တင်ႈတႄႇဝၼ်းတီႈ 25/08/2014 မႃး ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ႁွင်ႉပၢင်ၵုမ်လူင် တီႈၼႂ်းၵဵင်းမႆႇ ၸိုင်ႈထႆး။ တၢင်ႇလၢတ်ႈၼႄၵၢၼ်ငၢၼ်း ဢၼ်ၵေႃၵမ်ၵၢၼ်ငဝ်ႈငုၼ်း UNFC  ႁဵတ်းသၢင်ႈမႃး ၶၢဝ်းတၢင်း 3 ပီၶိုင်ႈ၊ တမ်းပိူင် ဢၼ်တေႁဵတ်းၵႂႃႇတၢင်းၼႃႈ၊ ၵဵဝ်ႇၵပ်းလွင်ႈ ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း၊ လွင်ႈငမ်းယဵၼ်၊ လွင်ႈၵၢၼ်မိူင်း၊ ပိူဝ်ႈတႃႇတေႁူပ်ႉထူပ်းၵၼ် ၸိူဝ်းၼႆႉ။ ပိူင်လူင်မၼ်း ႁႂ်ႈၶွတ်ႇလိူတ်ႈၵၼ် မၼ်ႈၵႅၼ်ႇသေ ႁႂ်ႈပဵၼ်ဢဵၼ်ပဵၼ်ႁႅင်း တႃႇႁႃတၢင်းဢွၵ်ႇႁူမ်ႈၵၼ် - ၽူႈၼမ်းၼႂ်း ၶုၼ်ဢူၵ်ႉၵႃႇ လၢတ်ႈ။

ပၢင်ၵုမ်လူင် 3 ပီၶိုင်ႈၼႆႉ ပိူဝ်ႈတႃႇမူၼ်ႉမႄးပၵ်းပိူင်မူႇၸုမ်း၊ ပိူဝ်ႈတႃႇ လိူၵ်ႈၽူႈၼမ်းမႂ်ႇ ဢၼ်တေသိုပ်ႇၵႂႃႇ ၶၢဝ်းတၢင်းၼႃႈထႅင်ႈ။ လွင်ႈႁူဝ်ပဝ်ႈမႂ်ႇၼႆႉ လႆႈငိၼ်းဝႃႈ တေလိူၵ်ႈသၢင် ၼႂ်းပၢင်ၵုမ်လူင် UNFC ဝၼ်းတီႈ 01/09/2014 မိူဝ်ႈၼႆႉ- ၼႆယဝ်ႉ။

ၵူၺ်းၵႃႈ ပၢင်ၵုမ်ဝၼ်းတီႈ 31/08/2014 ၼၼ်ႉ ဢိင်ၼိူဝ် ပိူင်ၶွတ်ႇၽွတ်ႈဢမ်ႇမိူၼ်ၵၼ်သေ တူဝ်တႅၼ်း ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) 5 ၵေႃႉ- 1.ႁူဝ်ပဝ်ႈ မူႇတူး သေးၽူဝ်း။ 2.ၽူႈၼမ်းၼႂ်း ပတူဝ်ႇၵွႆႇသေႃးဝိၼ်း။ 3. ၵႅမ်ႁူဝ်ပဝ်ႈ ၼေႃႇၸီႇ ၽူဝ်းလႃႇၸဵင်ႇ။ ၽူႈၶဝ်ႈၶွမ်ႊမတီႊ ၸုမ်းပွင်ၵၢၼ် KNU 4.မၢၼ်းငဵင်းမွင်ႇ တင်း 5.တႃႇတူဝ်ႇမူဝ်း ၸိူဝ်းၼႆႉ ထွၼ်တူဝ်ဢွၵ်ႇပၢင်ၵုမ်။ (ၵူၺ်းၵႃႈ ဢမ်ႇၸႂ်ႈထွၼ်တူဝ်ဢွၵ်ႇ လုၵ်ႈၸုမ်း UNFC) ။

လွင်ႈတၢင်းဢၼ်လႆႈထွၼ်တူဝ်ဢွၵ်ႇပၢင်ၵုမ်လူင်ၼႆႉ ၵွပ်ႈဝႃႈ ဢၼ်မႃးဢုပ်ႇဢူဝ်းၵၼ် လွင်ႈပိူင်ၶွတ်ႇၽွတ်ႈ ၼၼ်ႉ မီးလွင်ႈပႅၵ်ႇပိူင်ႈၵၼ်။ ၵဵဝ်ႇၵပ်းလွင်ႈၼႆႉ ၵူၼ်းၼႂ်း UNFC ၵေႃႉၼိုင်ႈလၢတ်ႈဝႃႈ- လၢႆးဢၼ်ၸုမ်း ယၢင်းၽိူၵ်ႇ (KNU) ၶႂ်ႈႁဵတ်းၶႂ်ႈပဵၼ်ၼၼ်ႉ ပေႃးမိူၼ်ၵၼ် ႁူမ်ႈၵၼ်ႁဵတ်း၊ ဢၼ်ဢမ်ႇမိူၼ်ၵၼ် ႁႂ်ႈႁဵတ်းၵႂႃႇ ႁင်းၽႂ်မၼ်း။ ၵူၺ်းၵႃႈ ပေႃးဢဝ်ပိူင် UNFC ဝႃႈ ပေႃး UNFC တႅပ်းတတ်းၸိုင် လုၵ်ႈၸုမ်း UNFC ၵူႈမူႇၵူႈၸုမ်း တေလႆႈႁဵတ်းၸွမ်းတင်းမူတ်း- ဝႃႈၼႆ။

UNFC ၼႆႉ  တင်းမူတ်းမီးလုၵ်ႈၸုမ်း 12 ၸုမ်း- 1.ၸုမ်းၶၢင်လွတ်ႈလႅဝ်း (KIO) ၊ 2.ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ၊ 3.ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP) ၊ 4.ပႃႇတီႇမိူင်းမွၼ်းမႂ်ႇ (MNSP) ၊ 5.တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ၊ 6.ပႃႇတီႇမႂ်ႇသုင်ၸိုင်ႈတႆး (SSPP) ၊ 7.ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၊ 8.တႅဝ်းႁူမ်ႈပူတ်းပွႆႇမိူင်းပလွင်ႈ (PSLF) ၊ 9.ၸုမ်းလႃးႁူႇ (LDU) ၊ 10.ၸုမ်းၶျၢင်း (ANC) ၊ 11.ၸုမ်းၸိူဝ်ႉၸၢတ်ႈဝႃႉ (WNO) ၊ 12.တပ်ႉသိုၵ်းဢူၺ်းလီၻီႊမူဝ်ႊၶရႅတ်ႊတိၵ်ႊ ၵူႈၸၢဝ်းၶိူဝ်း မိူင်းမၢၼ်ႈ (MNDAA) ၸုမ်းၵူဝ်းၵၢင်ႉ - ၸိူဝ်းၼႆႉ။

ပၢင်ၵုမ်လူင်ၼႆႉ ႁွင်ႉဝွၵ်ႇၸိူၼ်းဝႆႉၸုမ်းဝႃႉ UWSA တင်းၸုမ်းမိူင်းလႃး DNAA-ESS သေတႃႉ ဢမ်ႇမႃးၶဝ်ႈႁူမ်ႈ- ၶၢဝ်ႇ- RFA ဢွၵ်ႇၵႂႃႇၼင်ႇၼႆ။

ၼွၵ်ႈသေၼၼ်ႉ တၢင်ႇမူႇတၢင်ႇၸုမ်း မိူၼ်ၼင်ႇ ၸုမ်းရၶႅင်ႇ (ALP) ၊ ၸုမ်းရၶႅင်ႇ  (AA) ၊ ၸုမ်းယၢင်းပုတ်ႉထ (DKBA) ၊ ၸုမ်းယၢင်း ၶွင်ႊသီႊငမ်းယဵၼ် PC ၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈ ပတ်းပိုၼ်ႉ (ABSDF) ၸိူဝ်းၼႆႉၵေႃႈ ၶဝ်ႈႁူမ်ႈ၊  မီးၵူၼ်းၶဝ်ႈႁူမ်ႈတင်းမူတ်း 100 ပၢႆ- ၼႆယူႇ။