ပွႆးဢွၵ်ႇဝႃႇသႃ တီႈဝတ်ႉၵူႇတဝ်ႈၼႂ်း ၵဵင်းမႆႇၼႆႉ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ တေသိုပ်ႇၸတ်းတီႈ ဝတ်ႉၵူႇတဝ်ႈ မီးၵၢၼ်လူႇတၢၼ်းၶဵင်ႇတၢင်ႇပုတ်ႈ တူၼ်ႈပႅၵ်ႇလႄႈ ၼူၵ်ႉတူဝ်း ဢိၵ်ႇ တၢင်းၵႃႈယိူင်းၵူႈပီ။

ၽူႈတူင်ႉၼိုင်ၼႂ်း ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ထၢႆႇႁၢင်ႈၵိုၵ်းၵၼ် မိူဝ်ႈပၢင်ပွႆးပီမႂ်ႇတႆး 2108 တီႈဝတ်ႉၵူႇတဝ်ႈ

ဝၼ်းတီႈ 8 လိူၼ်ဢွၵ်းထူဝ်ႊၿိူဝ်ႊ ႁိုဝ် လိူၼ် 11 မူၼ်း သႃသၼႃ 2557 ပီၼႆႉၵေႃႈ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ ၶဝ်တေၸတ်းပွႆးဢွၵ်ႇဝႃႇသႃ တီႈလုမ်းၵေႃလိၵ်ႈလၢႆးၾိင်ႈငႄႈတႆးၵဵင်းမႆႇ ၼႂ်းဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းမိူင်း ၸႄႈတွၼ်ႈၵဵင်းမႆႇ ၸွမ်းၼင်ႇၵူႈပီပူၼ်ႉမႃး။

ၵူၺ်းၵႃႈပီၼႆႉသမ်ႉတိတ်းၸပ်းဝၼ်းၵိူတ်ႇၸဝ်ႈၵွၼ်းဝတ်ႉ ၶူးၿႃးၸဝ်ႈၸၼ်ထရင်ႊသီ တႄႇဢဝ်ဝၼ်းတီႈ 3 ၵႂႃႇၵေႃႈ ပဵၼ်ဝၼ်းႁႅၼ်းပွႆးလႄႈ သိုပ်ႇၸႆးတႃဢွၼ်ႇ ၵႂႃႇတေႃႇထိုင်ဝၼ်းသိုပ်ႇၸႆးတႃလူင်ယဝ်ႉ ယၢတ်ႇၼမ်ႉၶႂမ်ႈတဝ်ႈၼႂ်း ဝၼ်း တီႈ  05/10/2014 ဝၢႆးၼၼ်ႉထႅင်ႈဝၼ်းၼိုင်ၵေႃႈ တေသိုပ်ႇပဵၼ်ပွႆးဢွၵ်ႇဝႃႇသႃ ၼႂ်းဝၼ်းးတီႈ 7-8/10/2014 ။

ၸိူင်ႉႁိုဝ်ၵေႃႈလီ တၢင်းၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ယင်းပိုၼ်ၽၢဝ်ႇဢွၵ်ႇမႃးဝႃႈ - 01/10/2014 မိူဝ်ႈၼႆႉ ၵေႃလိၵ်ႈလၢႆးၾိင်ႈငႄႈတႆး လႆႈၵႂႃႇၶဝ်ႈႁူမ်ႈ ပၢင်ပွႆးၶွပ်ႈၶူပ်ႇ 30 ပီ ႁွင်ႈၼႄပိုၼ်း တီႈဝတ်ႉရွင်ႉမဵၼ်းၸႄႈဝဵင်း လွႆသၵဵတ်း ၸႄႈတွၼ်ႈၵဵင်းမႆႇ ဢၼ်တၢင်းၸဝ်ႈတႃႇၼ ၸိူၼ်းဝွၵ်ႇမႃးလႄႈ လႆႈႁဵတ်းၼိူဝ်ႉသူမ်ႈဢုၼ်ႇၵႂႃႇၸႃႇၵႃႉ ႁူမ်ႈတၢၼ်းၸွမ်း။

03/10/2014 ၶၢဝ်းယၢမ်း 18.00 မူင်းသမ်ႉ ၸုမ်း IT တႆး တေႁူပ်ႉထူပ်းၵိူဝ်းၵုမ်ၵၼ် ဝၢင်းၽႅၼ်တႃႇတေလူင်းၾွၼ်ႉ
တႆး ပၼ်ပီႈၼွင်ႉတႆးဝၼ်းဢွၵ်ႇဝႃႇသႃ တီႈလုမ်းၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ။

04/10/2014     ၶၢဝ်းယၢမ်း 14.00 မူင်း ႁူပ်ႉထူပ်းၵၼ်ပိူဝ်ႈတႃႇႁၢင်ႈႁႅၼ်းတၢၼ်း ၸႃႇၵ ဝၼ်းၵိူတ်ႇ တူၼ်ၸဝ်ႈၶူးၿႃး ၸၼ်ထရင်ႊသီ ၼႂ်းဝၼ်းတီႈ 5

05/10/2014 ၶၢဝ်းယၢမ်း 08.00 မူင်းတေႁူပ်ႉထူပ်းၵၼ်တီႈၼႃႈ ႁွင်ႈၵၢၼ်ၵေႃလိၵ်ႈလၢႆးၾိင်ႈငႄႈတႆး ၼႂ်းဝတ်ႉ
ၵူႇတဝ်ႈ ၸႃႇၵ တၢင်းၵိၼ် ဝၼ်းၵိူတ်ႇ ၸဝ်ႈၵွၼ်းဝတ်ႉ ၶူးၿႃးၸၼ်တရင်ႊသီ  ဝတ်ႉၵူႇတဝ်ႈ။မီးၶဵင်ႇတၢင်းၵႃႈဝႅၼ်လႄႈ
ယွၼ်းဝွၵ်ႇၸိူၼ်းပႃး ပီႈၼွင်ႉတႆးၵူႈမူႇ ၵူႇၸုမ်းမႃးၼႄတၢင်းၵႃႈဝႅၼ်ၾိင်ႈငႄႈတႆး ၼႂ်းဝၼ်းၵိူတ်ႇ ၸဝ်ႈၶူးၿႃး

06-07/10/2014 ယၢမ်း 09.00 ၸွႆႈၵၼ်ႁဵတ်းတူၼ်ႈပႅၵ်ႇလႄႈၶဵင်ႇတၢင်ပုတ်ႈ တီႈၼႂ်းဝတ်ႉၵူႇတဝ်ႈလုင်းၸၢမ်ႇထုၼ်း
ပူႇပၢၼ်းၵေႃလိၵ်ႈလၢႆး တေပဵၼ်ၽူႈဢွၼ်ၼမ်းႁဵတ်း။

07/10/2014 ယၢမ်း 19.00 မူင်း မီးပၢင်ပွႆးတၢင်းၵႃႈဝႅၼ်ၼူၵ်ႉ/တူဝ်းလႄႈတၢင်းၵႃႈယိူင်း လၢႆမူႇမၢႆၸုမ်း
08/10/2014 ယၢမ်း 08.30 မူင်း ၶိုၼ်ႈဝတ်ႉ တၢၼ်းတူၼ်ႈပႅၵ်ႇ ၶဵင်ႇတၢင်ႇပုတ်ႈ ဝၼ်းဢွၵ်ႇဝႃႇသႃ  2557
ၵၢင်ဝၼ်း - ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ တင်းၸုမ်း IT တႆး တေလူင်းပၼ်ၾွၼ်ႉတႆး ၼႂ်းၾူၼ်ႊမိုဝ်းထိုဝ်
ၵၢင်ၶမ်ႈ    - တႆးၾႆးတဵၼ်းလဵပ်ႈဝတ်ႉ(ဝဵၼ်းတဵၼ်း) တူၼ်ၸဝ်ႈၶူးၿႃးၸုတ်ႇတႆႈတူၼ်ႈပႅၵ်ႇ ပၢင်ၵႃႈၼူၵ်ႉ/တူဝ်း
တၢင်းၵႃႈယိူင်း ၸၢႆးယိင်းၼုမ်ႇတႆး ၵဵင်းမႆႇလၢႆၸုမ်းၶဝ်ႈႁူမ်ႈ။