ၊ ႁၼ်ထိုင်ဝႃႈ လွင်ႈၸမ်ၸႂ် တင်းၽူႈယႂ်ႇၵူၼ်းလူင်လႄႈ လွင်ႈယိူင်းဢၢၼ်းၶွင်သိူဝ်ၽိူၵ်ႇမီးၸိူင်ႉႁိုဝ်၊ ပၼ်ႁႃလူင် ဢၼ်တေၵိူတ်ႇၶိုၼ်ႈတၢင်းၼႃႈၼႆႉ ၶဝ်ဝၢင်းဝႆႉလၢႆးၵႄႈလိတ်ႈမၼ်းၸိူင်ႉႁိုဝ် ?။

တွပ်ႇ-ႁဝ်းၵႂႃႇၼေႇပျီႇတေႃႇမႃးသေ ၶိုၼ်ႈမႃးဝၼ်းတီႈ 14 ၊ မႅၼ်ႈၵမ်းသၢင်ႇတေႃႇမၼ်း ဝၼ်းတီႈ 15 ၼၼ်ႉ (15/02/2015)ၼၼ်ႈ ပႃႊတီႊသိူဝ်ၽိူၵ်ႇၶဝ်ႁဵတ်းပၢင်ၵုမ် (တီႈတူၼ်ႈတီး)၊ ၶဝ်ၸိူၼ်းဝွၵ်ႇႁဝ်းၵႂႃႇၶဝ်ႈႁူမ်ႈ၊ ႁဝ်းၵေႃႈၵႂႃႇပၼ်ႁႅင်းၶဝ်။ ႁဝ်းပိုတ်ႇလၢၢတ်ႈၶေႃႈၵႂၢမ်းဝႃႈ ၵၢၼ်လိူၵ်ႈတင်ႈၼႆႉ မိူဝ်ႈလဵဝ်ၼႆႉ တႃႇႁဝ်း / တႃႇမုၵ်ႉၸုမ်းႁဝ်းၼႆႉ ႁဝ်းပႆႇသူၼ်ၸႂ်ၵၢၼ်လိူၵ်ႈတင်ႈ၊  ၵွပ်ႈပိူဝ်ႈႁဝ်းသူၼ်ၸႂ် ပိူဝ်ႈတႃႇဢုပ်ႇဢူဝ်းၵၢၼ်မိူင်း ၵႄႈလိတ်ႈပၼ်ႁႃ ၵၢၼ်မိူင်းဢွၼ်တၢင်းၵွၼ်ႇ။ ႁဝ်းႁၼ်ဝႃႈ ၵၢၼ်လိူၵ်ႈတင်ႈၼႆႉ မၼ်းဢမ်ႇၸႂ်ႈၵၢၼ်ၵႄႈလိတ်ႈပၼ်ႁႃၵၢၼ်မိူင်း ဢၼ်တႄႉမၼ်း၊ မၼ်းပဵၼ်ၼိုင်ႈပွတ်းၼိုင်ႈတွၼ်ႈၵူၺ်း။

ပေႃးမႃးတူၺ်းပႃႊတီႊၵၢၼ်မိူင်း 2 ပႃႊတီႊၼႆႉ ၶဝ်ဢမ်ႇဢူၼ်ႈယွမ်းႁႃၵၼ်၊ ဢမ်ႇဢူၼ်ႈယွမ်းႁႃၵၼ်ယဝ်ႉ သမ်ႉဢမ်ႇဢုပ်ႇၵၼ် ဢမ်ႇယွမ်းႁပ်ႉၵၼ်လႆႈ။ ၶဝ်ဝႃႈ ပေႃႇလသီႇႁဝ်းဢမ်ႇမိူၼ်ၵၼ်။ ပေႃးဢဝ်လၵ်းၽႂ် လၵ်းမၼ်းဝႃႈ ပေႃးပေႃႇလသီႇဢမ်ႇမိူၼ်ၵၼ် မၼ်းဢမ်ႇၸႂ်ႈငၢႆႈ။ ၵူၺ်းၵႃႈ ႁဝ်းထုၵ်ႇလႆႈဢဝ်ၽွၼ်းလီ ၸိူဝ်ႉၸၢတ်ႈဝႃႈ၊ ႁဝ်းယႃႇပေဢဝ်ပေႃႇလသီႇ ၸုမ်းၽႂ်ၸုမ်းမၼ်း ပႃႊတီႊၽႂ်ပႃႊတီႊမၼ်း၊ ႁဝ်းထုၵ်ႇလႆႈ ဢဝ်ၵၢၼ်ၸိူဝ်ႉၸၢတ်ႈဝႃႈ။

ဝၼ်းမိူဝ်ႈၼႆႉ ၵူၼ်းမိူင်းႁဝ်းၶႂ်ႈလႆႈ ဢီႈသင်။ ၶႂ်ႈႁႂ်ႈၽွမ်ႉႁူမ်ႈၵၼ်လူး။ ပေႃးၶႂ်ႈႁႂ်ႈၽွမ်ႉႁူမ်ႈၵၼ်ၵေႃႈ ထုၵ်ႇလီဢူၼ်ႈယွမ်းၶဝ်ႈႁႃၵၼ်သေ ဢုပ်ႇၵၼ်။ လွင်ႈဢမ်ႇလႆႈၼႆႉ မၼ်းပဵၼ်ဢီႈသင်၊ ပေႃးဢမ်ႇဢုပ်ႇၵၼ်ၵေႃႈ ဢမ်ႇၸၢင်ႈႁဵတ်းႁိုဝ်။ ၵမ်းၼႆႉသမ်ႉ ယူႇၼွၵ်ႈမၼ်းသေသႄႉၵၼ်။

ထၢမ်-ၸဝ်ႈႁဝ်းႁၼ်ထိုင်ၸိူင်ႉႁိုဝ်ၶႃႈ၊ ပေႃးဝႃႈပၢင်လိူၵ်ႈတင်ႈမႃးတေပဵၼ်ႁိုဝ်၊ ဝၢႆးပၢင်လိူၵ်ႈတင်ႈယဝ်ႉ တေပဵၼ်ၸိူင်ႉႁိုဝ်ၶႃႈ၊ ဢၼ်ၸဝ်ႈႁဝ်းလၢမ်းလႆႈၼၼ်ႉ ?။

တွပ်ႇ- မိူဝ်ႈလဵဝ်ၼႆႉ မၼ်းယူႇတီႈပႃႊတီႊလႂ်မီးၼမ်ႉၵတ်ႉ။ တေလႆႈတူၺ်းပေႃႇလသီႇ၊ ၶၼႅၼ်းမၼ်းတႄႉ ၸိူင်ႉႁိုဝ်ၵေႃႈသုမ်းယူႇယဝ်ႉ၊ ၶွင်မီး 10 ၶၼႅၼ်း ပၼ်ၵၼ်ၵေႃႉ 5 ၶၼႅၼ်းၼႆၵေႃႈ ၵေႃႉၶိုင်ႈၶိုင်ႈ ပွင်ႇဝႃႈသုမ်းယူႇယဝ်ႉ။ သင်ဝႃႈပၼ်ပႃႊတီႊၼိုင်ႈ ၼမ်ဢိတ်းၼိုင်ႈ၊ တႃႇပႃႊတီႊၼိုင်ႈလႆႈယူႇမွၵ်ႈ 3 ၶၼႅၼ်းၼႆၵေႃႈ မၼ်းပေႃးသုမ်းယူႇယဝ်ႉ၊ သင်ဝႃႈၶဝ်ႁူမ်ႈၵၼ်တႄႉ မီးသိပ်း (10) ၵေႃႈလႆႈတင်းသိပ်းၶၼႅၼ်း။ ပေႃးၸိူင်ႉၼႆ မိူဝ်ႈၵႂႃႇတီႈသိူဝ်ၽိူၵ်ႇၼႆႉ ႁဝ်းၵေႃႈလၢတ်ႈဝႃႈ ႁဝ်းပႆႇပေႃးသူၼ်ၸႂ် လိူင်ႈပႃႊတီႊၼႆႉ ၵၢၼ်လိူၵ်ႈတင်ႈၼႆႉ၊ ႁဝ်းသူၼ်ၸႂ် တႃႇတေဢုပ်ႇၵၢၼ်မိူင်း။

ထၢမ်-ပေႃးႁဝ်းၶႃႈမႃးတူၺ်း၊ မႅၼ်ႈယဝ်ႉ ပိူဝ်ႈတႃႇသိုၵ်းတႄႉ မၼ်းဢုပ်ႇတေႃႇလူင်ပွင်ၸိုင်ႈၵမ်းသိုဝ်ႈ။ ပုၼ်ႈတႃႇၵူၼ်းမိူင်းတႄႉ မုင်ႈမွင်းၵူၼ်းၸွႆႈထႅမ်၊ မိူၼ်ၼင်ႇၶိုၼ်ႈလုမ်းၶိုၼ်ႈၸၢႆးၸိူဝ်းၼႆႉ ပေႃးဝႃႈ ဢမ်ႇမေႃၵႂၢမ်းမၢၼ်ႈ ဢမ်ႇမီးၵူၼ်းၸွႆႈၸိူဝ်းၼႆႉ မၼ်းပဵၼ်ပၼ်ႁႃလူင် တႃႇၵူၼ်းမိူင်းတႆး။ ဢၼ်ၶဝ်ၸဝ်ႈဢမ်ႇယွမ်းၵၼ်ႉၼႆႉ ၸွင်ႇၸၢင်ႈပဵၼ်ၽေးတုမ်ႉတိူဝ်ႉ တေႃႇၵူၼ်းမိူင်းၶႃႈႁႃႉ ?။

တွပ်ႇ- လွင်ႈဢမ်ႇယွမ်းၵၼ်ၼႆႉ ႁဝ်းဝႃႈမၼ်းဢမ်ႇလီ။ မိူဝ်ႈလဵဝ်ၼႆႉ ႁႂ်ႈပၼ်ႁႅင်းပႃႊတီႊလႂ်ပႃႊတီႊၼိုင်ႈၼႆၵေႃႈ ႁဝ်းဢမ်ႇၸၢင်ႈပၼ်ႁႅင်း၊ ၵွပ်ႈပိူဝ်ႈႁဝ်းပႆႇသူၼ်ၸႂ် ၵၢၼ်လိူၵ်ႈတင်ႈ။ သင်ဝႃႈႁဝ်းဢုပ်ႇဢူဝ်းၵၢၼ်မိူင်း တူၵ်းလူင်းၵၢၼ်မိူင်း၊  တီႈၵၢၼ်မိူင်းၼၼ်ႉ မီးၶေႃႈႁပ်ႉႁွင်း (ဢမၶၢၼ်ႇ)ယဝ်ႉ ႁဝ်းတေၸၢင်ႈပၼ်ႁႅင်း ပႃႊတီႊလႂ်ပႃႊတီႊၼိုင်ႈ။ ႁႂ်ႈႁဝ်းပၼ်ႁႅင်း 2 ပႃႊတီႊ ႁဝ်းဢမ်ႇပၼ်၊ ပႃႊတီႊလႂ် မႅၼ်ႈတင်းပေႃႇလသီႇႁဝ်း ႁဝ်းတေပၼ်ႁႅင်းပႃႊတီႊၼၼ်ႉ၊ သၢင်ႇထုၵ်ႇ ႁဝ်းတေၵႂႃႇၶဝ်ႈႁူမ်ႈၸွမ်းပႃႊတီႊၼၼ်ႉ။ သင်ဝႃႈ ဢမ်ႇႁပ်ႉၵၼ်လႆႈသေဢိတ်း ႁဝ်းထုၵ်ႇတင်ႈပႃႊတီႊထႅင်ႈၵေႃႈ ႁဝ်းတေတင်ႈ၊ ပေႃးႁဝ်းမီးၶေႃႈႁပ်ႉႁွင်း တၢင်းၵၢၼ်မိူင်းၵၼ်ယဝ်ႉတႄႉ။ ပေႃးပႆႇမီးၶေႃႈႁပ်ႉႁွင်းၵၢၼ်မိူင်း တီႈၼႂ်းမၢႆမီႈၸိုင်ႈမိူင်း (ပိူင်ငဝ်ႈပိုင်းမိူင်း)တႄႉ ႁဝ်းပႆႇၸၢင်ႈၶဝ်ႈပႃးတီႈလႂ်။