ၵူၼ်းမိူင်း ၸႄႈဝဵင်းၼမ်ႉၶမ်း တုၵ်းယွၼ်းၽူႈၵွၼ်း ၸႄႈဝဵင်း၊ ႁႂ်ႈၸွႆႈလၢတ်ႈ ႁၢမ်ႈတၢပ်ႈ ယႃႇႁႂ်ႈၶွမ်ႊပၼီႊၶဝ် သိုပ်ႇၶုတ်းႁိၼ်ႁႄႈ လႄႈ တေႃႇတၢင်ႇၶၢႆတေႃႇ ၼွၵ်ႈမိူင်းထႅင်ႈ။ ၵွပ်ႈဝႃႈ ပေႃးသိုပ်ႇၶုတ်းႁိၼ်ႁႄႈ မႄႈၼမ်ႉလဵင်ႉသၢႆၸႂ်ၵူၼ်းမိူင်း တေႁႅင်ႈ။

ၵဵဝ်ႇၵပ်းလွင်ႈၼႆႉ ဝၼ်းတီႈ 26/02/2015 (မိူဝ်ႈဝႃး) ၵၢင်ၼႂ်ယၢမ်း 7 မူင်းၶိုင်ႈ၊ ၵူၼ်းမိူင်းၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၶဝ် ၸိူဝ်းၵႂႃႇႁၼ်တႂ်ႈတႃ မႃးလၢတ်ႈၼႄဝႃႈ- ၸုမ်းပီႇတုၸိတ်ႉၵွင်းၶႃးၶဝ် ၶိုင်ဢၢင်ႈတေ တေႃႉတၢင်ႇႁိၼ်ႁႄႈ လုၵ်ႉဢဝ်ၼႂ်းဝဵင်းၵျွၵ်ႉမႄးသေ သူင်ႇၶၢႆမိူင်းၶႄႇထႅင်ႈ- ဝႃႈၼႆ။

ၵႃႈပူၼ်ႉမႃးၼႆႉ ၸုမ်းပီႇတုၸိတ်ႉၵွင်းၶႃး ၶဝ်ႁၢင်ႈႁႅၼ်းၶိုင် ပိူဝ်ႈတႃႇတေႃႉတၢင်ႇႁိၼ်ႁႄႈယူႇတိၵ်းတိၵ်းလႄႈ ၵူၼ်းမိူင်းႁၼ်ထိုင်ဝႃႈ ၵူဝ်မီးလွင်ႈတေႃႉတၢင်ႇႁိၼ်ႁႄႈမႃးၶိုၼ်းၼႆသေ မိူဝ်ႈဝၼ်းတီႈ 25/02/2015 ႁူဝ်ၶမ်ႈ 6 မူင်းၼၼ်ႉ ၸုမ်းပႃႊတီႊႁူဝ်သိူဝ် (SNLD) ၊ ပႃႊတီႊသိူဝ်ၽိူၵ်ႇ (SNDP) ၊ ၽူႈမီးပုၼ်ႈၽွၼ်းလႄႈ ၸုမ်းၸဝ်ႈႁႆႈၸဝ်ႈၼႃး တီႈဝဵင်းၼမ်ႉၶမ်း ဢဵၼ်ႁႅင်းမွၵ်ႈ 30 ပၢႆ ၵႂႃႇတီႈလုမ်းၵွၼ်းၸႄႈဝဵင်းၼမ်ႉၶမ်းသေ ၵႂႃႇႁူပ်ႉၵၼ်တင်း ၽူႈၵွၼ်းၸႄႈဝဵင်း ဢူးၸေႃႇမိၼ်း၊ ဢူးမွင်ႇဢေး ၶဝ်ၸိူဝ်းၼႆႉသေ လႆႈဢုပ်ႇလၢတ်ႈ တုၵ်းယွၼ်းဝႃႈ- ႁႂ်ႈၽူႈၵွၼ်းၸႄႈဝဵင်းၶဝ် ၸုၵ်းၾၢႆႇၵူၼ်းမိူင်းသေ ႁႂ်ႈၸွႆႈလၢတ်ႈ ႁၢမ်ႈႁႄႉပၼ် လွင်ႈၶုတ်းႁႄႈၼႆႉ ႁႂ်ႈၵိုတ်းၵႂႃႇတႄႉတႄႉ၊ ယႃႇပေႁႂ်ႈမီးလွင်ႈၶုတ်းၶိုၼ်း- ၽူႈၼမ်းၼႂ်း ပႃႊတီႊႁူဝ်သိူဝ် (SNLD) ဝဵင်းၼမ်ႉၶမ်း- ၸၢႆးထုၼ်းလႅင်ႇ လၢတ်ႈ။

ၸၢႆးထုၼ်းလႅင်ႇ လၢတ်ႈဝႃႈ- ဝၢႆးလင်ႁဝ်းၶႃႈၵႂႃႇႁူပ်ႉ ၽူႈၵွၼ်းၸႄႈဝဵင်းမႃးယဝ်ႉ ထႅင်ႈဝၼ်းၼိုင်ႈၵၢင်ၼႂ် ၵေႃႈလႆႈႁၼ်လူတ်ႉၵႃးတၢင်ႇႁိၼ်ႁႄႈ 30 လမ်းပၢႆ ၵႂႃႇတီႈဝၢၼ်ႈႁူၺ်ႈဢူဝ်ႈပဵၼ်ထႅဝ်၊ မီးပႃးပီႇတုၸိတ်ႉၵွင်းၶႃး ယိပ်းပႃးၶိူင်ႈၵွင်ႈၵၢင်ႇ ၼုင်ႈၶူဝ်းသိုၵ်းပီႇတုၸိတ်ႉတဵမ်တူဝ် တႃႇလူတ်ႉၵႃး 3 လမ်း ၸွမ်းဢဝ်ႁူမ်ႇလူမ်ႈ ၵႂႃႇတီႈဝၢၼ်ႈႁူၺ်ႈဢူဝ်ႈ တီႈဢၼ်ၶွမ်ႊပၼီႊငူၺ်ႇၵပႃႇၵျေႃႇၶဝ်ၶုတ်းႁိၼ်ႁႄႈ- လၢတ်ႈၼႄၸုမ်းၶၢဝ်ႇ ၽူႈတွႆႇႁွၵ်ႈ ၼင်ႇၼႆ။

လိူဝ်သေၼၼ်ႉ ၽူႈဢွၼ်ႁူဝ် ၸဝ်ႈႁႆႈၸဝ်ႈၼႃး ၸၢႆးသၢမ်မူၼ်ႇ လၢတ်ႈဝႃႈ- ယွၼ်ႉပိူဝ်ႈၶဝ်ပူၼ်ႉပႅၼ် ၶေႃႈႁၢမ်ႈတၢပ်ႈလူင်ပွင်ၸိုင်ႈသေ ၶုတ်းၶမ်းယူႇတိၵ်းတိၵ်းလႄႈ တေႃႈလဵဝ်ၼႆႉ ၼမ်ႉသီးရီးၵေႃႈႁႅင်ႈယဝ်ႉ။ လိူဝ်သေၼၼ်ႉ သွင်ၽၢၵ်ႇၶၢင်ႈၼမ်ႉသီးရီး ဢၼ်မီးတီႈလိၼ်သူၼ် ႁႆႈ ၼႃး ဢေႊၵႃႊမၼ်း 300 ပၢႆၼၼ်ႉၵေႃႈ လႆႈႁႅင်ႈႁဵဝ်ႇလူႉၵွႆမူတ်းယဝ်ႉ။ ပေႃးဝႃႈၽူႈမီးဢမ်းၼၢၸ်ႈၼႂ်းပိုၼ်ႉတီႈၶဝ် တိုၵ်ႉသိုပ်ႇပၼ် ဢၼုၺၢတ်ႈ တီႈၵၢၼ်ၶုတ်းႁႄႈ တီႈႁူၺ်ႈဢူဝ်ႈၼၼ်ႉ သိုပ်ႇမီးၵႂႃႇထႅင်ႈတိၵ်းတိၵ်းတႄႉ လိူဝ်သေၼမ်ႉသီးရီးၼႆႉ ၼမ်ႉမႃႉ (မႄႈၼမ်ႉမႃႉ) ၵေႃႈတေႁႅင်ႈ၊ လိၼ်သူၼ် ႁႆႈ ၼႃးႁိမ်းႁွမ်းၼၼ်ႉၵေႃႈ တေၵွႆမူတ်း၊ ဢၼ်တေလူႉသုမ်းၼႆႉ တေမီးထႅင်ႈတင်းၼမ်တင်းလၢႆ- ဝႃႈၼႆ။

“ႁဝ်းၶႃႈၵူၼ်းဝၢၼ်ႈၵူၼ်းမိူင်း လႆႈႁၢမ်ႈႁႄႉ သၢၼ်ၶတ်းလွင်ႈတၢင်ႇႁိၼ်ႁႄႈပေႃးတၢၼ်ႇၼႆႉၵေႃႈ ၵၢၼ်ၶုတ်းႁိၼ်ႁႄႈတီႈႁူၺ်ႈဢူဝ်ႈၼႆႉ တိုၵ်းသိုပ်ႇၶုတ်းယူႇတိၵ်းတိၵ်း၊ ၶွမ်ႊပၼီႊၶဝ်တေဢၢင်ႈဢၢၼ်း ၶုတ်းႁိၼ်ႁႄႈ တၢင်ႇသူင်ႇၶၢႆတေႃႇၼွၵ်ႈမိူင်းယူႇတိၵ်းတိၵ်း၊ ယင်းပၢႆဢဝ်ၸုမ်းပီႇတုၸိတ်ႉ ယိပ်းၵွင်ႈၵၢင်ႇ မႃးဢဝ်ပၼ်လွင်ႈႁူမ်ႇလူမ်ႈၶဝ်ၸိူင်ႉၼႆၼႆႉ မၼ်းပဵၼ်ဢၼ်ၶၢမ်ႈၼႃႈၶၢမ်ႈတႃပေႃႈမႄႈၵူၼ်းမိူင်း၊ ဢမ်ႇၼပ်ႉယမ်ပေႃႈမႄႈၵူၼ်းမိူင်း”- ၸၢႆးသၢမ်မူၼ်ႇ လၢတ်ႈ။

ၵဵဝ်ႇၵပ်းလွင်ႈ ၶုတ်းႁိၼ်ႁႄႈၼႆႉ ပူၼ်ႉမႃးမိူဝ်ႈဝၼ်းတီႈ 05/09/2014 ၸဝ်ႈႁႆႈၸဝ်ႈၼႃး လႄႈၵူၼ်းမိူင်း ၸႄႈဝဵင်းၼမ်ႉၶမ်း၊ ဢဵၼ်ႁႅင်းမွၵ်ႈႁိမ်းသီႇႁဵင် (4,000) ၼႄၵၢင်ၸႂ် ႁႂ်ႈၵိုတ်းယိုတ်း လွင်ႈၶုတ်းႁိၼ်ႁႄႈ ၼႂ်းၸႄႈဝဵင်းၼမ်ႉၶမ်း။ ဝၢႆးလင်ၵၢၼ်ၼႄၵၢင်ၸႂ်ယဝ်ႉ တူဝ်ၽူႈၵွၼ်းၸႄႈဝဵင်း ဢူးၸေႃႇမိၼ်း လႆႈတႅမ်ႈလိၵ်ႈ လူင်းလၢႆးမိုဝ်းၽိုၼ်ၼိုင်ႈဝႃႈ ႁႂ်ႈၵိုတ်းဝႆႉလွင်ႈၶုတ်းႁိၼ်ႁႄႈၸူဝ်ႈၶၢဝ်း။ ဝၢႆးသေၼၼ်ႉ ဢၼ်ပဵၼ်ၽွင်းလူင် ၾၢႆႇႁိၼ်ႁႄႈ မိူင်းတႆး လုင်းၸၢႆးဢၢႆႈပဝ်းၵေႃႈ လႆႈႁွတ်ႈၽႅဝ်တီႈဝဵင်းၼမ်ႉၶမ်းသေ လႆႈလၢတ်ႈၼႄ တီႈၶွမ်ႊပၼီႊလႄႈ ပေႃႈမႄႈၵူၼ်းမိူင်းဝႃႈ- ပေႃးဢမ်ႇပႃးၵၢင်ၸႂ်ပေႃႈမႄႈၵူၼ်းမိူင်း တိုၼ်းတေဢမ်ႇပၼ်ၶုတ်း ႁိၼ်ႁႄႈလႃးလႃး- ၼႆယူႇ။

ၶေႃႈပူင်ၽူႈၵွၼ်းၸႄႈဝဵင်းၼၼ်ႉ တေႃႇထိုင်ဝၼ်းမိူဝ်ႈၼႆႉ ယင်းပႆႇလႆႈယိုတ်းထွၼ်ၶိုၼ်း၊ ၵူၺ်းၵႃႈ ၶွမ်ႊပၼီႊၶဝ်တႄႉ ၶိုင်ဢၢင်ႈမႃးတေႃႉတၢင်ႇႁိၼ်ႁႄႈ ၵႂႃႇၶၢႆၼွၵ်ႈမိူင်းထႅင်ႈယူႇ- ၼႆယဝ်ႉ။