လုင်းၸၢႆးဢၢႆႈပဝ်း သင်ႇၵိုတ်းၵၢၼ် ၶုတ်းႁႄႈၶုတ်းၶမ်း ၼႂ်းၸႄႈဝဵင်းၼမ်ႉၶမ်း
ဢိင်ၼိူဝ် ၸၢႆးဢၢႆႈပဝ်း ဢွၵ်ႇၶၢဝ်းတၢင်းၵႂႃႇတီႈ ဝဵင်းၼမ်ႉၶမ်း
ၸိုင်ႈတႆးပွတ်းႁွင်ႇသေၸီႉသင်ႇ ႁႂ်ႈၵိုတ်း ၵၢၼ်ၶုတ်းႁႄႈ ၶုတ်းၶမ်း
ၼႂ်းၸႄႈဝဵင်းၼမ်ႉၶမ်းလႄႈ ၵၢၼ်ၶုတ်းႁႄႈၶုတ်းၶမ်း လႆႈၵိုတ်းယင်ႉၵႂႃႇ။
ၽွင်းလူင်ၾၢႆႇမိူင်းႁႄႈ
လူင်ပွင်ၸိုင်ႈမိူင်းတႆး ၸၢႆးဢၢႆႈပဝ်း (ႁူဝ်ပဝ်ႈပႃႇတီႇသိူဝ်ၽိူၵ်ႇ
SNDP)ႁွတ်ႈၽႅဝ်တီႈဝဵင်း ၼမ်ႉၶမ်း ၸိုင်ႈတႆးပွတ်းႁွင်ႇ၊ မိူဝ်ႈဝၼ်းတီႈ
19/09/2014 သေ ၵႂႃႇၵူတ်ႇထတ်းတူၺ်းၼႂ်းပိုၼ်ႉတီႈ ဢၼ်ၶုတ်းႁႄႈ ၶုတ်းၶမ်း
ၼႂ်းၸႄႈဝဵင်းၼမ်ႉၶမ်းယဝ်ႉ ၸီႉသင်ႇႁႂ်ႈၵိုတ်း။
မၼ်းၸဝ်ႈလၢတ်ႈတၢင်းပၢၵ်ႇတင်းသဵင်ဝႃႈ-
လၢတ်ႈတီႈလုမ်းၾၢႆႇၽွင်းငမ်း ၵူႈလွင်ႈလွင်ႈဝႃႈ - ပေႃးဢမ်ႇပႃး ၵၢင်ၸႂ်
ၵူၼ်းမိူင်း၊ ၵူၼ်းမိူင်းဢမ်ႇလႆႈၸႂ်ၼႆႁႂ်ႈၵိုတ်းၵၢၼ်ၶုတ်းႁႄႈၶုတ်းၶမ်း/
တေႃႉတၢင်ႇႁႄႈၶမ်း ၼႂ်းပိုၼ်ႉတီႈၸိူဝ်းၼႆႉ တင်းသဵင်ႈ၊
ၽႂ်တိုၼ်းတေဢမ်ႇလႆႈဢၼုၺၢတ်ႈ ၶုတ်းႁႄႈၶုတ်းၶမ်း။ ၵွပ်ႈၼႆလႄႈ
ႁၢၼ်ႉတေႃႇထိုင်မိူဝ်ႈလဵဝ်ၼႆႉ ၵၢၼ်ၶုတ်းႁႄႈၶုတ်းၶမ်း
တီႈၼႂ်းၸႄႈဝဵင်းၼမ်ႉၶမ်းၵိုတ်းယင်ႉဝႆႉ၊ ၵူၺ်းၵႃႈ ၵိုတ်းဝႆႉသေတႃႉၵေႃႈ
တိုၵ်ႉမီးလူတ်ႉၵႃး ဢွၼ်ႇ ၶွမ်ႊပၼီႊၶုတ်းႁႄႈၶဝ် တိုၵ်ႉၵႂႃႇၵႂႃႇမႃးမႃးယူႇ-
ၵႅမ်ႁူဝ်ပဝ်ႈ ၾၢႆႇၵမ်ႉၸွႆႈၾၢႆႇၽွင်းငမ်းၸႄႈဝဵင်း ၸၢႆးသၢႆသႅင်ဝၼ်း လၢတ်ႈ။
ပူၼ်ႉမႃးမိူဝ်ႈဝၼ်းတီႈ 05/09/2014
ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၼမ်ႉၶမ်း ၼပ်ႉႁူဝ်ႁဵင်ႁူမ်ႈၵၼ်
ၼႄၵၢင်ၸႂ် သၢၼ်ၶတ်း တုၵ်းယွၼ်းႁႂ်ႈၵိုတ်းယိုတ်း ၵၢၼ်ၶုတ်းႁႄႈၶုတ်းၶမ်း
ၼႂ်းၸႄႈဝဵင်းၼမ်ႉၶမ်း။ ၶေႃႈတုၵ်းယွၼ်းယင်းလၢတ်ႈ ဝႃႈ-
ႁႂ်ႈၵိုတ်းၵၢၼ်ၶုတ်းႁႄႈၶုတ်းၶမ်းၵမ်းလဵဝ်။ သင်ၸိူဝ်ႉဝႃႈ ၶွမ်ႊပၼီႊၶဝ်
သိုပ်ႇၶုတ်းႁႄႈၶုတ်းၶမ်းၵႂႃႇတိၵ်းတိၵ်းၸိုင် ၵူၼ်းမိူင်းတေၼႄၵၢင်ၸႂ်
သၢၼ်ၶတ်းၵႂႃႇႁၢဝ်ႈႁၢဝ်ႈႁႅင်းႁႅင်း- ၼႆယဝ်ႉ။
ဢွၼ်ၼႃႈတေၼႄၵၢင်ၸႂ်ၼၼ်ႉ
ၵူၼ်းဝၢၼ်ႈၵူၼ်းမိူင်း ယင်းလႆႈ တၢင်ႇလိၵ်ႈဝႆႉတီႈႁူင်းပလိၵ်ႈ 3-4 လွင်ႈ။
တုၵ်းယွၼ်း 1.ဢၼ်ၶွမ်ႊပၼီႊၶဝ်ၶုတ်းႁႄႈယူႇ ၼႂ်းၸႄႈဝဵင်းၼမ်ႉၶမ်းၼၼ်ႉ
ႁႂ်ႈၵိုတ်းပၼ်တင်းမူတ်း။ 2. ႁႂ်ႈၶွမ်ႊပၼီႊၶဝ် မႄးပၼ်ၶိုၼ်းၼမ်ႉသီးလီး
ဢၼ်လူႉၵွႆ ဢၼ်တၼ်ၵႂႃႇ ယွၼ်ႉပိူဝ်ႈၶုတ်းႁႄႈ၊ ႁႂ်ႈမႄးၶုတ်းပၼ်ၶိုၼ်းလီလီ။
3.ႁႂ်ႈပၼ် ငိုၼ်းသၢႆႈတႅၼ်း တီႈၵူၼ်းဝၢၼ်ႈၵူၼ်းမိူင်း ဢၼ်လိၼ် သူၼ်/ႁႆႈ/ၼႃး
လူႉၵွႆၵႂႃႇၸိူဝ်းၼၼ်ႉ။ ႁႂ်ႈပၼ်ၶိုၼ်းငိုၼ်း သၢႆႈတႅၼ်းတဵမ်တဵမ်ထူၼ်ႈထူၼ်ႈ။
4.လိၼ်သူၼ် ႁႆႈ ၼႃး ဢၼ်လူႉၵွႆၵႂႃႇၸိူဝ်းၼၼ်ႉ ႁႂ်ႈမႄးၵိူင်ပၼ်ၶိုၼ်း
တေႃႇထိုင် ပေႃးၽုၵ်ႇသွမ်ႈလႆႈၶိုၼ်းလီလီ- ၼႆယဝ်ႉ။
ၶွမ်ႊပၼီႊ
ၸိူဝ်းမႃးၶုတ်းႁႄႈၶုတ်းၶမ်းယူႇ ၼႂ်းၸႄႈဝဵင်းၼမ်ႉၶမ်းၼႆႉ ပဵၼ်ၶွမ်ႊပၼီႊ GSM ၊
ငူၺ်ႇၵပႃႇၵျေႃႇ၊ ၼိတ်ႉတိတ်ႉဢႃႊသျႃႊ၊ မျၢၼ်ႇမႃႉမျႃးဢူး၊ ၸဵင်ႇပတေႇတႃႇ၊
ၸွမ်ငိုၼ်းၶမ်း၊ ပၢၼ်းတဵတ်ႉၸႃႇ ၸိူဝ်းၼႆႉ။ ၼွၵ်ႈသေၼၼ်ႉ
မီးထႅင်ႈၶွမ်ႊပၼီႊယွႆႈယႅမ်းထႅင်ႈ။
Tags: Environment, News