ၶွင်ႊသီႊဢဝ်ၶိုၼ်းၸိုင်ႈတႆး လူင်းပိုၼ်ႉတီႈၵူတ်ႇသွၵ်ႈ တီႉၺွပ်း ယႃႈမဝ်းၵမ်၊ ပဵၼ်ပၢင်တိုၵ်းၵၼ် တင်း ၸုမ်းပီႇတုၸိတ်ႉဝၢၼ်ႈပၢင်ႇ၊ သိုၵ်းမၢၼ်ႈသူင်ႇႁႅင်း ၵမ်ႉၸွႆႈ၊ ၵူၺ်းၵႃႈ ၶိုၼ်းထွၼ်တပ်ႉ ပွႆႇႁႂ်ႈတႆးၼင်ႇၵၼ် ယိုဝ်းၵၼ်။

တပ်ႉသိုၵ်းၸိုင်ႈတႆး (RCSS/SSA) တူင်ႉၼိုင်ၵၢၼ်သိုၵ်း တီႈငဝ်ႈၸိုင်ႈလွႆတႆးလႅင်း

ပူၼ်ႉမႃးမိူဝ်ႈဝၼ်းတီႈ 20/01/2015 ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၵႂႃႇတီႉၺွပ်းၵူၼ်းၵိၼ်ယႃႈ ပွတ်းဝၢၼ်ႈၼွင်လူမ်ႇ ဢိူင်ႇတၢတ်ႇမွၵ်ႇ ၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း၊ ၵႂႃႇၽႃႇႁူပ်ႉၺႃးၵၼ်တင်း ၸုမ်းပီႇတုၸိတ်ႉ ဝၢၼ်ႈပၢင်ႇ (တပ်ႉၸုမ်း 758 ) သေ လႆႈပိုတ်းယိုဝ်း ပဵၼ်ပၢင်တိုၵ်းၵၼ် ပွတ်းဝၢၼ်ႈႁူဝ်လူမ်း တၢတ်ႇမွၵ်ႇ ၼွင်လူမ်ႇ ၸိူဝ်းၼႆႉ။

ယွၼ်ႉသွင်ၾၢႆႇပဵၼ်ပၢင်တိုၵ်းၵၼ်သေ သိုၵ်းမၢၼ်ႈ တပ်ႉပိဝ်ႇႁႃႇလၢႆးၶႃႈ လႆႈသူင်ႇႁႅင်းသိုၵ်း 2 ငႃးသိုၵ်း ၵႂႃႇထႅမ်ႁႅင်း ၸုမ်းပီႇတုၸိတ်ႉ 758 ၊ ထိုင်မႃးဝၼ်းတီႈ 21/01/2015 လႆႈပဵၼ်ပၢင်တိုၵ်းၵၼ်လၢႆပွၵ်ႈလၢႆၵမ်း တင်းဝၼ်း။ ပၢင်တိုၵ်းပွၵ်ႈၼႆႉ လႆႈႁူႉဝႃႈ တၢင်းၾၢႆႇသိုၵ်းမၢၼ်ႈတၢႆ 5 ၵေႃႉ။ ၾၢႆႇတပ်ႉသိုၵ်းၸိုင်ႈတႆး (RCSS/SSA) ၸၼ်ႉႁူဝ်ႁၢၼ် တူၵ်းသုမ်းၵႂႃႇၵေႃႉၼိုင်ႈလႄႈ သုမ်းၵွင်ႈလဝ်းၼိုင်ႈ- ၶၢဝ်ႇဢမ်ႇယိုၼ်ယၼ် လၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈလၢတ်ႈဝႃႈ- သၢႆပီႇတုၸိတ်ႉ 758 ပွမ်တူဝ်သိုၵ်းမၢၼ်ႈမႃးလႄႈ ဢၼ်ယိုဝ်းၵၼ်သေ ၾၢႆႇသိုၵ်းမၢၼ်ႈတူၵ်းသုမ်းၵႂႃႇ 5 ၵေႃႉၼၼ်ႉ ပဵၼ်ပီႇတုၸိတ်ႉၵူၺ်း။ ပေႃးပဵၼ်သိုၵ်းမၢၼ်ႈတႄႉတႄႉ ၾၢႆႇသိုၵ်းမၢၼ်ႈၶဝ်တိုၼ်း တေဢမ်ႇယွမ်းငၢႆႈငၢႆႈ- ဝႃႈၼႆ။

ထိုင်မႃးဝၼ်းတီႈ 23/01/2015 ၽူႈၵွၼ်းၽႅၼ်ၵၢၼ်လၢႆးတိုၵ်း (ပိဝ်ႇႁႃႇမူး) လၢႆးၶႃႈ ၸႂ်ႉထွၼ်ၶိုၼ်းငႃးသိုၵ်း ဢၼ်သူင်ႇႁႅင်းသိုၵ်းၵႂႃႇထႅမ်ႁႅင်း ပီႇတုၸိတ်ႉၸိူဝ်းၼၼ်ႉတင်းမူတ်း။ ပိဝ်ႇႁႃႇမူးလၢတ်ႈဝႃႈ- ႁွင်ႉၶဝ်ၶိုၼ်းမႃးမူတ်းမူတ်း၊ ဢၼ်ၶဝ်ယိုဝ်းၵၼ်ၼၼ်ႉၵေႃႈ ၶဝ်ပဵၼ်တႆးၼင်ႇၵၼ်ၵူၺ်း၊ ပၼ်တႆးၶဝ်ၼင်ႇၵၼ် ယိုဝ်းၵၼ်ၶႃႈႁႅမ်ၵၼ်သေလႃႈ- ဝႃႈၼႆ။

ဢိင်ၼိူဝ်သွင်ၾၢႆႇပဵၼ်ပၢင်တိုၵ်းၵၼ်သေ ၵူၼ်းဝၢၼ်ႈၼႂ်းပိုၼ်ႉတီႈ ဢွၼ်ၵၼ်တူၵ်းၸႂ်လႂ်တိုၼ်ႇ၊ ႁႅၼ်းၶူဝ်းႁႅၼ်းလဵင်း ဢဝ်ၶဝ်ႈဢဝ်ၼမ်ႉသေ ဢွၼ်ၵၼ်ပၢႆႈၵႂႃႇတၢင်းဝဵင်းလၢႆးၶႃႈ။

ၽွင်းတႅၼ်းသၽႃး ပႃႊတီႊႁူဝ်သိူဝ် ၸၢႆးၵျေႃႇၸေႇယ ဝဵင်းလၢႆးၶႃႈၵေႃႈ ၵႂႃႇႁူပ်ႉၵူၼ်းပၢႆႈၽေးသေ ပၼ်ႁႅင်းၸႂ်။

ၸၢႆးၵျေႃႇၸေႇယ လၢတ်ႈဝႃႈ- လႆႈငိၼ်းၶၢဝ်ႇဝႃႈ ပဵၼ်ပၢင်တိုၵ်းၵၼ်၊ ပဵၼ်ႁိုဝ်တႄႉတႄႉၼၼ်ႉ တိုၵ်းၸွပ်ႇထၢမ်တူၺ်းယူႇ။ ၵူၺ်းၵႃႈ လႆႈႁၼ်ၵူၼ်းဝၢၼ်ႈပၢႆႈၶဝ်ႈဝဵင်းလႄႈ လႆႈၵႂႃႇႁူပ်ႉထူပ်းၶဝ်သေ ပၼ်ႁႅင်းဝႃႈ ဢမ်ႇထုၵ်ႇလီပၢႆႈ။ ပေႃးႁဝ်းပၢႆႈပႅတ်ႈဝၢၼ်ႈသူၼ်ႁဝ်းၵေႃႈ ပိူၼ်ႈတေမႃးပုတ်ႈယူႇတႅၼ်း၊ ဝၢႆးမႃးႁဝ်းတေဢမ်ႇမီးတီႈယူႇ- လႆႈၵႂႃႇပၼ်ႁႅင်းၶဝ်ၸိူင်ႉၼၼ်- ဝႃႈၼႆ။

ဝၢၼ်ႈၼွင်လူမ်ႇ မီးၸဵင်ႇႁွင်ႇဝၼ်းဢွၵ်ႇ ဝဵင်းလၢႆးၶႃႈ။ ၼႂ်းဢိူင်ႇတၢတ်ႇမွၵ်ႇ မီးဝၢၼ်ႈၼွင်လူမ်ႇ၊ ဝၢၼ်ႈႁူဝ်လူမ်း၊ ဝၢၼ်ႈၵုၼ်ႁုင်း ၸိူဝ်းၼႆႉ။ ဝၢၼ်ႈၵူၼ်းၸိူဝ်းၼႆႉ ပဵၼ်ဝၢၼ်ႈဢၼ်ၺႃးၽေးသိုၵ်းမၢၼ်ႈ ႁူမ်ႈၸုမ်းပီႇတုၸိတ်ႉ ဢဝ်ၾႆးၽဝ်မိူဝ်ႈပီ 2009 ။