လွင်ႈၶူးသွၼ်ၼၢင်းယိင်း ၸၢဝ်းၶိူဝ်းၶၢင် 2 ၵေႃႉ၊ ဢၼ်တူၵ်းပုၼ်ႈၽွၼ်း သွၼ်လိၵ်ႈလၢႆး တီႈဝၢၼ်ႈၵွင်းၶႃး (ၼႂ်းၵႄႈ ဝၢၼ်ႈၼမ်ႉတွင်းလႄႈမိူင်းပေႃႈ) ၸႄႈဝဵင်း မူႇၸေႈ  ထုၵ်ႇၵၼ်ႉၸၼ်လူလၢႆ ၶႃႈႁႅမ်တၢႆပႅတ်ႈ မိူဝ်ႈဝၼ်းတီႈ 19/01/2015 ယၢမ်းတဵင်ႈၶိုၼ်းၼၼ်ႉ ၸၢင်ႈဝႃႈ လႆႈဝႃႈပဵၼ်လိူင်ႈယႂ်ႇလိူဝ်သေ ဢၼ်သိုၵ်းမၢၼ်ႈယိုဝ်းၵွင်ႈလူင် သႂ်ႇလၢႆႇၸႃႇ ငဝ်ႈငုၼ်း KIO/KIA ဢၼ်မီးၵူၼ်းတၢႆ ၼပ်ႉႁူဝ်သိပ်း။

မေႃသွၼ်ၼၢင်းယိင်းၶၢင်သွင်ၵေႃႉ ဢၼ်ထုၵ်ႇၵၼ်ႉၸၼ် ၶႃႈႁႅမ်

ၶူးမေႃသွၼ်ၼၢင်းယိင်း ၸၢဝ်းၶိူဝ်းၶၢင် 2 ၵေႃႉၼႆႉ ၵေႃႉၼိုင်ႈၸိုဝ်ႈ  ၶွၼ်ႇၼၼ်ႇသိၼ်း (Hkawn Nan Tsin) ဢႃႇယု 21 ပီ။ ထႅင်ႈၵေႃႉၼိုင်ႈၸိုဝ်ႈ မရၼ်ႇလူႇရႃႇ (Maran Lu Ra) ဢႃႇယု 20 ပီ။ ၶူးသွၼ်သွင်ၵေႃႉၼႆႉ တူၵ်းပုၼ်ႈၽွၼ်းမႃး ပိူဝ်ႈတႃႇတေသွၼ်ပၼ်လုၵ်ႈႁဵၼ်း ၸိူဝ်းဢမ်ႇမီးတိုဝ်ႉတၢင်း သွၼ်ႁဵၼ်းပၺ်ၺႃႇ ၼႂ်းႁူင်းႁဵၼ်းလူင်ပွင်ၸိုင်ႈ၊ ပဵၼ်လုၵ်ႈဢွၼ်ႇၽၢၼ်ပေႃႈမႄႈ လႄႈ လုၵ်ႈဢွၼ်ႇၸိူဝ်းဢမ်ႇပေႃး မီးငိုၼ်းတွင်းၸိူဝ်းၼႆႉ။ ယူႇတီႈၸုမ်းငဝ်ႈငုၼ်း ၶရိယၼ်ႇ ပႅပ်ႉတိတ်ႉၶၢင် KBC သူင်ႇမႃး တီႈဝၢၼ်ႈၵွင်းၶႃး။

လိူင်ႈဢၼ် သိုၵ်းမၢၼ်ႈပွႆႇမၢၵ်ႇလူင်သႂ်ႇ တီႈလၢႆႇၸႃႇ ပူၼ်ႉမႃးမိူဝ်ႈဝၼ်းတီႈ 19/11/2014 ၼၼ်ႉ ပဵၼ်ၸိူင်ႉႁိုဝ်ၵေႃႈယဝ်ႉ၊  မၼ်းပဵၼ်ပၼ်ႁႃဢၼ်ၵိူတ်ႇၶိုၼ်ႈ ၼႂ်းၵႄႈၵၢင်ၸုမ်းယိပ်းၵွင်ႈၵၢင်ႇ ဢၼ်တိုၵ်ႉမီးၵၢၼ်တိုၵ်းယိုဝ်းၵၼ်ယူႇလႄႈ လႆႈဝႃႈပဵၼ်ထမ်းမၻႃး ၶွင်ၵူၼ်းယိပ်းၵွင်ႈၼင်ႇၵၼ်ၵူၺ်း ၼႆၵေႃႈၸၢင်ႈဝႃႈလႆႈ၊ ဢမ်ႇလႆႈတင်ႈၸႂ်သေပဵၼ်ၵႂႃႇ ၼႆၵေႃႈဝႃႈလႆႈ။ ၵူၺ်းၵႃႈ လိူင်ႈဢၼ်ၵၼ်ႉၸၼ်လူလၢႆ ၶႃႈႁႅမ်တၢႆ မေႃသွၼ်ၼၢင်းယိင်း တီႈၵူတ်ႉၶၢႆ ဝၢၼ်ႈၵွင်းၶႃး (ငဝ်ႈငုၼ်းတပ်ႉၸုမ်း KDA) ၼႆႉ ဢမ်ႇလႆႈတင်ႈၸႂ်ၼႆ ၽႂ်ဢမ်ႇဝႃႈလႆႈ။ လုၵ်ႈဢွၼ်ႇ 6 ၶူပ်ႇၵူၺ်းၵေႃႈ တေဝႃႈပဵၼ်ဢၼ်တင်ႈၸႂ်သေႁဵတ်း။

ၾၢႆႇၼိူဝ်သင်ႇႁဵတ်းႁႃႉ၊ ဢမ်ႇၼၼ် ၵူၼ်းပႃႈတႂ်ႈၶဝ်ႁဵတ်းႁင်းၵူၺ်းႁႃႉၼႆ ၽႂ်ၵေႃႈဢမ်ႇၸၢင်ႈဝႃႈ။ ဢမ်ႇၸၢင်ႈဝႃႈသေတႃႉ တင်ႈတႄႇပီ 2011 မႃးတေႃႇထိုင်မိူဝ်ႈလဵဝ်၊ ဢၼ်လႆႈပိုတ်းယိုဝ်းၵၼ်မႃးၼႆႉ သွင်ၾၢႆႇမီးလွင်ႈၸဵပ်းၸႂ်ၼင်ႇၵၼ်။

ပီၵၢႆပီဢွၼ်ၼႆႉ ယွၼ်ႉပဵၼ်ပၢင်တိုၵ်း ဝူင်ႈၵၢင်တပ်ႉသိုၵ်းမၢၼ်ႈ တင်းတပ်ႉသိုၵ်းၶၢင်ႁၢဝ်ႈႁႅင်း ၼႂ်းၸႄႈမိူင်းၶၢင်သေ မီးၵူၼ်းဝၢၼ်ႈၵူၼ်းမိူင်း ပၢႆႈမႃးတၢင်းဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇတင်းၼမ်။ လွင်ႈၼႆႉ ၼႂ်းၶႃႈႁၢပ်ႇၵၢၼ်ၶုၼ်မၢၼ်ႈ ဢမ်ႇၶႂ်ႈႁပ်ႉ ၸၢဝ်းၶိူဝ်းၶၢင် မႃးသေႃႉႁူမ်ႈပိုင်ႈယူႇ ၼႂ်းဝဵင်းၼမ်ႉၶမ်း။ လွင်ႈၼႆႉမၼ်းၼႄဝႃႈ တၢင်းၾၢႆႇၵူၼ်းႁဵတ်းၵၢၼ်လူင်ပွင်ၸိုင်ႈမၢၼ်ႈၶဝ်ၼႆႉ ဢမ်ႇဝႃႈၾၢႆႇသိုၵ်း၊ ဢမ်ႇဝႃႈၾၢႆႇပလိၵ်ႈ၊ ဢမ်ႇဝႃႈၾၢႆႇၵူၼ်းမိူင်း ၶဝ်တိုၼ်းဢမ်ႇမေႃၸႅၵ်ႇဝႃႈ ဢၼ်လႂ်ပဵၼ်ၵူၼ်းမိူင်း၊ ဢၼ်လႂ်ပဵၼ်ၸုမ်းယိပ်းၵွင်ႈၶဝ်။ ၶဝ်ၵႂႃႇဝူၼ်ႉလွင်ႈၸိူဝ်ႉၶိူဝ်းပိူင်လဵဝ်ၵူၺ်း။

လွင်ႈဝူၼ်ႉၸိူင်ႉၼႆၼႆႉ တိုၼ်းဢမ်ႇၸႂ်ႈၾၢင်ႁၢင်ႈ လၵ်ႈၶၼႃႇလီ ပုၼ်ႈတႃၶၵ်ႉၵၢၼ်လွင်ႈငမ်းယဵၼ်။ မၼ်းပွင်ႇဝႃႈ ၶၵ်ႉၵၢၼ်ငမ်းယဵၼ်ၼႆႉ ႁဵတ်းၾၢႆႇၸၼ်ႉၼိူဝ်ၵူၺ်းပႆႇပေႃး၊ ထုၵ်ႇလႆႈႁဵတ်းပႃးၵူႈၸၼ်ႉၸၼ်ႉၵႂႃႇ၊ တႄႇဢဝ်ၵူၼ်းမိူင်း၊ ၵူၼ်းႁဵတ်းၵၢၼ်လူင်ပွင်ၸိုင်ႈ၊ ဢမ်ႇဝႃႈပလိၵ်ႈ ၵူၼ်းမိူင်း တင်းမူတ်းတင်းသဵင်ႈ ထုၵ်ႇလႆႈႁဵတ်းၼင်ႇၵၼ်။ မၼ်းၸင်ႇတေၵေႃႇသၢင်ႈလႆႈ ငမ်းယဵၼ် လႄႈ မိူင်းႁူမ်ႈတုမ်ယိုၼ်းယၢဝ်း ဢၼ်ၾၢႆႇသိုၵ်းၶဝ်ဝႃႈယူႇၶိူဝ်းၶိူဝ်း။