ၸဝ်ႈသုၶမ်း ႁေႃးထမ်းတြႃးတီႈၵဵင်းမႆႇ မီးပီႈၼွင်ႉတႆး ၶဝ်ႈႁူမ်ႈထွမ်ႇငိၼ်း ၵိုၼ်းၶွၼ်ႈၼမ်



ၸဝ်ႈသုၶမ်း (တၢင်ႉယၢၼ်း) ၽူႈလူင်ႉလႅၼ်ႇ ၵတ်ႉၶႅၼ်ႇ လွင်ႈႁေႃးထမ်း/တြႃး ယေႃးတူဝ် ႁေႃးထမ်း တီႈဝတ်ႉၵူႇတဝ်ႈ ဝဵင်းၵဵင်းမႆႇ။ မီးပီႈၼွင်ႉတႆး ၼႂ်းၵဵင်းမႆႇ ၶဝ်ႈႁူမ်ႈထွမ်ႇငိၼ်း တဵမ်ဝတ်ႉဝႃး။

ၽွင်းၸဝ်ႈသုၶမ်း ႁေႃးထမ်းတြႃး တီႈဝတ်ႉၵူႇတဝ်ႈ ၵဵင်းမႆႇ ပၼ်တၵ်ႉၵႃႇသတ်ႉထႃး ပီႈၼွင်ႉတႆး
ၶမ်ႈၶိုၼ်းဝၼ်းတီႈ 22/01/2015 ၸဝ်ႈသုၶမ်း ႁိုဝ် ၸဝ်ႈသုၶမိၼ်ႇတ (တၢင်ႉယၢၼ်း) တၵ်ႉၵသီလ မႁႃထမ်မႃၸရိယ (M.A. Buddhism, M.A. kalaniya Srilanka) မႁႃၵမ်မ ထႃၼႃၸရိယ ၊ ၸဝ်ႈၽူႈပိုၼ်ၽႄႈသႃသၼႃ သၼ်လွႆ မိူင်းတႆး၊ ယေႃးတူဝ်ႁွတ်ႈထိုင် တီႈဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းမိူင်းၵဵင်းမႆႇ ၸိုင်ႈထႆး။ ႁေႃးထမ်း/တြႃးပၼ် ပီႈၼွင်ႉတႆး၊ မီးပီႈၼွင်ႉတႆး ၸိူဝ်းတူၵ်းႁွတ်ႈမိူင်းထႆး၊ ပေႃႈသိလ်မႄႈသိလ်၊ ၽူႈယႂ်ႇၵူၼ်းလူင်ၼႂ်းတႆး ၶဝ်ႈႁူမ်ႈထွမ်ႇငိၼ်းတင်းၼမ်တင်းလၢႆ။
ၽွင်းတၵ်ႉၵႃႇသတ်ႉထႃး ႁပ်ႉတွၼ်ႈၸဝ်ႈသုၶမ်း
ႁူဝ်ၶေႃႈထမ်းတြႃး ဢၼ်ၸဝ်ႈႁေႃးၵႂႃႇၼၼ်ႉ ၸိုဝ်ႈဝႃႈ 1 2 3…..။ မီးတီႈပွင်ႇၵူႈၸိူဝ်ႉၵူႈလွင်ႈ ဢၼ်ၵဵဝ်ႇၶွင်ႈတင်း ၵူၼ်းႁဝ်းၵူႈၵေႃႉ 1.ဢႃႁႃရ (တၢင်းၵိၼ်)။ 2.ရုပ်ႈ ၼၢမ်ႇ (တူဝ် ၸႂ်)။ 3.ဝေတၼႃ 3 ပိူင်။ 4.သၸ်ႉၸႃႇ 4 ပိူင်။ 5.ၶၼ်ႇထႃႇ 5 ပိူင်။ 6.ဢႃယတၼ 6 ပိူင်။ 7.ပွတ်ႉၸင်ႇၵ 7 ပိူင်။ 8.မၵ်ႉၵ 8 ပိူင်။ 9.ၽူမိ 9 ၽူမိ (ၶူင်းၵဝ်ႈၶူင်း)။ 10.ၵုၼ်းမုၼ်ၸဝ်ႈဢရႁၼ်တႃ 10 ပိူင်- ၸိူဝ်းၼႆႉယဝ်ႉ။

ၽွင်းၸဝ်ႈသုၶမ်း တိုၵ်ႉႁေႃးထမ်း/တြႃး
ၼွၵ်ႈသေၼၼ်ႉ ၸဝ်ႈသုၶမ်း ယင်းၼမ်းဢဝ် ဝၼ်းလီ ဝၼ်းႁၢႆႉ ၸွမ်းၼင်ႇၾိင်ႈယုမ်ႇယမ်တႆး မိူၼ်ၼင်ႇ မႂ်ႇသွင်လွင်ႈသီႇ၊ သီႇပဝ်ႇၵဝ်ႈႁၢမ်း၊ သိပ်းဢမ်ႇလီၶဝ်ႈ- ၵဝ်ႈဢမ်ႇလီဢွၵ်ႇၸိူဝ်းၼႆႉ လၢတ်ႈၼႄတူဝ်ယၢင်ႇ ဢၼ်ဝၢၼ်ႈမိူင်းၶိုၼ်ႈယႂ်ႇသေ ႁႂ်ႈပီႈၼွင်ႉတႆးၶတ်းၸႂ်ႁဵတ်းၵၢၼ်။ ႁဵတ်းၵၢၼ်ၼႆႉ ဢမ်ႇတၢပ်ႈတူၺ်းမိုဝ်ႉဝၼ်းလီ ဢမ်ႇလီ၊ ပေႃးၵုမ်ႇမိုင်ႉပႂ်ႉဝၼ်းလီ ၵၢၼ်တူဝ်ၵဝ်ႇၸၢင်ႈလုတ်ႈ ၸၢင်ႈႁၢမ်း ၸိူဝ်းၼႆႉ။

တီႈပၢင်ထမ်းတြႃးၼႆႉ ပီႈၼွင်ႉႁႅင်းၵၢၼ်၊ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ၊ ၸုမ်းမႄႈႁိူၼ်းၼုမ်ႇၵဵင်းမႆႇ၊ ၸုမ်းထမ်မၸၵ်ႉၵျႃႇ တႆး ၵဵင်းမႆႇ၊ လုၵ်ႈႁဵၼ်းဝတ်ႉသူၼ်ၻွၵ်ႇ ၸိူဝ်းၼႆႉၶဝ်ႈႁူမ်ႈလႄႈ ၸႃၵလဵင်ႉလူ ၶွင်ၵိၼ်ၶွင်ယႅမ်ႉ။ မီးတၢင်းၵႃႈ တၢင်းၵႃႈၼူၵ်ႉၸိူဝ်းၼႆႉ ႁပ်ႉတွၼ်ႈ ၸဝ်ႈသုၶမ်း။


ဝၢႆးပၢင်ႁေႃးထမ်း/တြႃးယဝ်ႉ တူၼ်ၸဝ်ႈ ၸဝ်ႈသုၶမ်း လႆႈယေႃးတူဝ်ၵႂႃႇယဵမ်ႈ တီႈလုမ်းၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဢၼ်မီးယူႇဝႆႉၼႂ်းဝၢင်း ဝတ်ႉၵူႇတဝ်ႈသေ ဢုပ်ႇဢူဝ်းၵၼ်တင်း ႁူဝ်ပဝ်ႈၵေႃလိၵ်ႈလၢႆး ၸၢႆးသႅင်ယ။ တူၼ်ၸဝ်ႈသုၶမ်း လႆႈတွၼ်ႈႁွမ်းပၼ်ငိုၼ်းၵွင်ၵၢင် တႃႇၵေႃလိၵ်ႈလၢႆးလႄႈၾိင်ႈငႄႈတႆး တႃႇ 10,000 (ၼိုင်ႈမိုၼ်ႇ) ဝၢတ်ႇ။

ၸဝ်ႈသုၶမ်းၼႆႉ ပူၼ်ႉမႃးမိူဝ်ႈပီ 2010 ၵေႃႈ ယၢမ်ႈမႃးမဵတ်ႉတႃႇ ႁေႃးထမ်း/တြႃး တီႈဝတ်ႉၵူႇတဝ်ႈ ၵဵင်းမႂ်ႇယဝ်ႉပွၵ်ႈၼိုင်ႈ။ မိူဝ်ႈၼၼ်ႉ ၸိုဝ်ႈႁူဝ်ၶေႃးထမ်းတြႃးၸဝ်ႈဝႃႈ ၶဵမ်ၶဝ်ႈ- သဵမ်ဢွၵ်ႇ။ တြႃးပလေႇႁိ - ၼႆယဝ်ႉ။

ၽွင်းၸဝ်ႈတိုၵ်ႉယဵမ်ႈ လုမ်းၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ

ၽွင်းမွပ်ႈတၢၼ်းငိုၼ်းၵွင်ၵၢင် ပၼ်ၵေႃလိၵ်ႈလၢႆး




 
© 2012 All Rights Reserved | Asean Celebrity | Fonts @ AtFonts | Free Templates