CSSU သပ်းၸႅင်ႈ ၵၢၼ်ၽွမ်ႉႁူမ်ႈတႆး ဢိၵ်ႇ လွင်ႈတပ်ႉသိုၵ်းတႆး ပိၼ်ႇပႆႇၸွႆႈထႅမ်ၵၼ်
ၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇတွင်ႈထၢမ် ၸဝ်ႈပိုၼ်ၶမ်း၊ ၵဵဝ်ႇၵပ်းလွင်ႈ
ၶၢဝ်းတၢင်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) လူင်းပိုၼ်ႉတီႈ
သပ်းလႅင်းၼႄၼႃႈၵၢၼ် CSSU ၼႂ်းၸိုင်ႈတႆး လၢႆလၢႆၸႄႈဝဵင်း။
ၵၢၼ်ၽွမ်ႉႁူမ်ႈတပ်ႉသိုၵ်း တႆးၼၼ်ႉ မီးၶေႃႈတူၵ်းလူင်းၵၼ်ဝႆႉ
လွင်ႈပိၼ်ႇပႆႇၸွႆႈထႅမ်ၵၼ်- မၼ်းၸဝ်ႈတွပ်ႇဝႆႉ ၼင်ႇၼႆ။
ၸဝ်ႈပိုၼ်ၶမ်း ၼႂ်းပၢင်ႁၢႆးငၢၼ်းၼႄ ၸုမ်းၽူႈၼမ်းၼႂ်း ၶွင်ႇသီႇဢဝ်ၶိုၼ်းၸိုင်ႈတႆး (RCSS) ပူၼ်ႉမႃးမိူဝ်ႈဝၼ်းတီႈ 14/07/2014 |
(တွၼ်ႈ 2 ၊ သိုပ်ႇမႃးတွၼ်ႈ 1)
ထၢမ်-ယွၼ်းတွင်ႈထၢမ်တူၺ်း ၵၢင်ၸႂ်ၸဝ်ႈႁဝ်း ၸဝ်ႈပိုၼ်ၶမ်း ႁၼ်ထိုင်ၸိူင်ႉႁိုဝ်ၶႃႈ။ မိူဝ်ႈလဵဝ်ၼႆႉ ပၢင်တိုၵ်းၵေႃႈ သမ်ႉပဵၼ်ယူႇပွတ်းၵေးသီး၊ သိုၵ်းမၢၼ်ႈတင်းသိုၵ်းတႆးၵေႃႈ ယိုဝ်းၵၼ်ယူႇၵူႈမိုဝ်ႉၵူႈဝၼ်း။ ၵူၼ်းမိူင်းၵေႃႈဝႃႈ သိုၵ်းတႆး ပွတ်းၸၢၼ်းၼႆႉ ဢမ်ႇၸွႆႈႁႃႉ။ လွင်ႈတပ်ႉသိုၵ်းသွင်တပ်ႉ တေပဵၼ်ဢၼ်လဵဝ်ၵၼ်ၼႆႉ ယူႇတီႈၸဝ်ႈႁဝ်းထတ်းသၢင် ႁၼ်ထိုင်ၸိူင်ႉႁိုဝ်ၶႃႈ၊ ၸွင်ႇမၼ်းတေငၢႆႈယူႇၶႃႈႁႃႉ။
တွပ်ႇ- တႃႇသိုၵ်းသွင်ၸုမ်း
တေပဵၼ်ဢၼ်လဵဝ်ၵၼ်ၼႆႉ ၶဝ်ၸဝ်ႈၵေႃႈတင်ႈဝႆႉၶွမ်ႊမတီႊသေ ဢုပ်ႇၵၼ်လၢႆပွၵ်ႈယဝ်ႉ၊
ၵွပ်ႈပိူဝ်ႈဢုပ်ႇၵၼ်လၢႆပွၵ်ႈယဝ်ႉလႄႈပိူဝ်ႈတႃႇပဵၼ်ဢၼ်ၼိုင်ႈဢၼ်လဵဝ်ၼၼ်ႉ
ပွတ်းၸၢၼ်းတင်းပွတ်းႁွင်ႇတိုၼ်းၶတ်း ၸႂ်ယူႇ။ ၼႂ်းသွင်ၸုမ်း
မီးဝႆႉၶေႃႈတူၵ်းလူင်းဢၼ်ဝႃႈ ထုၵ်ႇလီပိၼ်ႇပႆႇ ၸွႆႈထႅမ်ၵၼ်။
ဢၼ်ပဵၼ်သိုၵ်းယူႇယၢမ်းလဵဝ် တႄႉ ယူႇတီႈသုၼ်ႇတူဝ်ႁဝ်းႁၼ်ထိုင်တႄႉ
တပ်ႉသိုၵ်းလူင်ပွင်ၸိုင်ႈတႄႉ ၶဝ်ၶႂ်ႈၸႅၵ်ႇ ဢမ်ႇၶႂ်ႈႁႂ်ႈသွင်ၸုမ်းၼႆႉၸမ်ၵၼ်
ၽွမ်ႉႁူမ်ႈၵၼ်၊ ၶဝ်ၶႂ်ႈၸႅၵ်ႇသေ ၵဝ်းပွၵ်ႈၸုမ်းၸုမ်း
ႁႂ်ႈမၼ်းလူႉလႅဝ်ၵႂႃႇၸုမ်းလႂ်ၸုမ်းၼၼ်ႉ။
ၵွပ်ႈပိူဝ်ႈၶဝ်
မီးၵတိပိၼ်ႇပႆႇၸွႆႈထႅမ်ၵၼ်ယူႇလႄႈ ပေႃးထိုင်ၶၼ်ႈတီႈ လိုၼ်းသုတ်းမႃး
ၶဝ်တိုၼ်းတေၸွႆႈၵၼ်၊ သုၼ်ႇတူဝ်တႄႉ ႁဝ်းတိုၼ်းယုမ်ႇၸိူင်ႉၼႆ။ ၵွပ်ႈၼႆ
ပေႃႈမႄႈပီႈၼွင်ႉၵူၼ်းမိူင်းၵေႃႈ ၵွပ်ႈပိူဝ်ႈဢမ်ႇႁူႉလွင်ႈဢၼ်
ၶဝ်ၸဝ်ႈတူၵ်းလူင်းၵၼ်ဝႆႉၼၼ်ႉလႄႈ ၸွမ်းမႆႈၸႂ်ယူႇ။ ႁဝ်းဝႃႈတႄႉ
ၵွပ်ႈပိူဝ်ႈပဵၼ်ၵူၼ်းႁၵ်ႉၸိူဝ်ႉၸၢတ်ႈ ဝၢၼ်ႈမိူင်း လႄႈ ထုၵ်ႇလီမႆႈၸႂ်ယူႇ၊
ၵူၺ်းၵႃႈ ယႃႇပေမႆႈၸႂ်ထိုင်ၶၼ်ႈဝႃႈ ၶဝ်တေလူႉတေလႅဝ်ယဝ်ႉ။
ၼင်ႇႁိုဝ်တေဢမ်ႇထိုင် ၶၼ်ႈလူႉလႅဝ်ၼၼ်ႉ ၶဝ်မီးလွင်ႈပိၼ်ႇပႆႇၸွႆႈထႅမ်ၵၼ်ယူႇ-
သုၼ်ႇတူဝ်ႁဝ်း ၶႂ်ႈလၢတ်ႈၼႄပီႈၼွင်ႉၵူၼ်းမိူင်းလႄႈ သင်ၶၼင်ႇၼႆ။
ထၢမ်-
ၶၢဝ်းတၢင်းၸဝ်ႈႁဝ်းၶဝ်မိူဝ်းၼႂ်းမိူင်း သပ်းလႅင်းၼႄ
လွင်ႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼႆႉ ပေႃႈမႄႈၵူၼ်းမိူင်းႁဝ်း
သမ်ႉဢုပ်ႇလၢတ်ႈၸိူင်ႉႁိုဝ်ၶႃႈ။
တွပ်ႇ- ၶဝ်ၵေႃႈဝႃႈ ဢွၼ်တၢင်း
လွင်ႈၽွမ်ႉႁူမ်ႈတႆးၼႆႉ ႁဝ်းႁဵတ်းမႃးလၢႆပွၵ်ႈယဝ်ႉ၊ သိုၵ်းၵေႃႈယၢမ်ႈလႆႈ
ယိုၼ်ႈမိုဝ်း ႁဵတ်းမႃး၊ ၼႂ်းမိူင်းၵေႃႈလႆႈယိုၼ်ႈမိုဝ်းႁဵတ်းမႃး၊ ၵူၺ်းၵႃႈ
ဢမ်ႇပဵၼ်မႃးသေပွၵ်ႈ၊ ပဵၼ်ပဵၼ်လူႉလူႉယူႇ တိၵ်းတိၵ်း၊ ၵွပ်ႈဝႃႈၽွင်းၼၼ်ႉ
မၼ်းပႆႇပႃးၸုမ်းႁႅင်းယႂ်ႇမၼ်းၵူႈမူႇၵူႈၸုမ်း၊ ပႃးၵေႃႈပႃးၸုမ်းၼိုင်ႈ
ၸုမ်းလႂ်ၵူၺ်း။ မိူဝ်ႈလဵဝ်တႄႉ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးၼႆႉ
လႆႈႁၼ်ပႃးမႃးတင်း 4 ၸုမ်း၊ သွင်ပႃႇတီႇသွင်တပ်ႉသိုၵ်းၼႆလႄႈ လႆႈဝႃႈၸုမ်းယႂ်ႇ
မၼ်းပႃးမႃးလႄႈ တေမၼ်ႈၵိုမ်းၵႂႃႇယူႇ- လႆႈႁၼ်ၸိူင်ႉၼႆ။
ၸူမ်းၵေႃႈယိၼ်းၸူမ်းၸွမ်း၊ ၵူၺ်းၵႃႈ ၵၢင်ၸႂ်ၵူၼ်းမိူင်း 80% တႄႉ
တိုၼ်းတုၵ်းယွၼ်းဝႃႈ ႁႂ်ႈသွင်ပႃႇတီႇ ပဵၼ်ပႃႇတီႇလဵဝ်၊
ႁႂ်ႈသွင်တပ်ႉသိုၵ်းပဵၼ်တပ်ႉသိုၵ်းလဵဝ်
ပိူဝ်ႈတႃႇၽွၼ်းလီၵၢၼ်မိူင်းတႆးႁဝ်းမိူဝ်းၼႃႈၼႆတႄႉ ဢွၼ်ၵၼ်တုၵ်းယွၼ်းယဝ်ႉ။
ယဝ်ႉၵေႃႈ ဢၼ်ႁၼ်လီၼိူဝ်
ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ႁဝ်းၼႆႉၵေႃႈမီး။ ႁႂ်ႈပေႃးပဵၼ်
ဢၼ်လဵဝ်ၵၼ် ၼၼ်ႉၵေႃႈတုၵ်းယွၼ်း။ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU)
ၼႆႉၵွပ်ႈပိူဝ်ႈမီးဝႆႉႁူဝ်ပဝ်ႈ 4 ၸဝ်ႈလႄႈ
ၼင်ႇႁိုဝ်တေဢွၼ်ႁူဝ်ၵႂႃႇမိူဝ်းၼႃႈလႆႈတႅၵ်ႇတႅၵ်ႇလႅင်းလႅင်းၼၼ်ႉ
သင်ဝႃႈလိူၵ်ႈလႆႈႁူဝ်ပဝ်ႈ ၼိုင်ႈၵေႃႉၶႅၼ်းလီ- ၶဝ်ၸဝ်ႈတႄႉ
ပၼ်တၢင်းႁၼ်ထိုင်ၼင်ႇၼႆ။
ထၢမ်-ပေႃးထၢမ်သိုဝ်ႈသိုဝ်ႈၵေႃႈ
ၼႂ်းသီႇၸဝ်ႈၼႆႉ ၶႂ်ႈႁႂ်ႈမီးၽူႈဢွၼ်ႁူဝ် မီးႁူဝ်ပဝ်ႈၵေႃႉလဵဝ်။
ပေႃးပဵၼ်ၸိူင်ႉၼၼ် ၵူၼ်းမိူင်းသမ်ႉ ၵမ်ႈၼမ်တုၵ်းယွၼ်းၽႂ်ၶႃႈ။
တွပ်ႇ-လွင်ႈၼၼ်ႉတႄႉ
ၶႂ်ႈတုၵ်းယွၼ်းၵေႃႉလႂ်ၼႆ ၶဝ်ၵေႃႈဢမ်ႇပၼ်တၢင်းႁၼ်ထိုင်။ ဢၼ်ပၼ်တၢင်း
ႁၼ်ထိုင်တႄႉ ထုၵ်ႇလီမီးႁူဝ်ပဝ်ႈၵေႃႉလဵဝ်ဢွၼ်ႁူဝ်၊ ၵူၺ်းၵႃႈ
ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼႆႉ တေလႆႈ
(လူဝ်ႇ)ၶိုၼ်းႁဵတ်းပၢင်ၵုမ်ၵၼ်သေလိူၵ်ႈ၊
လိူၵ်ႈႁႂ်ႈပေႃးၵိုင်ႇလႅပ်ႈဢွၼ်ႁူဝ်မိူင်းတႆး ဢွၼ်ႁူဝ်ၵၢၼ်မိူင်း
မိူင်းတႆးႁဝ်း၊ ယူႇတီႈ CSSU သေလိူၵ်ႈ။ ထုၵ်ႇလီပဵၼ်ၵေႃႉလႂ် ပဵၼ်ၽႂ်ၸိူဝ်းၼႆႉ
ၶဝ်ၵေႃႈဢမ်ႇပၼ် တၢင်းႁၼ်ထိုင်ၼင်ႇၵဝ်ႇ။
ထၢမ်- တွၼ်ႈၶၢဝ်းတၢင်း
ဢၼ်လုၵ်ႉလႅၼ်လိၼ်သေ မိူဝ်းၵႂႃႇၼႂ်းမိူင်းတႆးလၢႆလၢႆတီႈၼႆႉ ၵႃႈပူၼ်ႉမႃး
တႃႇတေဢုပ်ႇ ဢူဝ်းၵၢၼ်မိူင်းၵေႃႈယၢပ်ႇ၊
ၾၢႆႇၸွပ်ႇၶၢဝ်ႇမၢၼ်ႈၵေႃႈၸွမ်းသူၼ်ႈယူႇတိၵ်းတိၵ်း၊ လွင်ႈၼႆႉ
ၸွင်ႇမီးလွင်ႈယၢပ်ႇၽိုတ်ႇ။
တွပ်ႇ- ႁဝ်းမိူဝ်းၵမ်းၼႆႉတႄႉ
ဢမ်ႇမီးလွင်ႈယၢပ်ႇၽိုတ်ႇသင်၊ မၢင်တီႈၵေႃႈ လႆႈပွင်ႇပၼ်ၸဝ်ႈၼႃႈတီႈ
ၾၢႆႇၽွင်းငမ်း ၶဝ်ယူႇ၊ မၢင်တီႈၵေႃႈဢမ်ႇလႆႈပွင်ႇ၊ ၵွပ်ႈပိူဝ်ႈတီႈလႂ်တီႈၼၼ်ႈ
ၶဝ်ၵေႃႈမီးငဝ်းလၢႆးတီႈလႂ်တီႈၼၼ်ႈ၊ တီႈဢၼ်ဢမ်ႇပွင်ႇ ၵေႃႈမီး၊ မၢင်တီႈၵေႃႈဝႃႈ
ထုၵ်ႇလီလႆႈပွင်ႇၼႆၵေႃႈ ၶဝ်ၵေႃႈပွင်ႇပၼ်ယူႇ။ မိူၼ်ၼင်ႇ
မိူဝ်ႈႁဝ်းတေမိူဝ်းၵေႃႈ ႁဝ်းလႆႈလၢတ်ႈ ပၼ်ၸဝ်ႈၼႃႈတီႈၾၢႆႇၽွင်းငမ်းၶဝ်
မိူၼ်ၼင်ႇၾၢႆႇႁူမ်ႇလူမ်ႈသိုၵ်း (ၸယၽ)ၶဝ်၊
ၸုမ်းၾၢႆႇၶိုင်ပွင်လွင်ႈငမ်းယဵၼ်ၶဝ်၊ ၾၢႆႇမၢၼ်ႈၶဝ်ၸိူဝ်းၼႆႉ
ႁဝ်းလႆႈပွင်ႇၶဝ်သေမိူဝ်းယူႇ တီႈတႃႈၶီႈလဵၵ်း-ၵဵင်းတုင် ၸိူဝ်းၼႆႉ။
လိူဝ်သေၼၼ်ႉတႄႉ ဢမ်ႇလႆႈပွင်ႇတီႈလႂ်၊ မၢင်တီႈၵေႃႈ
ၶဝ်လႅပ်ႈၶိုၼ်းပွင်ႇၵၼ်ယူႇ။ မၢင်တီႈၵေႃႈ ၶဝ်ၵေႃႈမႃးထၢမ်ႁဝ်းဝႃႈ မႃးလၢႆၵေႃႉ၊
ၼွၼ်းတီႈလႂ်ၸိူဝ်းၼႆႉ၊ ၵူၺ်းၵႃႈ ၶဝ်ဢမ်ႇမႃးၵဝ်းသင်ၼင်ႇၵဝ်ႇ။
မႃးႁဵတ်းသင်ၼႆၵေႃႈ ဢမ်ႇထၢမ်၊ ၶဝ်ဢမ်ႇမႃးႁၢမ်ႈ မႃးၵဝ်း ဢမ်ႇမႃးထၢမ်
ၸိၵ်းၶိၵ်းၸွၵ်းၶွၵ်း မိူၼ်ၵူႈပွၵ်ႈဝႃႈ မႃးလၢတ်ႈလွင်ႈသင်၊
ႁွင်ႉၽႂ်ၵူၺ်းၵူၺ်း၊ ပဵၼ်ၽႂ်ၵူၺ်းၵူၺ်းၸိူဝ်းၼႆႉ ၶဝ်ဢမ်ႇထၢမ်မိူၼ်ၵူႈပွၵ်ႈ၊
ဝႂ်ၵပ်းတူဝ် (မၢတ်ႈပူင်ႇတိၼ်ႇ) ၵေႃႈဢမ်ႇထၢမ်သင်။
ထၢမ်- ဢိင်ၼိူဝ်ၶၢဝ်းတၢင်း
ဢၼ်လႆႈမိူဝ်းႁူပ်ႉထူပ်း ပီႈၼွင်ႉၵူၼ်းမိူင်းတႆးႁဝ်းၶႃႈ ၼႂ်း 22
ၸႄႈဝဵင်းၼႆႉသေ ယူႇတီႈၵေႃႉပဵၼ်ႁူဝ်ၼႃႈ ၾၢႆႇ Sub-committee
ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးသေ ၶႂ်ႈမွၵ်ႇလၢတ်ႈ ၸိူင်ႉႁိုဝ်ထႅင်ႈၶႃႈ။
တွပ်ႇ- ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး
(CSSU) ႁဝ်း မီးဝႆႉၸုမ်းႁဵတ်းၵၢၼ် ၸုမ်းႁူဝ်ပဝ်ႈလႄႈ ၸုမ်းၽူႈၼမ်းၼႂ်း၊
ပေႃးဝႃႈၸုမ်းႁူဝ်ပဝ်ႈ ပဵၼ်ၸုမ်းယိပ်းပေႃႇလသီႇ၊
ပဵၼ်ၵူၼ်းဝၢင်းၽႅၼ်သဵၼ်ႈတၢင်း။ ၸုမ်းၽူႈၼမ်းၼႂ်းၼႆႉ ပဵၼ်ၸုမ်းႁဵတ်းၵၢၼ်၊
ၸုမ်းၽူႈၼမ်းၼႂ်းၼႆႉ ႁဝ်းတေပၼ်ႇၵၼ်ဝႃႈ ပီၼႆႉတူၵ်း ၸုမ်းၼၼ်ႉ ၸုမ်းၼႆႉ။
ၵူၺ်းၵႃႈ ပီၼၼ်ႉပီၼႆႉ တူၵ်းၸုမ်းၼၼ်ႉၸုမ်းၼႆႉသေတႃႉၵေႃႈ ဢွၼ်တၢင်းသုတ်းၼႆႉ
ၼႂ်းပၢင်ၵုမ်သမ်ႉမွပ်ႈပၼ်တၢင်းလွႆတႆးလႅင်းလႄႈ လွႆတႆးလႅင်းလႆႈဢွၼ်ႁူဝ်ဝႆႉ၊
ၸဝ်ႈပွင်ၶိူဝ်း ပဵၼ်ႁူဝ်ၼႃႈၸုမ်းၽူႈၼမ်းၼႂ်းသေ တင်းမူတ်းမီး 15 ၵေႃႉ၊
ပႃးၵူႈၸုမ်းၸုမ်းသေမႃးႁဵတ်းၵၢၼ်ၸွမ်းၵၼ် တူင်ႉၼိုင်ႁဵတ်းၵၢၼ်ၵႂႃႇ၊
ပိူင်လူင်မၼ်း မိူဝ်ႈလဵဝ်လႄႈမိူဝ်းၼႃႈ တူင်ႉၼိုင်ၵၢၼ်သူၼ်းတုမ်
ႁႂ်ႈပဵၼ်လွင်ႈ ၽွမ်ႉႁူမ်ႈတႃႇမိူင်းတႆးႁဝ်း။
Tags: Interview, Politic