ပၢင်ပိုတ်ႇၶျူဝ်ႊရုမ်ႊ ႁၢၼ်ႉၶၢႆရူတ်ႉမိုဝ်းသွင် ၸိူၼ်းၼွင်ႉၼႅၼ်း ၶဝ်ႈႁူမ်ႈပဵၼ်မွၵ်ႇၼႃႈ



ၼွင်ႉၼႅၼ်း (ၼွင်ႉၼုတ်း) ထုၵ်ႇၸိူၼ်းၵႂႃႇပဵၼ်မွၵ်ႇၼႃႈ ပိုတ်ႇၶျူဝ်ႊရုမ်ႊ ႁၢၼ်ႉၶၢႆရူတ်ႉမိုဝ်းသွင် ယႂ်ႇသုတ်း ၼႂ်းၸိုင်ႈထႆးပွတ်းႁွင်ႇ တီႈ လၢမ်းပၢင်း။


ဝၼ်းတီႈ 28/08/2014 ၼႆႉၶွမ်ႊပၼီႊၼူပ်ႊၽၻူလ်ႊထုရၵိၸ်ယူၼ်ႊ တီႈၸႄႈဝဵင်းလမ်းပၢင်း ပိုတ်ႇ ၶျူဝ်ႊရုမ်ႊ ႁၢၼ်ႉၶၢႆရူတ်ႉမိုဝ်းသွင် ယႂ်ႇသုတ်းၼႂ်းပွတ်းၼိူဝ် ႁိုဝ် ၸိုင်ႈထႆးပွတ်းႁွင်ႇ ၸႄႈဝဵင်းလမ်းပၢင်း တီႈမၢႆ 79/1 သဵၼ်ႈတၢင်းၽႁူလ်ယူဝ်ႊထိၼ်း ဢိူင်ႇသူပ်းတုၺ် ၸႄႈဝဵင်းမိူင်း ၸႄႈတွၼ်ႈလမ်းပၢင်း လႄႈလႆႈဝွၵ်ႇ ၸိူၼ်းဢဝ်ၼွင်ႉၼႅၼ်း ႁိုဝ် ၼွင်ႉၼုတ်း သၢဝ်တႆးဝၢၼ်ႈၼႃးလွႆ ဢိူင်ႇထုင်ႉပူင်း ၸႄႈတွၼ်ႈတူၼ်ႈတီး ၵေႃႉဢၼ်သမႃးၶူမ်းၸုမ်းထၢႆႇႁၢင်ႈ ၵဵင်းမႆႇ သူၼ်ၸႂ်ထုၵ်ႇတႃ လိူၵ်ႈ ၼွင်ႉၼႅၼ်းသေထၢႆႇႁၢင်ႈ ထၢႆႇဝႅပ်ႇမႃး ထိုင်တီႈ ၼွင်ႉၼႅၼ်း ပေႃးမီးၸိုဝ်ႈလိုဝ်းလင်ၼၼ်ႉ လႆႈၸိူၼ်းဝွၵ်ႇၵႂႃႇပဵၼ်ၼႃႈပဵၼ်တႃ ပဵၼ်မွၵ်ႇၼႃႈ ၼႂ်းပၢင် ပိုတ်ႇ ၶျူဝ်ႊရုမ်ႊ ႁၢၼ်ႉၶၢႆရူတ်ႉ မိုဝ်းသွင် ထိုင်တီႈၸႄႈဝဵင်းမိူင်းၸႄႈတွၼ်ႈလမ်းပၢင်း။

ၼွင်ႉၼႅၼ်းပိုတ်ႇလၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ - ဢိင်လူၺ်ႈ ၽူႈၸတ်းၵၢၼ် ၶွမ်ႊပၼီႊၼူပ်ႊၽၻူလ်ႊ ထုရၵိၸ်ယူၼ်ႊ လႆႈၸိူၼ်းဝွၵ်ႇပဵၼ်တၢင်းၵၢၼ်မႃး၊ ၾၢႆႇၼိုင်ႈၵေႃႈ ပဵၼ်ၵူၼ်းႁူႉၸၵ်းမိုတ်ႈၵိုဝ်းၸမ်ၸႂ်ၵၼ် လႄႈလႆႈၵႂႃႇၶဝ်ႈႁူမ်ႈၸွမ်းၼင်ႇၵၢၼ်ဝွၵ်ႇၸိူၼ်းမႃး။ ပၢင်ပိုတ်ႇၶျူဝ်ႊရုမ်ႊ ႁၢၼ်ႉၶၢႆရူတ်ႉမိုဝ်းသွင်ၼႆႉ လႆႈၸတ်း ပႃးပၢင်ၼႃးမုၼ် လဵင်ႉၽဵလ်း(ၵၢပ်ႈသွမ်း) သင်ၶၸဝ်ႈ ႁဵတ်းပၢင်လူႇတၢၼ်းပဵၼ်မင်းၵလ(မူင်းၶူလ်ႊ) ဢိၵ်ႇတင်း ၶႅၵ်ႇၽူႈယႂ်ႇၵူၼ်းလူင် ၾၢႆႇၽွင်းငမ်းဝၢၼ်ႈမိူင်း၊ ၾၢႆႇလွင်ႈမၼ်ႈၼိမ်ယဵၼ်၊ ၾၢႆႇသိုၵ်းလႄႈၽူႈႁဵတ်းၵၢၼ်ၵႃႉ ၵၢၼ်မၢၵ်ႈမီး ၶဝ်ႈႁူမ်ႈတင်းၼမ်။

လိူဝ်ၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ၵဵဝ်ႇၵပ်း လွင်ႈထုၵ်ႇထတ်းသၢင်ၼိူဝ်ၾဵတ်ႉၶ်ၿုၵ်ႉၸိူဝ်းၼၼ်ႉ မၼ်းၼၢင်းတွပ်ႈလၢတ်ႈဝႃႈ ပဵၼ်လွင်ႈၸႂ်ဢမ်ႇလီတႄႉတႄႉဢေႃႈ ႁဵတ်းသင်ၶႃႈႁဝ်းလႆႈမႃးထုၵ်ႇထတ်းသၢင် ၵႂၢင်ႈၶႂၢင်ယႂ်ႇလူင်သေ ဢဝ်မႃးပဵၼ်တူဝ်ပၼ်ႁႃ ၼႂ်းတူင်ႇဝူင်းၵူၼ်းတႆးႁဝ်းပဵၼ်ထၢၼ်ႇၼႆႉ ၶႃႈၵေႃႈဢမ်ႇႁူႉ လွင်ႈလၢတ်ႈၵႂၢမ်းတႆး ဢမ်ႇလၢတ်ႈၵႂၢမ်းတႆးၼၼ်ႉ ပေႃးပိူၼ်ႈလၢတ်ႈတေႃႇၵႂၢမ်းတႆး ၶႃႈၵေႃႈလၢတ်ႈၵႂၢမ်းတႆး၊ ပေႃးလၢတ်ႈတေႃႇၵႂၢမ်းထႆးၵေႃႈ ၶႃႈတွပ်ႇၵႂၢမ်းထႆး၊ ပေႃးလၢတ်ႈတေႃႇၵႂၢမ်းမၢၼ်ႈၵေႃႈၶႃႈၶိုၼ်းတွပ်ႇၵႂၢမ်းမၢၼ်ႈ ဢမ်ႇႁူႉဝႃႈ မၼ်းၽိတ်းတီႈလႂ်။ ၶူဝ်းၼုင်ႈတၢင်းဝႆၵေႃႈမိူၼ်ၵၼ် မၢင်ပွၵ်ႈမၢင်လႂ်ၼုင်ႈၶူဝ်းတႆး မၢင်ပွၵ်ႈမၢင်လႂ် သၢင်ႇတေႃႇၸိူင်ႉႁိုဝ်ၵေႃႈၼုင်ႈၵႂႃႇဢမ်ႇလႆႈဝူၼ်ႉသင်၊ ၵွပ်ႈၼၼ်သမ်ႉၵႂႃႇဢဝ် ဢၼ်ၶႃႈၼုင်ႈၶူဝ်းပဢူဝ်း ဝႆႉၼၼ်ႉ မႃးလၢတ်ႈဢမ်ႇလီ ၸိူဝ်းၼၼ်ႉ မၼ်းၵေႃႈဢမ်ႇထုၵ်ႇ။ ၶႃႈယူႇထုင်ႉပူင်း ပဵၼ်သၢဝ်တႆးဝၢၼ်ႈၼႃးလွႆ ၼႂ်းၵႄႈၼွင်ဝွၼ်လႄႈသီႇသႅင်ႇ ၵူၺ်းၵႃႈပဵၼ်ၼႂ်းၼႃႈလိၼ်ၽွင်းငမ်းၶွင်ပဢူဝ်း၊ လိူဝ်ၼၼ်ႉၼႂ်းပိုၼ်ႉတီႈႁဝ်းၶႃႈ ယူႇၼႆႉ ၵူၼ်းလၢတ်ႈၵႂၢမ်းမၢၼ်ႈၵႂၢမ်းပဢူဝ်း ၼမ်လိူဝ်ၵႂၢမ်းတႆး ပႆႇဝႃႈသင် တေႃႈၸိူင်ႉၼင်ႇပီႈၸၢႆးသၢႆလႅတ်ႇ ၵူၼ်းတႅမ်ႈႁၢင်ႈလူၼ်ႉ (ၵႃႇတုၼ်ႊ) ၵေႃႈ မိူဝ်ႈယူႇတၢင်းဝၢၼ်ႈၼၼ်ႉ ပီႈၶဝ်ၵေႃႈလၢတ်ႈၵႂၢမ်းမၢၼ်း ၵမ်ႈၼမ် ၵူၺ်း ၵွပ်ႈၼၼ် ထုၵ်ႇလီၶဝ်ႈၸႂ်ပွင်ႇၸႂ်ပၼ်ၶႃႈႁဝ်းၽွင်ႈယူႇ - ဝႃႈၼႆ။

မိူဝ်ႈထၢမ်ဝႃႈ ၵၢင်ၸႂ်ၼႂ်းၶေႃးၼွင်ႉၼႅၼ်းသမ်ႉပဵၼ်ႁိုဝ် - မၼ်းၼၢင်းၵေႃႈတွပ်ႇဝႃႈ - ဢမ်ႇပဵၼ်သင် ၼွင်ႉႁပ်ႉ လႆႈ၊ ၵူၺ်းၵႃႈၸႂ်လဵၵ်ႉၽွင်ႈယူႇ ၵွပ်ႈသင် ၸိုင်ပေႉၶဝ်ႈမႃးၵၢဝ်ႉၵၢႆႇထိုင်သုၼ်ႇတူဝ်ၼွင်ႉပူၼ်ႉတီႈ ပူၼ်ႉလိူဝ် ၼွင်ႉဢမ်ႇလႆႈၵႂႃႇႁဵတ်းႁႂ်ႈၽႂ်ၸဵပ်းၸႂ်သင် တင်းတင်းၵူၼ်းတီႈဢၼ်ပွင်ႉလႃႇၼွင်ႉၵေႃႈ ၼွင်ႉဢမ်ႇႁူႉၸၵ်း၊ ၵူၺ်းၵေႃႈပူတ်ႈဝၢင်းပၼ်ယူႇ။ ၼွင်ႉယူႇၵိၼ်ႁဵတ်းသၢင်ႈၸွမ်းငဝ်းလၢႆးၶွင်ၼွင်ႉ။ မိူဝ်ႈၼွင်ႉဝႃႈ ၼွင်ႉပဵၼ် တႆးၵေႃႈ ထုၵ်ႇလႃႇ၊ မိူဝ်ႈၼွင်ႉလၢတ်ႈၵႂၢမ်းပိူၼ်ႈၵေႃႈထုၵ်ႇလႃႇ၊ ၼွင်ႉဝႃႈၶူးသွၼ်ၼွင်ႉ ပဵၼ်မၢၼ်ႈၼႆၵေႃႈ ဢမ်ႇထုၵ်ႇၸႂ်၊ တေလႆႈႁဵတ်းႁိုဝ်၊ ၶူးသွၼ်လိၵ်ႈၼႂ်းႁူင်းႁဵၼ်းလူင်ပွင်ၸိုင်ႈ ပဵၼ်ၶူးသွၼ်မၢၼ်ႈၵမ်ႈၼမ် ဢမ်ႇဝႃႈ ႁူင်းႁဵၼ်းလႂ်၊ ပေႃးလႆႈၶဝ်ႈႁဵၼ်းလိၵ်ႈ ၼႂ်းႁူင်းႁဵၼ်းလူင်ပွင်ၸိုင်ႈၼႆ မီးၽႂ်ဢၼ်ဢမ်ႇလႆႈထုၵ်ႇၶူးသွၼ်မၢၼ်ႈ သွၼ် ၸဵမ်ၸိူဝ်းၼႆႉ။

ၼွင်ႉၵေႃႈၸႂ်ဢမ်ႇလီ ၵွပ်ႈၼႆလႄႈၶႂ်ႈတုၵ်းယွၼ်းပီႈၼွင်ႉတႆးႁဝ်းၵူႈၵေႃႉ ပေႃးႁဝ်းႁၵ်ႉ ၸိူဝ်ႉၸၢတ်ႈဝၢၼ်ႈမိူင်းၾိင်ႈငႄႈလိၵ်ႈလၢႆးႁဝ်းၼႆ တႃႉႁဝ်းဢွမ်ႇလွမ်ႈၽွမ်ႉၸွႆႈၵၼ် ဢမ်ႇလီႁိုဝ် ၽိူဝ်ႇတေ ပၵ်းတႃပႂ်ႉသႄႉၼႄးႁႃတၢင်းၽိတ်းၵၼ်ႁႃႉ။ ယွၼ်ႉၵွပ်ႈႁဝ်းဢမ်ႇၽွမ်ႉၵၼ်လႄႈဝၢၼ်ႈမိူင်းႁဝ်းၵေႃႈ ႁဝ်းဢမ်ႇ လႆႈပူၵ်းပွင်ၽွင်းငမ်းလူၺ်ႈၼမ်ႉမိုဝ်း လူၺ်ႈၸႂ်ၶွင်ႁဝ်း - ဝႃႈၼႆ။




 
© 2012 All Rights Reserved | Asean Celebrity | Fonts @ AtFonts | Free Templates