ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း လၢတ်ႈဝႃႈ- လွင်ႈပၢင်တိုၵ်းၵူဝ်းၵၢင်ႉ ပဵၼ်ပၼ်ႁႃပၢႆးၼႂ်းၵူဝ်းၵၢင်ႉ၊ တပ်ႉသိုၵ်းမၢၼ်ႈၶဝ်ႈၸိမ်- ၸုမ်းၶၢဝ်ႇၽူႈတွႆႇႁွၵ်ႈ ႁူပ်ႉထူပ်းတွင်ႈထၢမ်ဝႆႉ ၼင်ႇၼႆ။

ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး ၸဝ်ႈယွတ်ႈသိုၵ်း

ထၢမ်- ပၢင်တိုၵ်းၵူဝ်းၵၢင်ႉ ဢၼ်ၵိူတ်ႇၶိုၼ်ႈဝူင်ႈဝၢင်ႈပူၼ်ႉမႃးၼႆႉ ၵွပ်ႈသင်လႄႈပဵၼ်ပၢင်တိုၵ်းႁၢဝ်ႈႁႅင်း၊ ထိုင်ပေႃးၸႂ်ႉၶိူင်ႈၵွင်ႈလူင်၊ ၸႂ်ႉႁိူဝ်းဝိၼ်ၸိူဝ်းၼႆႉ။ ၵွပ်ႈသင်လႄႈပဵၼ်ၸိူင်ႉၼႆ၊ ယူႇၼႂ်းထႃၼပဵၼ်သိုၵ်းမိူၼ်ၵၼ် ႁၼ်ၸႂ်ၵၼ်ၸိူင်ႉႁိုဝ်၊ ၸွင်ႇမီးၶေႃႈပိုၼ်ၽၢဝ်ႇသင်ဢွၵ်ႇမႃးၽွင်ႈၶႃႈ ?။

တွပ်ႇ-ဢၼ်ပဵၼ်ယူႇၼႂ်းၵူဝ်းၵၢင်ႉၼႆႉ ပေႃးမႃးတူၺ်းၶိုၼ်းပိုၼ်းၶဝ် တႄႇႁႅၵ်ႈမၼ်းၵေႃႈ ပဵၼ်ၶဝ်ၼင်ႇၵၼ် ႁိမ်ၵၼ်ၵူၺ်း၊ ၵူၺ်းၵႃႈ လူင်ပွင်ၸိုင်ႈသမ်ႉၶဝ်ႈၵႂႃႇၸိမ်ၸွမ်း။ ႁဝ်းၵေႃႈယူႇၵႆၵၼ် ဢမ်ႇပေႃးႁူႉၸွမ်း လွင်ႈၵၼ်တႄႉတႄႉ။ ဢၼ်ႁူႉၼႆႉ ဢၼ်ပဵၼ်မႃးမိူဝ်ႈပီ 2009 ၼၼ်ႉ ၶဝ်ၼင်ႇၵၼ်မင်ၵၼ်ၵူၺ်း။ ၶဝ်ၼင်ႇၵၼ်မင်ၵၼ်သေ မၢၼ်ႈသမ်ႉၵႂႃႇၵႄႈ၊ ၼႂ်းတိုဝ်ႉတၢင်းၵႄႈၼၼ်ႉ ၶဝ်ၵေႃႈပဵၼ်ပၢင်တိုၵ်းၵၼ် ၵိူတ်ႇၶိုၼ်ႈမႃး။ ပၢင်တိုၵ်းပွၵ်ႈၼႆႉတႄႉ မၼ်းပဵၼ်ၵၢၼ်တွပ်ႇတႅၼ်းၵၼ်ၶိုၼ်းၵူၺ်း၊ ၵွပ်ႈပိူဝ်ႈၵေႃႉၼိုင်ႈ မီးဢမ်းၼၢၸ်ႈ (ဢႃႇၼႃႇ)ဝႆႉတီႈၼၼ်ႈ၊ ၵေႃႉၼိုင်ႈသမ်ႉလႆႈသုမ်းသေ ၶိုၼ်းၵႂႃႇယိုဝ်း။ ပိုၼ်းၵူဝ်းၵၢင်ႉၼႆႉ ပႃးပွၵ်ႈၼႆႉ ႁဝ်းႁၼ်ပဵၼ်မႃးၸိူင်ႉၼႆ 3 ပွၵ်ႈယဝ်ႉ ။

ပေႃးမႃးတူၺ်း မၼ်းပဵၼ်သုၼ်ႇတူဝ်ပၢႆးၼႂ်းၶဝ်လႄႈ ႁဝ်းၵေႃႈဢမ်ႇၸၢင်ႈၵႂႃႇလၢတ်ႈၸွမ်း၊ ၶေႃႈပိုၼ်ၽၢဝ်ႇၵေႃႈ ႁဝ်းဢမ်ႇၸၢင်ႈဢွၵ်ႇ။ ဢွၼ်တၢင်းၼႆႉ 2009 ၶဝ်ႈႁွင်ႉဢဝ်သိုၵ်းမၢၼ်ႈၶဝ်ႈၵႂႃႇၵူၺ်း၊ ပေႃးဝႃႈဢဝ်သိုၵ်းမၢၼ်ႈၶဝ်ႈၵႂႃႇၵေႃႈ ၶဝ်ၵႂႃႇတွပ်ႇတႅၼ်းၶိုၼ်းသေ တပ်ႉသိုၵ်းမၢၼ်ႈၵေႃႈ ၸိုဝ်ႈသဵင်လူႉ။ ၾၢႆႇသိုၵ်းမၢၼ်ႈၵေႃႈ တႃႇတေယွမ်းပၼ်ၵေႃႈယၢပ်ႇ။ ၵွပ်ႈပိူဝ်ႈ ႁဝ်းဢမ်ႇႁူႉၸွမ်းလွင်ႈပိုၼ်းၶဝ်သေ သမ်ႉပဵၼ်လွင်ႈပၢႆးၼႂ်းၶဝ်ၵူၺ်းလႄႈ ႁဝ်းၵေႃႈဢမ်ႇၸၢင်ႈဢွၵ်ႇၶေႃႈပိုၼ်ၽၢဝ်ႇ။ ႁႂ်ႈတိုၵ်းသူၼ်းဝႃႈ ထုၵ်ႇလႆႈမႄးဢုပ်ႇဢူဝ်းၵၼ်ၼႆၵေႃႈ ႁဝ်းဢမ်ႇၸၢင်ႈတိုၵ်းသူၼ်း။

(ၶႅၼ်းတေႃႈသိုပ်ႇတိတ်းတၢမ် ၸဝ်ႈယွတ်ႈသိုၵ်း လၢတ်ႈလွင်ႈၵၢၼ်လိူၵ်ႈတင်ႈ ပီ 2015)