ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ၸတ်းပၢင် ဢုပ်ႇလွင်ႈ ၽႃးသႃယူႊၼီႊၶူတ်ႉ (Wikipedia Unicode) ၼိမၼ်တၼ ၸဝ်ႈသုၶမ်းမႃးၸီႉၸႅင်ႈတီႈ ဝတ်ႉၵူႇတဝ်ႈ။

ၸဝ်ႈသုၶမ်း

လူၺ်ႈလွင်ႈၼႆႉသေ ပေႃးထိုင်မႃးဝၼ်းတီႈ 28/01/2015 ၼႆ တၢင်းၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ တေၸတ်း ပၢင်ၸီႉၸႅင်ႈ ၽႃးသႃယူႊၼီႊၶူတ်ႉ (Wikipedia Unicode) တီႈသႃလႃးပၢႆလႅမ် ဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းမိူင်း ၸႄႈတွၼ်ႈၵဵင်းမႆႇ ဝႃႈၼႆ ဢွၵ်ႇလိၵ်ႈပိုၼ်ၽၢဝ်ႇဝွၵ်ႇၸိူၼ်း ၽူႈၶဝ်ႈႁူမ်ႈမႃးၼင်ႇၼႆ။

ပိုၼ်ၽၢဝ်ႇ ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ

ၸဝ်ႈၶူးသုၶမ်းတေမႃးၸီႉၸႅင်ႈၼႄၽႃးသႃယူႊၼီႊၶူၼ်ႉ (Wikipedia Unicode)
ၼႂ်းဝၼ်းတီႈ 28 လိူၼ်ၵျႅၼ်ႊၼိဝ်ႊရီႊၼႆႉ ၸဝ်ႈသုၶမ်းတေမႃးၸီႉၸႅင်ႈၼႄ ၽႃးသႃယူႊၼီႊၶူၼ်ႉ (Wikipedia Unicode) ပိူဝ်ႈတႃႇပီႈၼွင်ႉတႆးႁဝ်း ၽူႈသူၼ်ၸႂ်ၸႂ်ႉတိုဝ်းၾွၼ်ႉလိၵ်ႈတႆး ယူႊၼီႊၶူတ်ႉ(Unicode) ဢမ်ႇဝႃႈၼႂ်း ၶမ်ႊပိဝ်ႊတိူဝ်ႊ ႁိုဝ် ၾူၼ်ႊမိုဝ်းတိုဝ် (Computer, Mobile Phone) ၼိူဝ်ၼႅင်ႈၶိူဝ်းၶၢႆႇၸိူဝ်းၼႆႉ ၸင်ႇလႆႈဝွၵ်ႇၸိူၼ်း ပီႈၼွင်ႉႁဝ်းၶဝ်မႃးၶဝ်ႈႁူမ်ႈထွမ်ႇၼႆဢေႃႈ။

မိူဝ်ႈလဵဝ်ပဵၼ်ပၢၼ်ဢၼ်ၶဝ်ႈသူႇၼႂ်းၵၢပ်ႈ ဢၢႆႊထီႊ IT လႄႈၸႂ်ႉတိုဝ်းၽႄႈမၢၵ်ႈလၢႆ ၼႂ်းၵၢပ်ႈပၢၼ်သၢႆၸႂ်မႂ်ႇ ၵိုၵ်းမိုဝ်ႉ ၵိုၵ်းဝၼ်းတိတ်းယိၼ်ႉၵႂၢင်ႈၶႂၢင်ၸွတ်ႇတူဝ်ႈ ၼႂ်းၸူဝ်ႈၸၢတ်ႈၼုမ်ႇႁၢႆးၸၢႆးယိင်းပၢၼ်မႂ်ႇ  ဢိၵ်ႇတင်းပဵၼ်ၽွင်းႁိပ်ႈၼႅတ်ႈ ၶႄႉၶႅင်ႇၶၢဝ်းယၢမ်းၵၼ်ၵူႈမိုဝ်ႉၵူႈဝၼ်းလႄႈ ၽႂ်ဢမ်ႇၼႅတ်ႈတၼ်းၵေႃႈတေတူၵ်းလိုၼ်းၵႂႃႇ တိၵ်းတိၵ်းယဝ်ႉ။

လိူဝ်ၼၼ်ႉ ၼႂ်းၵူၼ်းၶိူဝ်းတႆးႁဝ်းၵေႃႈ ၵမ်ႈၽွင်ႈ ယင်းတိုၵ်ႉၵႂင်ပူၵႂင်ပႃ ဢမ်ႇႁူႉတေၸႂ်ႉၾွၼ်ႉလိၵ်ႈတႆးဢၼ်လႂ် တႅမ်ႈတိတ်းတေႃႇၵပ်းသၢၼ်ၵၼ် ၼႂ်းၶွမ်ႊပိဝ်ႊတိူဝ်ႊ ႁိုဝ် ၾူၼ်ႊမိုဝ်းတိုဝ် (Computer, Mobile Phone) ၼိူဝ်ၼႅင်ႈ ၶိူဝ်းၶၢႆႇ (ဢွၼ်ႊလၢႆႊ) သၢၼ်ၵွင်ႉဢၼ်ထုၵ်ႇၸွမ်းပိူင်ၾိင်ႈ လၵ်းၸဵင်ၾွၼ်ႉလိၵ်ႈ (Unicode) ဢၼ်ၵႅၼ်ႇၸိုင်ႈ မၵ်းမၼ်ႈပၼ်တီႈယူႇ (မၵ်းမၢႆ) ၶွင်ၶိူဝ်းၵူၼ်းၽႂ်မၼ်းလႂ်ၸိူဝ်းၼႆႉ။

ၸိူင်ႉႁိုဝ်ၵေႃႈလီ ၸဝ်ႈသုၶမ်း ဢၼ်ပဵၼ်ၽူႈႁၵ်ႉပႅင်းလိၵ်ႈလၢႆးတႆးႁဝ်းသေ ၶတ်းၸႂ် ၶိုင်ႁႃႁႂ်ႈပိူၼ်ႈၸွႆႈႁဵတ်းဢွၵ်ႇ ၾွၼ်ႉ လိၵ်ႈတႆး ၵျေႃႇၵျီႇ  ပိူဝ်ႈတႃႇႁႂ်ႈတႆးပေႃးလႆႈၸႂ်ႉတိုဝ်းၼိူဝ်ၼႅင်ႈၶိူဝ်းၶၢႆႇ (ဢွၼ်ႊလၢႆႊ) ၶွမ်ႊပိဝ်ႊတိူဝ်ႊ ႁိုဝ် ၾူၼ်ႊ မိုဝ်းထိုဝ် (Computer, Mobile Phone) မိူၼ်ပိူၼ်ႈ။ လွင်ႈဝႃႈ ဢၼ်ႁဵတ်းဢွၵ်ႇ ၾွၼ်ႉၵျေႃႇၵျီႇၼၼ်ႉ ဢမ်ႇၸႂ်ႈ ယူႊၼီႊၶူတ်ႉၼႆ လိုၼ်းဝၢႆးၼႆႉ မၼ်းၸဝ်ႈၵေႃႈႁူႉယဝ်ႉလႄႈႁဵၵ်ႈႁွင်ႉ ႁႂ်ႈပီႈၼွင်ႉတႆးႁဝ်းဢွၼ်ၵၼ် ၸႂ်ႉတိုဝ်းၾွၼ်ႉတႆး ယူႊၼီႊၶူတ်ႉၵႂႃႇၼႆၵေႃႈလႆႈတွပ်ႇလၢတ်ႈ ယိုၼ်ႈယွၼ်းၵႂႃႇ ၼႂ်းၶေႃႈတွင်ႈထၢမ် တင်းၸုမ်းၶၢဝ်ႇၽူႈတွႆႇႁွၵ်ႈၼၼ်ႉယဝ်ႉ။

လူၺ်ႈလွင်ႈၼႆႉသေ ဝၢႆးသေမၼ်းၸဝ်ႈလႆႈမႃးၻေးသၼႃးထမ်း (ႁေႃးတြႃး) ၵႂႃႇမိူဝ်ႈၶမ်ႈဝၼ်းတီႈ 22/01/2015 ယဝ်ႉ မၼ်းၸဝ်ႈၸင်ႇယွမ်းသဵင်ႈၶၢဝ်းယၢမ်းသေ တေဝႄႉမႃးပၼ်တၢင်းႁူႉ ၵဵဝ်ႇလွင်ႈၽႃးသႃယူႊၼီႊၶူတ်ႉ (Wikipedia Unicode) ၼႂ်းၶမ်ႈဝၼ်းတီႈ 28 ၼႆႉထႅင်ႈၵမ်းၼိုင်ႈ။

ၾၢႆႇၼိုင်ႈ ဝၼ်းတီႈ 28/01/2015 တေထိုင်ၼႆႉ တၢင်းလွႆတႆးလႅင်းၵေႃႈ လႆႈႁပ်ႉမွပ်ႈ ပိတၵၢတ်ႈသၢမ်ၵွင် (ထမ်းမၽိၻူၵ်ႇ) ဢၼ်မူလၼိထိၾႃႉၸဝ်ႈပီႈၼၢင်းၸဝ်ႈႁေႃၶမ်း လႆႈပိၼ်ႇတႅမ်ႈ ပဵၼ်ၾၢႆႇတႆး ၾၢႆမိူင်း ၾၢႆႇလၢဝ်း ၾၢႆႇမၢၼ်ႈ ဢိၵ်ႇတင်း လၢႆၽႃးသႃလႄႈဢဝ်ၾွၼ်ႉယူႊၼီႊၶူတ်ႉၽိမ်းဝႆႉၼၼ်ႉ ယဝ်ႉတူဝ်ႈဝၢႆးၸဝ်ႈမုၼ်ယႂ်ႇႁေႃၶမ်းထႆး လူင်းလၢႆးမိုဝ်းႁပ်ႉႁွင်း သူင်ႇမႃးမွပ်ႈပၼ်တီႈလွႆတႆးလႅင်း။

ၶပ်ႉမၢႆၵၢၼ်
ဝၼ်းတီႈ    28/01/2015 (ၶမ်ႈဝၼ်းပုတ်ႉ)
ၶၢဝ်းယၢမ်း    18.00 - 21.00မူင်း
ဢွင်ႈတီႈ    သႃလႃးပၢႆလႅမ် ဝတ်ႉၵူႇတဝ်ႈ
ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ