ႁူဝ်ပဝ်ႈ RCSS ၸဝ်ႈယွတ်ႈသိုၵ်း တွပ်ႇလၢတ်ႈ ၵဵဝ်ႇၵပ်းလွင်ႈၵဵပ်းသိုၵ်း၊ ဢၼ်ပဵၼ်လွင်ႈတိုၼ်ႇသၢၼ်ႈ တၢင်းမိူင်းၵိုင်။ မၼ်းၸဝ်ႈဝႃႈ ဝၢၼ်ႈမိူင်းဢမ်ႇမီး တပ်ႉသိုၵ်း မိူၼ်ၼိူဝ်ႉဢမ်ႇမီးလုပ်ႇ- ပႃဢမ်ႇမီးၵၢင်ႈ။ ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်ဝႆႉၼင်ႇၼႆ။

ၸုမ်းၶၢဝ်ႇၽူႈတွႆႇႁွၵ်ႈ ႁူပ်ႉထူပ်းတွင်ႈထၢမ် ၸွမ်သိုၵ်းယွတ်ႈသိုၵ်း

ထၢမ်-ၵဵဝ်ႇၵပ်းလွင်ႈၵဵပ်းသိုၵ်းၼႆႉ မိူဝ်ႈလဵဝ် ပွတ်းမိူင်းၵိုင် ၵူၼ်းမိူင်းပဵၼ်လွင်ႈတိုၼ်ႇသၢၼ်ႈၵၼ်သေ လိုဝ်းလင်ၵႂႃႇ။ လွင်ႈၼႆႉ ၸဝ်ႈၼႃႈတီႈၾၢႆႇတပ်ႉသိုၵ်း ဢမ်ႇမေႃသပ်းလႅင်းၼႄၵူၼ်းမိူင်း ဢမ်ႇမေႃသူၼ်းတုမ် ၵူၼ်းမိူင်းႁိုဝ်။ ၵဵဝ်ႇၵပ်းလွင်ႈၼႆႉ လွင်ႈတၢင်းမၼ်းပဵၼ်မႃးၸိူင်ႉႁိုဝ်၊ ထုၵ်ႇလီပဵၼ်ၸိူင်ႉႁိုဝ်ၶႃႈ ?။

တွပ်ႇ-ၼႂ်းလၵ်းၵၢၼ် (မူႇပိူင်) ႁဝ်းဝၢင်းဝႆႉၼႆႉ ၵူၼ်းမိူင်းတႆးၵူႈၵေႃႉ ဢႃႇယု 18 ၶိုၼ်ႈၼိူဝ် တေလႆႈမႃး ႁၢပ်ႇၵိုတ်ႉၵၢၼ်သိုၵ်း၊ ၵူႈၶိူဝ်းၶိူဝ်း ဢမ်ႇၵွမ်ႉၵႃႈၶိူဝ်းတႆးၵူၺ်း။ ဢၼ်ၶဝ်မိူင်းၵိုင်တႅမ်ႈလိၵ်ႈမႃးဝႃႈ တၢင်တူဝ်ၵူၼ်းမိူင်း၊ ထူပ်းတၢင်းလိူတ်ႇႁွၼ်ႉဢၼ်ဝႃႈၼႆႉ ႁဝ်းယင်းၶႂ်ႈႁူႉၵေႃႉတႅမ်ႈမၼ်းဝႃႈ မၼ်းတၢင်တူဝ်ၵူၼ်းမိူင်းတႄႉယူႇႁႃႉ၊ ပေႃးဝႃႈတၢင်တူဝ်ၵူၼ်းမိူင်း ထူပ်းလွင်ႈလိူတ်ႇႁွၼ်ႉတႄႉယူႇ ဢမ်ႇတၢပ်ႈ (လူဝ်ႇ)မီးတပ်ႉသိုၵ်းၼႆတႄႉ မၼ်းဢမ်ႇယၢပ်ႇသေဢိတ်း၊ ႁဝ်းႁႂ်ႈၶဝ်မိူဝ်းႁိူၼ်းမူတ်းၵေႃႈလႆႈ၊ တပ်ႉသိုၵ်းၼႆႉဢမ်ႇမီးၵေႃႈလႆႈ။ ၵူၺ်းၵႃႈ ပိူင်ႁဝ်းၼႆႉ ဢႃႇယု 18 ၶိုၼ်ႈၼိူဝ် တေလႆႈႁၢပ်ႇၵၢၼ်ၸိူဝ်ႉၸၢတ်ႈ ၵူႈၵေႃႉ။

ၵူၺ်းၵႃႈ ႁၢပ်ႇၵၢၼ်ၸိူဝ်ႉၸၢတ်ႈၼႆႉ ပိူင်ႁဝ်းမီးဝႆႉ 5 ပီ။ ပေႃးဝႃႈၵူၼ်းမိူင်းတႆးႁဝ်း ပွင်ႇၸႂ်သေၶဝ်ႈမႃးႁၢပ်ႇၵိုတ်ႉ ၵၢၼ်သိုၵ်း ႁင်းၵူၺ်းၼႆ ၼႂ်း 5 ပီၼႆႉ ၶႂ်ႈႁဵတ်း 2 ပီဢွၼ်တၢင်းၵေႃႈလႆႈ၊ ၶႂ်ႈႁဵတ်း 3 ပီၵေႃႈလႆႈ။ ၵွပ်ႈပိူဝ်ႈပုၼ်ႈၽွၼ်းၵူႈၵေႃႉလႄႈ တီႈတႄႉမၼ်း ႁဝ်းဢမ်ႇတၢပ်ႈၵႂႃႇၵဵပ်း။ ၵူၼ်းမိူင်းတႆးၵူႈၵေႃႉၼႆႉ ႁဝ်းတေလႆႈ ႁၢပ်ႇၵၢၼ်ၸိူဝ်ႉၶိူဝ်းႁဝ်း၊ ပုၼ်ႈတႃႇတပ်ႉသိုၵ်းႁဝ်း၊ ဝၢၼ်ႈမိူင်းဢမ်ႇမီးတပ်ႉသိုၵ်း မိူၼ်ၼိူဝ်ႉဢမ်ႇမီးလုပ်ႇ ပႃဢမ်ႇမီးၵၢင်ႈ။

ပေႃးဝႃႈတႄႉတႄႉမၼ်း ႁဵတ်းသင်လႄႈမိူင်းတႆးႁဝ်း ပဵၼ်မႃးၸိူင်ႉၼႆ၊ ၵွပ်ႈပိူဝ်ႈၸဝ်ႈၾႃႉႁဝ်း ဢမ်ႇႁၢင်ႈႁႅင်းသိုၵ်းဝႆႉ တႃႇၵႅတ်ႇၶႄၸိူဝ်ႉၸၢတ်ႈဝၢၼ်ႈမိူင်း၊ ပိူၼ်ႈၵေႃႈဢဝ်လွင်ႈတၢင်းသေ ၶိုၼ်ႈမႃးငၢႆႈငၢႆႈ၊ လွင်ႈၼႆႉၽႂ်ၽႂ်ၵေႃႈႁူႉၵၼ်။ ၸင်ႇဝႃႈၵမ်းၼႆႉ ႁဝ်းၵေႃႈဝႆႉပိူင်။ မိူၼ်ၼင်ႇမိူင်းထႆးၼႆႉ 2 ပီၶိုင်ႈ ပိူၼ်ႈမႃးႁၢပ်ႇၵိုတ်ႉၼႃႈၵၢၼ်ၶွင်ပိူၼ်ႈ၊ သွၼ်ၵၢၼ်ယဝ်ႉပွၵ်ႈမိူဝ်းႁိူၼ်း၊ ပေႃးဢမ်ႇလႆႈႁဵတ်းသိုၵ်းၼႆႉ ၶိင်းၵၢင်ႉ ၶိင်းႁဵင် ၵူၼ်းႁဵတ်းၵၢၼ်မိူင်းၵေႃႈဢမ်ႇလႆႈပဵၼ်လူး၊ မိူင်းပိူၼ်ႈ ပိူၼ်ႈႁဵတ်းဝႆႉ။ ႁဝ်းၵေႃႈၶႂ်ႈႁႂ်ႈမၼ်းမီးပၵ်းပိူင် ၸိူင်ႉၼၼ်။

ထၢမ်-မၢင်ပိုၼ်ႉတီႈၼႆႉ မၼ်းယူႇတိတ်းၸပ်းၼႃႈလိၼ်လၢႆၾၢႆႇ၊ ပွတ်းႁွင်ႇၵေႃႈၵဵပ်း ပွတ်းၸၢၼ်းၵေႃႈၵဵပ်း၊ ၶဝ်သမ်ႉယူႇဝူင်ႈၵၢင်မၼ်းၸိူဝ်းၼႆႉ။ ၵမ်ႈၽွင်ႈသမ်ႉ ယူႇတိတ်းၸပ်းပီႈၼွင်ႉပဢူဝ်းၶဝ်၊ ပေႃးၼၼ် သိုၵ်းပဢူဝ်းၵေႃႈတေလႆႈႁဵတ်း သိုၵ်းတႆးၵေႃႈတေလႆႈႁဵတ်းႁႃႉ၊ ဢၼ်တိတ်းတၢင်းပွတ်းႁွင်ႇၵေႃႈ ၶၢင်ႁႃႉၸိူဝ်းၼႆႉ။ လွင်ႈၸိူဝ်းၼႆႉ မၢင်ၵေႃႉၵေႃႈထၢမ်မႃးဝႃႈ- ႁဝ်းၶႃႈတေလႆႈႁဵတ်းႁိုဝ်၊ တၢင်းသိုၵ်းတႆးၵေႃႈ တေလႆႈႁဵတ်း၊ ထႅင်ႈၾၢႆႇၼိုင်ႈၵေႃႈ တေလႆႈႁဵတ်းၼႄႇ၊ လွင်ႈၸိူဝ်းၼႆႉ မီးလွၵ်းလၢႆးၵႄႈလိတ်ႈ ၸိူင်ႉႁိုဝ်ၶႃႈ ?။

တွပ်ႇ- လွင်ႈၼႆႉ ႁဝ်းဝၢင်းဝႆႉပိူင် ပိူဝ်ႈတႃႇမိူင်းတႆးပတ်းပိုၼ်ႉ၊ ဢမ်ႇၸႂ်ႈဝႃႈတွၼ်ႈလႂ်တွၼ်ႈၼၼ်ႉၵူၺ်း။ မိူင်းတႆးပတ်းပိုၼ်ႉၼႆႉ တေလႆႈမႃးပဵၼ်တပ်ႉသိုၵ်း ဢၼ်လဵဝ်ၵၼ်ၵူၺ်း။ မိူၼ်ၼင်ႇ ၸုမ်းပွတ်းႁွင်ႇ SSPP/SSA တင်းႁဝ်းၼႆႉ မၼ်းပဵၼ်ၵၢၼ်ႁဝ်း ထုၵ်ႇလီ (လူဝ်ႇ) လႆႈႁူမ်ႈၵၼ်ၵူၺ်း။ ႁဵတ်းတၢင်းလႂ်ၵေႃႈယဝ်ႉ ပဵၼ်ၵၢၼ်တပ်ႉသိုၵ်း ၵၢၼ်ႁဝ်းတေလႆႈမႃးႁူမ်ႈၵၼ်ၵူၺ်း။
ထၢမ်-မိူၼ်ၼင်ႇၵူၼ်းၵေႃႉၼိုင်ႈ လႆႈမႃးႁၢပ်ႇၵၢၼ်သိုၵ်းတၢင်းၼႆႉ (ပွတ်းၸၢၼ်း) ယဝ်ႉၵေႃႈ ယဝ်ႉယဝ်ႉၶႃႈႁႃႉ ?။

တွပ်ႇ-ယဝ်ႉယဝ်ႉ၊ တေလႆႈမီးၶႅပ်းဝႂ်ၽၢၼ်ႇသိုၵ်း။ ႁဝ်းၼႆႉ ပေႃးဝႃႈႁဵတ်းသိုၵ်း 5 ပီ ပေႃးၵိုတ်းလိုဝ်ႈမိူဝ်းၵႂႃႇ ယဝ်ႉၼႆၵေႃႈ ႁဝ်းပၼ်ၶႅပ်းဝႂ်ယဝ်ႉ။ ပေႃးႁဝ်းပၼ်ဝႂ်ယဝ်ႉ ပွတ်းႁွင်ႇၵေႃႈဢမ်ႇတၢပ်ႈၵဵပ်းယဝ်ႉ။ ပွတ်းႁွင်ႇၵေႃႈ ပေႃးဝႃႈပၼ်ဝႂ်ယဝ်ႉ ႁဝ်းၵေႃႈဢမ်ႇတၢပ်ႈၵဵပ်းယဝ်ႉ။

ၵမ်းၼႆႉ မိူၼ်ၼင်ႇၸၢဝ်းပဢူဝ်း ပလွင်ႈၸိူဝ်းၼႆႉၵေႃႈ ပဵၼ်ၵူၼ်းမိူင်းတႆးၼင်ႇၵဝ်ႇ။ ၶဝ်ၵေႃႈမီးတပ်ႉသိုၵ်း ႁင်းၶဝ်၊ ပုၼ်ႈတႃႇတပ်ႉသိုၵ်းတေႃႇတပ်ႉသိုၵ်း တေႁူမ်ႈၵၼ်ၼႆႉ လွင်ႈၼႆႉမၼ်းပဵၼ်ၵၢၼ်ႁဝ်း။ ပေႃးဝႃႈႁဵတ်းသိုၵ်းပလွင်ႈ (တဢၢင်း)ယဝ်ႉၼႆၵေႃႈ ႁဝ်းၵေႃႈဢမ်ႇၵႂႃႇယုင်ႈယဝ်ႉ၊ ႁဵတ်းသိုၵ်းပဢူဝ်းယဝ်ႉၼႆၵေႃႈ ႁဝ်းၵေႃႈဢမ်ႇၵႂႃႇယုင်ႈယဝ်ႉ၊ ၵူၺ်းၵႃႈ တေလႆႈမီးဝႂ်။ ပေႃးဢမ်ႇမီးဝႂ်ၽၢၼ်ႇသိုၵ်းၵေႃႈ ႁဝ်းၵေႃႈတိုၼ်းဢဝ်ယူႇ။ ၸုမ်းလႂ်ၸုမ်းၼၼ်ႉၵေႃႈ ထုၵ်ႇလီဢွၵ်ႇဝႂ်ၽၢၼ်ႇသိုၵ်းပၼ်။

သင်ဝႃႈႁဝ်းၵူႈၸုမ်းမႃးႁူမ်ႈၵၼ်ယဝ်ႉၼႆၵေႃႈ ၵဵပ်းတီႈလဵဝ်ၵူၺ်းယဝ်ႉ။ ပိူင်ႁဝ်းၼႆႉဝႆႉ 5 ပီ၊ ပေႃးႁဝ်းမႃး ႁူမ်ႈၵၼ်မူတ်း ႁဝ်းတေလႆႈဝၢင်းပိူင်မႂ်ႇဝႃႈ ႁဝ်းတေဝႆႉလၢႆပီ တေမီးမႃးထႅင်ႈ။

(ၶႅၼ်းတေႃႇသိုပ်ႇတိတ်းတၢမ် ၸဝ်ႈယွတ်ႈသိုၵ်း လၢတ်ႈလွင်ႈပၢင်တိုၵ်း ဢၼ်ၵိူတ်ႇၶိုၼ်ႈၼႂ်းၼႃႈလိၼ်ၵူဝ်းၵၢင်ႉ)