ၵၼ် 38

ၶေႃႈမၢႆတွင်း    “တိူဝ်” တီႈၼႆႈပွင်ႇဝႃႈ “သိၼ်ထမ်း”
        ဢမ်ႇၸႂ်ႉၼႂ်းတီႈပွင်ႇဝႃႈ “ဢူငဝ်း” ဢႃႇၼႃႇ။

မီးတိူဝ်သုင် ဢမ်ႇဢၢတ်ႇဝႃႈမီးတိူဝ်
ပွင်ႇဝႃႈမီးတိူဝ်။
မီးတိူဝ်တႅမ်ႇ ဢၢတ်ႇဝႃႈ ဢမ်ႇၶၢတ်ႇတိူဝ်
ပွင်ႇဝႃႈ ဢမ်ႇမီးတိူဝ်။

 ၸိူဝ်းမီးတိူဝ်သုင် ဢမ်ႇပွင်ႉဢမ်ႇၶၢင်း ဢမ်ႇမီးဢဵၼ်းဢၢၼ်း လပ်ႉတႃႇတူဝ်။
    ၸိူဝ်းမီးတိူဝ်တႅမ်ႇ မေႃပွင်ႉမေႃၶၢင်း မီးဢဵၼ်းဢၢၼ်း လပ်ႉတႃႇတူဝ်။

 ၸိူဝ်းမီးမဵတ်ႉတႃႇ ထမ်း မေႃပွင်ႉမေႃၶၢင်း ၵူၺ်းဢမ်ႇမီးဢဵၼ်းဢၢၼ်းလပ်ႉတႃႇတူဝ်။
    ၸိူဝ်းႁဵတ်းလွင်ႈထုၵ်ႇမႅၼ်ႈ မေႃပွင်ႉမေႃၶၢင်း ၵူၺ်း မီးဢဵၼ်းဢၢၼ်းလပ်ႉတႃႇတူဝ်။
    ၸိူဝ်းတိုဝ်းၵမ်ၾိင်ႈထုင်း မေႃပွင်ႉမေႃၶၢင်း ၵူၺ်းဢမ်ႇမီးၽႂ်တွပ်ႇႁပ်ႉ၊ ၶဝ်ၸၢင်ႈဝူတ်ႈၶႅၼ်သိူဝ်ႈယဝ်ႉ  
    တဵၵ်းပိူၼ်ႈၸွမ်း။

 မိူဝ်ႈၶၢတ်ႇတဝ် ၸူးသိၼ်ထမ်း
    မိူဝ်ႈၶၢတ်ႇသိၼ်ထမ်း ၸူးမဵတ်ႉတႃႇထမ်း
    မိူဝ်ႈၶၢတ်ႇ မဵတ်ႉတႃႇထမ်း ၸူးလွင်ႈထုၵ်ႇမႅၼ်ႈ
    မိူဝ်ႈၶၢတ်ႇလွင်ႈထုၵ်ႇမႅၼ်ႈ ၸူးၾိင်ႈထုင်း။

 ၾိင်ႈထုင် ပဵၼ်ပိူၵ်ႇၼွၵ်ႈလွင်ႈယုမ်ႇယမ် (faith) လႄႈ လွင်ႈၾၢၵ်ႇတူဝ်ၾၢၵ်ႇၸႂ် (byalty)
    ႁူႉဢွၼ်တၢင်းပိူၼ်ႈၼႆၼၼ်ႉ ပဵၼ်မွၵ်ႇမႆႉလုၵ်ႉတီႈတဝ်ဢွၵ်ႇမႃး
    ပဵၼ်လွၵ်းတႄႇၶွင်တၢင်းၽိတ်းပိူင်ႈ။

 ၸင်ႇဝႃႈ ၽူႈႁူႉလူင်ႉ သႂ်ႇၸႂ်ၼႂ်းၵႅၼ်ႇတႄႉ ဢမ်ႇသႂ်ႇၸႂ်ပိူၵ်ႇၼွၵ်ႈ
    သႂ်ႇၸႂ်တီႈမၢၵ်ႇ ဢမ်ႇၸႂ်ႈတီႈမွၵ်ႇ
    ပႅတ်ႈၼိုင်ႈ ဢဝ်ၼိုင်ႈ။

ၶေႃႈမၢႆတွင်း
ၽူႈမီးတိူဝ်သုင်ၼၼ်ႉ ဢမ်ႇဢၢတ်ႇ၊ ယွၼ်ႉႁၼ်ဝႃႈ သိၼ်ထမ်းတူဝ်ၵဝ်ႇ ဢၼ်မီးၼၼ်ႉ ယင်းပႆႇပဵင်းပေႃး။

ၵၼ် 39

 ၸဵမ်ၵွၼ်ႇဢွၼ်  မီးၸိူဝ်းႁူမ်ႈပဵၼ်ၼိုင်ႈလဵဝ်ၵၼ်
    ၾႃႉပဵၼ်ၼိုင်ႈ တေပၢင်ႇသႂ်
    လိၼ်ပဵၼ်ၼိုင်ႈ တေၼိမ်သဝ်း
    ၽီပဵၼ်ၼိုင်ႈ တေပဵၼ်တီႈတၢင်ႇသုင်
    ႁူၺ်ႈႁႃႉပဵၼ်ၼိုင်ႈ တေပူင်းၵိုၼ်း
    တူဝ်သတ်းတင်းလၢႆပဵၼ်ၼိုင်ႈ တေၽႄႈတိူၼ်း
    ၶုၼ်မိူင်းၶဝ်ပဵၼ်ၼိုင်ႈ တႂ်ႈၾႃႉတေလႆႈၸိုၼ်ႈၸၢင်ႇ တဵင်ႈထမ်း။

 ၾႃႉဢမ်ႇပၢင်ႇသႂ် တေၸတ်ႉတႅၵ်ႇ
    လိၼ်ဢမ်ႇၼိမ်သဝ်း တေၵူၼ်ႇ
    ၽီဢမ်ႇပဵၼ်တီႈတၢင်ႇသုင် တေဝွတ်ႈဝၢႆး
    ႁူၺ်ႈႁႃႉဢမ်ႇပူင်းၵိုၼ်း တေႁႅင်ႈလႅင်ႉ
    တူဝ်သတ်း ဢမ်ႇၽႄႈတိူၼ်း တေၸူမ်ႁၢႆ
    ၶုၼ်မိူင်းဢမ်ႇတဵင်ႈထမ်း တေပင်းလူႉ။

 ၵိုင်ႇဝႃႈ မုၼ်ယႂ်ႇ မီးတမ်ႇတွႆႈပဵၼ်ၵဝ်ႉ
   သုင် မီးတႅမ်ႇပဵၼ်ငဝ်ႈ
    ၸင်ႇဝႃႈ ၶုၼ်မိူင်းၶဝ်ႁဵၵ်ႈတူဝ်ၵဝ်ႇဝႃႈ
    ပဵၼ် “လုၵ်ႈတိၼ်ႇၾႃႉ”
    မိူၼ်ဝႃႈဢဝ် လွင်ႈတူၵ်းတႅမ်ႇ ပဵၼ်ငဝ်ႈႁၢၵ်ႈၶဝ်ႁိုဝ် ?။

 ၸင်ႇဝႃႈ ၼႃႈတႃၸိုဝ်ႈသဵင်သုင်ပူၼ်ႉ မိူၼ်ဢမ်ႇမီး
    ၼႃႈတႃၸိုဝ်ႈသဵင် (honor)
    ဢမ်ႇၶႂ်ႈႁိူဝ်ႈသႂ်မိူၼ် သႅင်ၶဝ်
    ၶႂ်ႈလႅပ်ႈငၢႆႈ (simple) မိူၼ်ၵွၼ်ႈႁိၼ်ၵူၺ်း။

ၶေႃႈမၢႆတွင်း
ၶႄႇၼႆႉ ယုမ်ႇယမ်ဝႃႈ ၵူႈသမ်ႇသႅၼ်ပိူင်ၼႂ်းလေႃးၵ မီးထၢတ်ႈယိင်း (ယိၼ် Yin) လႄႈ ထၢတ်ႈၸၢႆး (ယၢင် Yang) ။ ပေႃး 2 ပိူင်ၼၼ်ႉ ၶဝ်ႈၵၼ် (ၾၢႆႇၼိုင်ႈပဵၼ်ၾႆးၵေႃႈ ထႅင်ႈၾၢႆႇၼိုင်ႈပဵၼ်ၼမ်ႉ) ၽႂ်ဢမ်ႇပူၼ်ႉၽႂ် ၸင်ႇဝၢၼ်ႈမိူင်းၼႆႉ တေၵတ်းယဵၼ်လွတ်ႈလႅဝ်း လႄႈၶိုၼ်ႈယႂ်ႇ။