ၵူၼ်းဝၢၼ်ႈ တီႉၺွပ်းပလိၵ်ႈၵႃႉယႃႈ တီႈဝဵင်း ၼမ်ႉၶမ်း



ၵူၼ်းဝၢၼ်ႈ ဢႅဝ်ႇလဵပ်ႈဢဝ်လွင်ႈႁူမ်ႇလူမ်ႈပွၵ်ႉယွမ်ႇ တီႈဝဵင်းၼမ်ႉၶမ်း ၶၢဝ်းၵၢင်ၶိုၼ်း၊ တီႉၺွပ်းလႆႈ ယႃႈမဝ်းၵမ် တီႈပလိၵ်ႈမၢၼ်ႈ၊ တီႉၺွပ်းသႂ်ႇ ထၢင်ႇတိၼ်ယဝ်ႉ မွပ်ႈပၼ်တီႈ ၸဝ်ႈၼႃႈတီႈပလိၵ်ႈ။


ပလိၵ်ႈ တဵင်းထေးဢွင်ႇ လႄႈ ၸၢႆးထုၼ်းၸၢမ်ႇ
မိူဝ်ႈၶမ်ႈၶိုၼ်းဝၼ်းတီႈ 23/01/2015 ၶၢဝ်းယၢမ်းၸမ်တဵင်ႈၶိုၼ်းၼၼ်ႉ ၵူၼ်းဝၢၼ်ႈၸိူဝ်းဢဝ်ႁူမ်ႇလူမ်ႈ ၼႂ်းပွၵ်ႉယွမ်ႇ ၵႂႃႇဢႅဝ်ႇလဵပ်ႈၼႂ်းပွၵ်ႉယွမ်ႇသေ ႁၼ်မႅၼ်ႈၵူၼ်းသွင်ၵေႃႉ လၢၵ်ႇလၢၵ်ႇလၢႆးလၢႆးဝႆႉ တီႈၼႃႈလၢၼ်ႉ (သႅင်ႇ) ၵႃႊရႃႊဢူဝ်ႊၵေႊ မူဝ်းၸိၼ်ႇၵႄႇ ၼႂ်းပွၵ်ႉၵွင်းသႃႇ ဝဵင်းၼမ်ႉၶမ်း။ ၾၢႆႇႁူမ်ႇလူမ်ႈဝၢၼ်ႈယွမ်ႇၶဝ် ႁွင်ႉဢဝ်သေတွင်ႈထၢမ်တူၺ်း။ တႃႇၵေႃႉၼိုင်ႈလၢတ်ႈဝႃႈ မၼ်းၸၢႆးပဵၼ်ပလိၵ်ႈၼႆသေ ဢဝ်ဝႂ်ပလိၵ်ႈမၼ်းဢွၵ်ႇၼႄ၊ သမ်ႉယုၵ်ႉၼႄသိူဝ်ႈမၼ်း၊ လႆႈႁၼ်ပႃးၵွင်ႈဝႆႉ- ၼႆယဝ်ႉ။

ၵူၺ်းၵႃႈ ၵူၼ်းဝၢၼ်ႈၸိူဝ်းဢဝ်ႁူမ်ႇလူမ်ႈသမ်ႉဝႃႈ ပလိၵ်ႈၵေႃႈႁဝ်းတေၵူတ်ႇထတ်းၼႆသေ ၵူတ်ႇထတ်းသွၵ်ႈတူၺ်း။ တီႈတူဝ်ပလိၵ်ႈၼၼ်ႉ လႆႈယႃႈမႃႉ 97 မဵတ်ႉ၊ ယႃႈၽွင်ၶၢဝ် ၶိုင်ႈတဝ်ႈလီႊပူဝ်ႊ၊ ငိုၼ်းမၢၼ်ႈ 25,000 ၵျၢတ်ႈ၊ ငိုၼ်းၶႄႇ 70 ယႂၼ်လႄႈလူတ်ႉၶိူင်ႈလမ်းၼိုင်ႈ- ၼႆယဝ်ႉ။

ယႃႈမႃႉ ဢၼ်ၾၢႆႇႁူမ်ႇလူမ်ႈဝၢၼ်ႈတီႉၺွပ်းလႆႈ
ၵူၼ်းသွင်ၵေႃႉ ဢၼ်ၾၢႆႇႁူမ်ႇလူမ်ႈဝၢၼ်ႈၶဝ်တီႉၺွပ်းလႆႈၼႆႉ ၵေႃႉၼိုင်ႈၸိုဝ်ႈဝႃႈ မွင်ႇတဵင်းထေးဢွင်ႇ၊ ပဵၼ်တပ်ႉပလိၵ်ႈဝဵင်းၼမ်ႉၶမ်း။ ၵူၼ်းၵေႃႉဢၼ်ၸွမ်းမၼ်းၼၼ်ႉ ၸိုဝ်ႈဝႃႈၸၢႆးထုၼ်းၸၢမ်ႇ (ႁွင်ႉဢၢႆႈတဵင်း) ယူႇပွၵ်ႉၼိူဝ် ဝဵင်းၼမ်ႉၶမ်း။ ပေႃးဝႃႈတီႉၺွပ်းလႆႈယဝ်ႉၵေႃႈ လႆႈဢဝ်တိၼ်သႂ်ႇထၢင်ႇမႆႉသေ ၶင်ဝႆႉတီႈလုမ်းၵွၼ်းပွၵ်ႉၶိုၼ်းၼိုင်ႈ၊ ထိုင်ၵၢင်ၼႂ်မႃး ၸင်ႇဢဝ်မွပ်ႈပၼ်တီႈတပ်ႉပလိၵ်ႈ- ၽူႈၵွၼ်းပွၵ်ႉၵွင်းသႃႇ လၢတ်ႈ။

ပလိၵ်ႈ တဵင်းထေးဢွင်ႇ ယွမ်းႁပ်ႉ လၢတ်ႈတီႈၵူၼ်းလူင်ပွၵ်ႉဝႃႈ- ယႃႈမဵတ်ႉၸိူဝ်းၼၼ်ႉ ပဵၼ်ၶွင်မၼ်းတင်းမူတ်း၊ ယွၼ်ႉပိူဝ်ႈမၼ်းၶႂ်ႈမီးငိုၼ်း၊ ၵူၼ်းႁိူၼ်းၵူၼ်းယေးမၼ်း ဢမ်ႇမီးငိုၼ်းၸႂ်ႉၸၢႆႇလႄႈ မၼ်းတေၸႂ်ႉၸၢႆးထုၼ်းၸၢမ်ႇ ၶၢႆပၼ်မၼ်း- ဝႃႈၼႆ။

ၵူၼ်းဝဵင်းၼမ်ႉၶမ်းၶဝ်လၢတ်ႈဝႃႈ- တီႈဝဵင်းၼမ်ႉၶမ်းၼႆႉ ပိူင်ပဵၼ်ဢၼ်ပဵၼ်မႃးၸိူင်ႉၼႆၼႆႉ မီးၼမ်တႄႉတႄႉ၊ ၵူၺ်းၵႃႈ ဢမ်ႇတွၼ်ႉတီႈလႆႈ ၵပ်းတိၼ်ၵပ်းမိုဝ်းၸိူင်ႉၼႆသေပွၵ်ႈ။ ပေႃးၵူၼ်းၼုမ်ႇၶဝ်တင်ႈၸႂ် ဢႅဝ်ႇလဵပ်ႈဢဝ်ႁူမ်ႇလူမ်ႈသေ သိုပ်ႇတီႉၺွပ်းထႅင်ႈတႄႉ တေလႆႈၼမ်တႄႉတႄႉ- ဝႃႈၼႆ။

ပလိၵ်ႈ တဵင်းထေးဢွင်ႇၼႆႉ ပဵၼ်ၵူၼ်းတိူင်းပႃႇၵိူဝ် (ပၵူဝ်း) မိူင်းမၢၼ်ႈ။ ၸၢႆးထုၼ်းၸၢမ်ႇ ပဵၼ်ၵူၼ်းပွၵ်ႉၼိူဝ် ဝဵင်းၼမ်ႉၶမ်း။




 
© 2012 All Rights Reserved | Asean Celebrity | Fonts @ AtFonts | Free Templates