ၵူၼ်းဝၢၼ်ႈဢိူင်ႇၼႃးသၢႆး ၼမ်ႉတူႈ တုၵ်းယွၼ်းၶိုၼ်းတီႈလိၼ်ဢၼ်ထုၵ်ႇ ၶွမ်ႊပၼီႊ ယိုတ်းဢဝ်



ၵူၼ်းဝၢၼ်ႈဢိူင်ႇၼႃးသၢႆး ၸႄႈဝဵင်းၼမ်ႉတူႈ ၸတ်းႁဵတ်း ပၢင်သပ်းၸႅင်ႈၶၢဝ်ႇ တီႈဝဵင်းတူၼ်ႈတီး။ တုၵ်းယွၼ်း ၶိုၼ်းတီႈလိၼ်သူၼ် ႁႆႈ ၼႃး ဢၼ်ၶွမ်ႊပၼီႊ (T&C) ႁုပ်ႈယိုတ်း ဢဝ်ႁဵတ်းသူၼ်ယၢင်တင် ပူၼ်ႉမႃး 7 ပီ၊ ၵွပ်ႈသူၼ်ယၢင်တင် ဢမ်ႇပဵၼ်ၵၢၼ်။


ပၢင်သပ်းၸႅင်ႈၶၢဝ်ႇ ၵူၼ်းဝၢၼ်ႈဢိူင်ႇၼႃးသၢႆး ၼမ်ႉတူႈ တီႈဝဵင်းတူၼ်ႈတီး
ပူၼ်ႉမႃးမိူဝ်ႈဝၼ်းတီႈ 24/01/2015 ၵူၼ်းဝၢၼ်ႈဢိူင်ႇၼႃးသၢႆး ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ၊ ၸတ်းႁဵတ်းပၢင်သပ်းၸႅင်ႈၶၢဝ်ႇတီႈ ၶလၢတ်ႊသိၵ်ႊ (Classic)  ဝဵင်းတူၼ်ႈတီး။ တုၵ်းယွၼ်းၶိုၼ်းတီႈလိၼ် သူၼ် ႁႆႈ ၼႃး ဢၼ်လႆႈလူႉသုမ်းၵႂႃႇ ၼပ်ႉႁူဝ်ပၢၵ်ႇဢေႊၵႃႊ၊ ယွၼ်ႉၶွမ်ႊမၼီႊ T&C (ထီႊဢႅၼ်ႊၸီႊ) ႁုပ်ႈယိုတ်းဢဝ် ပူၼ်ႉမႃးမွၵ်ႈ 6-7 ပီ။ ႁႂ်ႈၶွမ်ႊပၼီႊ T&C ပၼ်ၶိုၼ်းတီႈလိၼ်ၵူၼ်းဝၢၼ်ႈ။

ၵူၼ်းၼမ်ႉတူႈ ၼႃးသၢႆးၶဝ်ဝႃႈ- ၶွမ်ႊပၼီႊ T&C  (TOP CONQUER CO, Ltd) ၼႆႉ ၶဝ်မႃးႁဵတ်းၶူင်းၵၢၼ် ၽုၵ်ႇသွမ်ႈတူၼ်ႈယၢင်တင် (Rubber) မိူဝ်ႈပီ 2007 ၼၼ်ႉ တီႈႁိမ်းဝၢၼ်ႈၼႃးသၢႆး၊ ယၢၼ်ဝၢၼ်ႈၼႃးသၢႆး 2 လၵ်းၵူၺ်း။ ဢၼ်ၶဝ်လႆႈဢၼုၺၢတ်ႈ တီႈလူင်ပွင်ၸိုင်ႈၼၼ်ႉ လိၼ်ပဝ်ႇလိၼ်ႁၢမ်းတႃႇၽုၵ်ႇတူၼ်ႈယၢင်တင် တႃႇ 1,500 ဢေႊၶိူဝ်ႊ။ ၵူၺ်းၵႃႈ ၶဝ်သမ်ႉၶၢမ်းလၢမ်းမႄႇၶႂၢၵ်ႈသေ ၶဝ်ႈမႃးၽုၵ်ႇပႃးၼိူဝ်တီႈလိၼ် သူၼ် ႁႆႈၼႃးၵူၼ်းဝၢၼ်ႈ ဢၼ်မီးႁိမ်းၶူင်းၵၢၼ်ၶဝ်။ ၸင်ႇဝႃႈ ၵူၼ်းဝၢၼ်ႈၶဝ် လႆႈတုၵ်းယွၼ်းၶိုၼ်းမိူဝ်ႈလဵဝ်ၼႆႉ- ဝႃႈၼႆ။


လုင်းၸၢႆးယေႃ ၸဝ်ႈႁႆႈၸဝ်ႈၼႃး ၵူၼ်းၼမ်ႉတူႈ လၢတ်ႈဝႃႈ- တီႈလိၼ်သူၼ်ၵဝ်ၶႃႈ ပႃးၵႂႃႇ 15 ဢေႊၵႃႊ။ ၶဝ်ႁုပ်ႈယိုတ်းၵႂႃႇလၢႆလၢႆ၊ ဢမ်ႇသၢႆႈတႅၼ်းၵႃႈတႅၼ်းႁူဝ်သင်။ လွင်ႈၼႆႉ ႁဝ်းၶႃႈလႆႈႁဵတ်းလိၵ်ႈ တၢင်ႇယိုၼ်ႈၸူးလူင်ပွင်ၸိုင်ႈမိူင်းတႆး လႄႈ ၽွင်းတႅၼ်းသၽႃးၶဝ်လၢႆလၢႆတီႈယဝ်ႉ၊ ၶွမ်ႊပၼီႊၶဝ်ၵေႃႈ ပႆႇပၼ်တီႈလိၼ်ႁဝ်းၶိုၼ်း၊ ႁဝ်းၶႂ်ႈလႆႈတီႈလိၼ်ႁဝ်းၶိုၼ်းၵူၺ်း၊ ႁဝ်းပဵၼ်ၸဝ်ႈႁႆႈၸဝ်ႈၼႃး၊ ပေႃးႁဝ်းဢမ်ႇမီးတီႈလိၼ်သူၼ် ႁႆႈ ၼႃး ႁဝ်းတေႁဵတ်းႁိုဝ်ႁႃၵိၼ်လဵင်ႉတွင်ႉႁဝ်းၵႂႃႇလႆႈ- ဝႃႈၼႆ။

လွင်ႈၶွမ်ႊပၼီႊ ယိုတ်းတီႈလိၼ်ၵူၼ်းဝၢၼ်ႈၼႆႉ ၵူၼ်းဝၢၼ်ႈၼမ်ႉတူႈ လႆႈသူင်ႇတၢင်ႇလၢတ်ႈတီႈ ၽွင်းတႅၼ်းသၽႃးၸႄႈမိူင်း ဝဵင်းၼမ်ႉတူႈ ၼၢင်းၶမ်းဢေး မိူဝ်ႈပီ 2012 ၵမ်းၼိုင်ႈ၊ ၼႂ်းပီ 2013 ၵမ်းၼိုင်ႈ။ မိူဝ်ႈၼၼ်ႉ လႆႈႁၼ်ၸၢႆးသႃႇလူႇ ၽွင်းလူင်ၾၢႆႇၽုၵ်ႇသွမ်ႈလႄႈ လဵင်ႉလူသတ်း မႃးႁွတ်ႈထိုင်တီႈၼႃးသၢႆးသေ လူလွမ်တူၺ်းပိုၼ်ႉတီႈ တီႈလိၼ်ဢၼ်ၶွမ်ႊပၼီႊၶဝ်ယိုတ်းၵႂႃႇၼၼ်ႉယူႇ။

ၸၢႆးသႃႇလူႇၵေႃႈ လႆႈႁၼ်ၵပ်းၼႃႈၵပ်းတႃ လွင်ႈတီႈလိၼ်သူၼ် ႁႆႈ ၼႃးၵူၼ်းဝၢၼ်ႈ ဢေႊၵႃႊမၼ်း 700 ပၢႆပႃးၵႂႃႇၸွမ်းၶွမ်ႊပၼီႊၼၼ်ႉ။ ၵူၺ်းၵႃႈ မၼ်းၵႄႈလိတ်ႈပၼ်ႁႃၼႆႉၵေႃႈ ဢမ်ႇထိုင်တီႈလႄႈ ၽိူဝ်ႇထိုင်မႃးပီ 2014 ၼႂ်းလိူၼ်ၵျူၼ်ႊၼၼ်ႉ ၵူၼ်းဝၢၼ်ႈၵူၼ်းမိူင်းၵေႃႈ လႆႈႁဵတ်းလိၵ်ႈတၢင်ႇတီႈ ၼၢင်းၶမ်းဢေး ထႅင်ႈၵမ်းၼိုင်ႈ။ မိူဝ်ႈၼၼ်ႉ ၼၢင်းၶမ်းဢေးၵေႃႈ လႆႈယိုၼ်ႈလိၵ်ႈထိုင်တီႈၸွမ်ၽွင်းလူင် ၸိုင်ႈတႆး ၸဝ်ႈဢွင်ႇမျၢတ်ႈ၊ မၼ်းၸဝ်ႈၵေႃႈ လႆႈလူင်းမႃးတူၺ်း ၼႂ်းပိုၼ်ႉတီႈထႅင်ႈ။ ႁၼ်ထိုင်ဝႃႈ ၶူင်းၵၢၼ်ၽုၵ်ႇယၢင်တုင် (Rubber) ၼႆႉ ဢမ်ႇပဵၼ်ၵၢၼ်ၼႆသေ ပၼ်ၶေႃႈၵႂၢမ်းမၼ်ႈၵႂႃႇဝႃႈ တေပၼ်လိၼ်ၵူၼ်းဝၢၼ်ႈၵူၼ်းမိူင်းၶိုၼ်းယူႇ။ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉ ယင်းပႆႇပၼ်ၶိုၼ်းတီႈလိၼ်ၵူၼ်းဝၢၼ်ႈ- ပႃႈၼၢင်းၵျႃႇမုင်ႇ ၵူၼ်းၼႃးသၢႆး လၢတ်ႈတီႈပၢင်သပ်းၸႅင်ႈၶၢဝ်ႇ ၼင်ႇၼႆ။


ဝၢႆးလင်ပၢင်သပ်းၸႅင်ႈၶၢဝ်ႇယဝ်ႉ ၸဝ်ႈႁႆႈၸဝ်ႈၼႃးၶဝ် လႆႈဢွၵ်ႇၶေႃႈပိုၼ်ၽၢဝ်ႇသေ တုၵ်းယွၼ်းပႃးထႅင်ႈလၢႆလၢႆၶေႃႈ။ မိူၼ်ၼင်ႇ လိၼ်သူၼ် ႁႆႈ ၼႃး ဢၼ်ၶွမ်ႊပၼီႊယိုတ်းဝႆႉတီႈၵူၼ်းဝၢၼ်ႈၵူၼ်းသူၼ်ၸိူဝ်းၼၼ်ႉ ႁႂ်ႈပၼ်ၶိုၼ်းၸဝ်ႈၶွင်တင်းမူတ်း။ ၼႂ်းၶၢဝ်းတၢင်း ဢၼ်ၶွမ်ႊပၼီႊယိုတ်းဝႆႉ (တင်ႈတႄႇပီ 2007 တေႃႇထိုင်ယၢမ်းလဵဝ်) ၶၢဝ်းတၢင်း 7 ပီ၊ ဢၼ်ၵူၼ်းဝၢၼ်ႈၵူၼ်းသူၼ်ဢမ်ႇလႆႈၽုၵ်ႇသွမ်ႈၵိၼ်၊ ဢမ်ႇလႆႈႁဵတ်းႁႃၵိၼ်လဵင်ႉတွင်ႉၼၼ်ႉ ႁႂ်ႈၶွမ်ႊပၼီႊၶဝ် သၢႆႈတႅၼ်းပၼ်ငိုၼ်းတွင်း လူၺ်ႈၵႃႈၶၼ်ဢၼ်ၵိုင်ႇငၢမ်ႇ။ တုၵ်းယွၼ်းပႃးဝႃႈ- ဢၼ်ဝူဝ်းၵႂၢႆးၵူၼ်းဝၢၼ်ႈ ၶဝ်ႈသူၼ်ယၢင်တင်သေ ထုၵ်ႇၶွမ်ႊပၼီႊမၢပ်ႇမႂ်ၸိူဝ်းၼၼ်ႉၵေႃႈ ႁႂ်ႈသၢႆႈတႅၼ်းပၼ်ၶိုၼ်းတီႈ ၸဝ်ႈၶွင်ဝူဝ်းၵႂၢႆး- ၼႆယဝ်ႉ။

မိူဝ်ႈပူၼ်ႉမႃး 6-7 ပီၼၼ်ႉ ပိူဝ်ႈတႃႇၽုၵ်ႇသွမ်ႈ မၢၵ်ႇၶဝ်ႈတဝ်ႈၼမ်ႉ၊ တူၼ်ႈယၢင်တင် တႅၼ်းတၢင်တူၼ်ႈယႃႈၼႆသေ ၶွမ်ႊပၼီႊ T&C (ၶွမ်ႊပၼီႊၶႄႇ) မႃးတီႈၼမ်ႉတူႈသေ မႃးႁူပ်ႉထူပ်းဢုပ်ႇဢူဝ်းၵၼ်တင်းၵူၼ်းဝၢၼ်ႈ။ ယူႇတီႈၶွမ်ႊပၼီႊတိုၵ်းသူၼ်းၵူၼ်းဝၢၼ်ႈဝႃႈ ႁဝ်းႁဵတ်းၵၢၼ်ၽုၵ်ႇသွမ်ႈႁူမ်ႈၵၼ်၊ ပေႃးဝႃႈပဵၼ်ၵၢၼ်မႃး ၼမ်ႉတွၼ်းမၼ်းႁဝ်းဢဝ်ၵေႃႉၶိုင်ႈ။ လွင်ႈၼႆႉ ၵူၼ်းမိူင်းၵေႃႈၽွမ်ႉလႆႈၸႂ်သေ ၶွမ်ႊပၼီႊၵေႃႈ ၵႂႃႇယွၼ်းပႃႊမိတ်ႊတီႈလူင်ပွင်ၸိုင်ႈ။ လူင်ပွင်ၸိုင်ႈၵေႃႈ ဢၼုၺၢတ်ႈပၼ်သေ ထိုင်တီႈလႆႈႁဵတ်းၶူင်းၵၢၼ်ၽုၵ်ႇသွမ်ႈ တူၼ်ႈယၢင်တင်မႃး။

ၵူၺ်းၵႃႈ တေႃႇထိုင်ဝၼ်းမိူဝ်ႈၼႆႉ ၵၢၼ်ၽုၵ်ႇသွမ်ႈဢမ်ႇပဵၼ်ၵၢၼ် (ဢမ်ႇဢွင်ႇ)၊ ပိုၼ်ႉတီႈမၢင်တီႈၵေႃႈ တိုၵ်ႉပဵၼ်တီႈလိၼ်ပဝ်ႇႁူၵ်ႉႁၢမ်းဝႆႉယူႇ။ လွင်ႈၸိူဝ်းၼႆႉ ၵူၼ်းဝၢၼ်ႈၵေႃႈဝႃႈ တႃႉႁဝ်းၽုၵ်ႇသွမ်ႈၶိုၼ်းမိူၼ်ၵဝ်ႇၵဝ်ႇ ႁင်းၵူၺ်းႁဝ်း၊ ႁဝ်းဢမ်ႇႁဵတ်းၵၢၼ်ႁူမ်ႈၵၼ်တင်း ၶွမ်ႊပၼီႊယဝ်ႉ ၼႆသေဢွၼ်ၵၼ်ယွၼ်းၶိုၼ်းတီႈလိၼ်၊ ၵူၺ်းၵႃႈ တၢင်းၶွမ်ႊပၼီႊ ဢမ်ႇပၼ်ၶိုၼ်းတီႈလိၼ်။ ဢမ်ႇပၼ်ၵူၺ်းပႆႇပေႃး သမ်ႉလွၵ်ႇငိုတ်ႈၸဝ်ႈတီႈလိၼ်ၵေႃႈမီး၊ ၵႂႃႇၵၢဝ်ႇႁႃတၢင်းၽိတ်း (ၸွႆးတြႃး)ၸဝ်ႈတီႈလိၼ်သူၼ်ၵေႃႈမီး။ ယွၼ်ႉၼၼ် ၵူၼ်းဝၢၼ်ႈၼႃးသၢႆး ၶဝ်ၸင်ႇလႆႈမႃးႁဵတ်းပၢင်သပ်းၸႅင်ႈၶၢဝ်ႇ တုၵ်းယွၼ်းတီႈလိၼ်သူၼ် ႁႆႈ ၼႃးၶိုၼ်း တီႈဝဵင်းတူၼ်ႈတီးပွၵ်ႈၵမ်းၼႆႉ- ၼႆယဝ်ႉ။





 
© 2012 All Rights Reserved | Asean Celebrity | Fonts @ AtFonts | Free Templates