သိုၵ်းမၢၼ်ႈ ၵႂႃႇတီႉၺွပ်းၵုမ်းၶၢင် ထတ်းထၢမ်ပေႃႉထုပ်ႉ ၵူၼ်းဝၢၼ်ႈလွၵ်းလူင် ဢိူင်ႇလွၵ်းလူင် ၸႄႈဝဵင်းမိူင်းမိတ်ႈ။ မၢပ်ႇၼႄးဝႃႈၵူၼ်ႈဝၢၼ်ႈၵမ်ႉထႅမ်သိုၵ်းထိူၼ်ႇ။

ပူၼ်ႉမႃးမိူဝ်ႈဝၼ်းတီႈ 28/10/2014 သိုၵ်းမၢၼ်ႈတပ်ႉၵွင် 276 တင်း 223 ႁႅင်းၵူၼ်း 30 ပၢႆ၊ ဢမ်ႇၼုင်ႈၶူဝ်းသိုၵ်း၊ ပႃးၶိူင်ႈယိပ်းၵွင်ႈၵၢင်ႇတဵမ်ထူၼ်ႈ ၵႂႃႇဝႅတ်ႉဝၢၼ်ႈလွၵ်းလူင် ၸႄႈဝဵင်းမိူင်းမိတ်ႈသေ တီႉၺွပ်းဢဝ်ၵူၼ်းဝၢၼ်ႈၵႂႃႇ ၵုမ်းၵုမ် ထတ်းထၢမ်ပေႃႉထုပ်ႉ။ ၸီႉၼႄးမၢပ်ႇၽၢမ်းဝႃႈ ၵူၼ်းဝၢၼ်ႈၵဵဝ်ႇၶွင်ႈ/ လဵင်ႉၶဝ်ႈသိုၵ်းထိူၼ်ႇ။

ၸၢႆးၵျေႃႇလႃႉၵႂႃႇ ၵုမ်းၶင်ဝႆႉ ၼႂ်းတပ်ႉပိဝ်ႇႁႃႇ၊ ႁၢၼ်ႉတေႃႇမိူဝ်ႈလဵဝ် ပဵၼ်ႁိုဝ်ဝႆႉၵေႃႈ ၽႂ်ပႆႇႁူႉၸွမ်း၊ မၢပ်ႇၽၢမ်းဝႃႈ ၵဵဝ်ႇၶွင်ႈသိုၵ်းထိူၼ်ႇ၊ ၽူႈမီးပုၼ်ႈၽွၼ်းၼႂ်းဝၢၼ်ႈ ယွၼ်းထူပ်းၵေႃႈ သိုၵ်းမၢၼ်ႈဢမ်ႇပၼ်ထူပ်း။ ၵူၼ်းလူင်ဝၢၼ်ႈ ၸၢႆးမျၢတ်ႉထုၼ်း ၵေႃႈထုၵ်ႇႁွင်ႉၵႂႃႇထတ်းထၢမ်ၼႂ်း တပ်ႉပိဝ်ႇႁႃႇ ၼင်ႇၵဝ်ႇ။ ၸၢႆးထုၼ်းငူၺ်ႇသမ်ႉ သိုၵ်းမၢၼ်ႈဢဝ် ၸိူၵ်ႈမတ်ႉမိုဝ်း ႁွင်ႉၵႂႃႇထတ်းထၢမ် ၼႂ်းထိူၼ်ႇ ႁိမ်းဝၢၼ်ႈ။ ၸၢႆးၵျေႃႇမိၼ်ႉ လႆႈထုၵ်ႇပေႃႉႁႅမ် တီႈၼႃႈ။ လုင်းလႃႉ တင်း ပႃႈလႃႉ ထုၵ်ႇမၢပ်ႇၽၢမ်းဝႃႈ ၵဵဝ်ႇၶွင်ႈၵၢၼ်မိူင်း၊ ၺႃးပေႃႉထုပ်ႉသေပွႆႇၶိုၼ်း။


ဝၢၼ်ႈလွၵ်းလူင် ဢိူင်ႇလွၵ်းလူင်ၼႆႉ မီးၾၢႆႇၸၢၼ်း ဝဵင်းမိူင်းမိတ်ႈ၊ ပေႃးလုၵ်ႉဝဵင်းမိူင်းမိတ်ႈ ၵႂႃႇၼႃႈ တၢင်းၸၢၼ်း တေလတ်းဝၢၼ်ႈႁူဝ်ၵူင်း၊ ဝၢၼ်ႈဢႃႇသၢၼ်ႇသေ ၶၢမ်ႈၼမ်ႉမွင်းၵေႃႈ ထိုင်ဝၢၼ်ႈလွၵ်းလူင်။

ဢွၼ်ၼႃႈၼႆႉ ငႃးသိုၵ်းမၢၼ်ႈ ၵႂႃႇၽႃႇၺႃးမၢၵ်ႇတႅၵ်ႇ 4 လုၵ်ႈ ၼိူဝ်သဵၼ်ႈတၢင်း ပွတ်းဝၢၼ်ႈပၢတ်ႈ ၸႄႈဝဵင်းမိူင်းမိတ်ႈ၊ မီးၵၢၼ်ဝၢတ်ႇၸဵပ်းၵမ်ႈၽွင်ႈ။ ယွၼ်ႉမၢၵ်ႇတႅၵ်ႇၼၼ်ႉလႄႈ သိုၵ်းမၢၼ်ႈၵႂႃႇႁဵတ်းႁၢႆႉတေႃႇၵူၼ်းဝၢၼ်ႈလွၵ်းလူင်၊ တီႉၺွပ်းၵူၼ်းၵႂႃႇႁႆႈ ၵႂႃႇၼႃး။

တပ်ႉသိုၵ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်တူင်ႉၼိုင်ယူႇပွတ်းတွၼ်ႈၼၼ်ႉ မီးတပ်ႉသိုၵ်းၶၢင် (KIA) ၊ တပ်ႉသိုၵ်း တဢၢင်း (TNLA) ၊ တပ်ႉသိုၵ်းၸိုင်ႈတႆး (SSAA/SSA) ၸိူဝ်းၼႆႉ။ သၢမ်တပ်ႉၼႆႉ ႁူမ်ႈၵၼ်ၶွတ်ႇၽွတ်ႈဝႆႉ တပ်ႉႁူမ်ႈ တုမ် ၸၢဝ်းၶိူဝ်း။

ၼႂ်းၸႄႈဝဵင်းမိူင်းမိတ်ႈၼႆႉ ၵႃႈၵွၼ်ႇပူၼ်ႉမႃး ပေႃးမီးၵူၼ်းမႃးတႅပ်းမႆႉ သိုၵ်းမၢၼ်ႈ ပႂ်ႉၵဵပ်းၵိၼ်ၶွၼ်ႇမႆႉသေ ပၼ်ၵူၼ်း ၵႃႉၶဝ် တေႃႉသူင်ႇၵႂႃႇၶၢႆတၢင်းမိူင်းၶႄႇ။ ၸူဝ်ႈမီးသိုၵ်း တပ်ႉႁူမ်ႈတုမ်ၸၢဝ်းၶိူဝ်း ၶဝ်ႈမႃးတူင်ႉၼိုင် ပွတ်းတွၼ်ႈၼႆႉ ၾၢႆႇတပ်ႉႁူမ်ႈတုမ်ၸၢဝ်းၶိူဝ်း ဢမ်ႇၵဵပ်းၵိၼ်ၶဝ်ႈၵိၼ်ၼမ်ႉတီႈၵူၼ်းဝၢၼ်ႈ၊ ၵူၺ်းၵႃႈ ပႂ်ႉၵဵပ်းၵိၼ်ၶွၼ်ႇမႆႉၸိူဝ်းၼႆႉ။ လွင်ႈၼႆႉ မၼ်းပဵၼ်ၶႂၢၵ်ႇၼၢမ်ၵိတ်ႇၶႂၢင် သိုၵ်းမၢၼ်ႈ၊ ၾၢႆႇသိုၵ်းမၢၼ်ႈ ဢမ်ႇၸၢင်ႈၵႂႃႇတူင်ႉၼိုင်/ ၵဵပ်းၶွၼ်ႇလႆႈ ထၢင်ႇႁၢင်ႈလွတ်ႈလႅဝ်းလႄႈ ၸင်ႇလႆႈပဵၼ်မႃးၸိူင်ႉၼႆ- ၵူၼ်းယူႇၼႂ်းပိုၼ်ႉတီႈ ၵေႃႉၼိုင်ႈလၢတ်ႈ ၼင်ႇၼႆ။