ၶွမ်ႊပၼီႊ 10 ဢၼ်မႃးၶုတ်းၶမ်းၼႂ်းၸႄႈတွၼ်ႈတႃႈၶီႈလဵၵ်း၊ ၵိင်ႇၸႄႈဝဵင်းတႃႈလိူဝ်ႇ ၼႂ်းဢိူင်ႇမိူင်းလဵၼ်းပွတ်းတူၵ်း၊ ပွတ်းထုင်ႉလွႆၶမ်းၼၼ်ႉႁဵတ်းႁႂ်ႈၸဝ်ႈႁႆႈၸဝ်ႈၼႃးဝၢၼ်ႈၼႃးႁႆးလူင်လႄႈဝၢၼ်ႈဝဵင်းမၼေႃႇႁူပ်ႉထူပ်းတၢင်းယၢပ်ႇၽိုတ်ႇၵဵဝ်ႇၵပ်းလွင်ႈၼႆႉသေ ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးႁူမ်ႈၵၼ်ၵႂႃႇႁွတ်ႈၽႅဝ်တီႈဝဵင်းတူၼ်ႈတီးသေ ၸတ်းႁဵတ်းပၢင် သပ်းလႅင်းၸႅင်ႈၶၢဝ်ႇတီႈႁၢၼ်ႉတၢင်းၵိၼ်ၶလၢတ်ႊသိၵ်ႊ (Classic) ဝဵင်းတူၼ်ႈတီး။ မီးၵူၼ်းၶဝ်ႈႁူမ်ႈဢဝ်ၶၢဝ်ႇ 30 ပၢႆ။

ၸဝ်ႈႁႆႈၸဝ်ႈၼႃးႁူမ်ႈၵၼ်တုၵ်းယွၼ်းႁႂ်ႈၵိုတ်းယိုဝ်းၵၢၼ်ၶုတ်းၶမ်းတီႈဝၢၼ်ႈၼႃးႁႆးလူင်၊ ႁႂ်ႈၶွမ်ႊပၼီႊၶဝ်သၢႆႈတႅၼ်း ပၼ်ၵႃႈလူႉသုမ်းတီႈလိၼ်သူၼ်ႁႆႈၼႃးဢၼ်ၵိုင်ႇၵႃႈၵိုင်ႇႁူဝ်၊ ႁႂ်ႈၶိုၼ်းမႄးပၼ်ၼမ်ႉႁွင်ႈၼမ်ႉၵေးဢၼ်လႆယူႇ ၸိူဝ်း ၼၼ်ႉ မိူၼ်ၶိုၼ်းပၵ်းၵဝ်ႇပိူင်ၵဝ်ႇ၊ ၵွပ်ႈဝႃႈယွၼ်ႉၵၢၼ်ၶုတ်းၶမ်းလၢင်ႉၶမ်း ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ထူပ်းတၢင်း ယၢပ်ႇၽိုတ်ႇ။

ၵဵဝ်ႇၵပ်းလွင်ႈၼႆႉၸၢႆးတုၼ် ၵူၼ်းဝၢၼ်ႈၼႃးႁႆးလူင်လၢတ်ႈဝႃႈ- ဢိင်ၼိူဝ်ၶွမ်ႊပၼီႊၸိူဝ်းၼႆႉ မႃးၶုတ်းၶမ်းလႄႈ ထိူၼ်ႇပႃႇမႆႉ ဢၼ်တိုပ်းၼႃၶဵဝ်ၸမ်ႉလီ ႁိမ်းႁွမ်းၸွမ်းႁူၺ်ႈၸွမ်းလွႆၸိူဝ်းၼႆႉၵေႃႈ လႆႈလူႉၵွႆၵႂႃႇသဵင်ႈ၊ တူင်ႇတၢင်ႇ ဢၼ်ၶဝ်ၶုတ်းၶမ်းဝႆႉယူႇၼႆႉမီးယူႇဝႆႉၼႂ်း 11 လၵ်းပၼ်ႇမူၼ်း။ ဢိင်ၼိူဝ်ဢဝ်ထၢတ်ႈၶေႊမီႊၶိူဝ်ႊလ် ထတ်းထွင် သုၵ်ႈလၢင်ႉဢဝ်ၶမ်းလႄႈႁဵတ်းႁႂ်ႈၼမ်ႉႁွင်ႈၼမ်ႉၵႄးၼမ်ႉၼွင်ၸိူဝ်းၼႆႉလူႉၵွႆ၊ တူဝ်သတ်းဢၼ်ယူႇၼႂ်းၼမ်ႉၵေႃႈ တၢႆ။ ၵွပ်ႈၼၼ်ၵူၼ်းဝၢၼ်ႈၼႃးႁႆးလူင်လႄႈဝဵင်းမၼေႃႇ 340 ပၢႆ ဢၼ်ၸႂ်ယႂ်ႇႄၵးမႄႈၼမ်ႉၶမ်းသေ ၽုၵ်ႇသွမ်ႈၵိၼ်ၸႂ်ႉ ၼၼ်ႉႁူပ်ႉတၢင်းယၢပ်ႇၽိုတ်ႇ။ တူင်ႈႁႆႈတူင်ႈၼႃးၵေႃႈ ဢိင်ၼိူဝ်ၼမ်ႉလၢႆႇၶမ်းဢၼ်ပဵၼ်လိၼ်သၢႆးၸိူဝ်းၼႆႉ ထွၵ်ႇလေႃႇ လွင်ႈလူင်းမႃးထူမ်ႈလႄႈႁဵတ်းႁႂ်ႈၼႃးၸိူဝ်းၼႆႉဢမ်ႇႁဵတ်းလႆႈယဝ်ႉ၊ ၽၵ်းယိူဝ်ႈၼၢင်းၶဵဝ်ၵေႃႈ ဢမ်ႇၽုၵ်ႇလႆႈယဝ်ႉ၊ တီႈဝၢၼ်ႈၼႃးႁႆးလူင်ၼႆႉလိၼ်သၢႆးထူမ်ႈမူႇဝၢၼ်ႈၵႂႃႇၶိုင်ႈၼိုင်ႈ၊ ႁဵတ်းႁႂ်ႈၵူၼ်းဝၢၼ်ႈ ၵႂႃႇမႃးႁႃၵၼ်ယၢပ်ႇ- ဝႃႈၼႆ။

ၵဵဝ်ႇၵပ်းလူၺ်ႈလွင်ႈၶူဝ်းၶွင်၊ သူၼ်ႁႆႈၼႃးၵူၼ်းဝၢၼ်ႈၼႃးႁႆးလူင် လႆႈလူႉလႆႈၵွႆး လႆႈႁၢမ်းႁႅၵ်း၊ ဢမ်ႇၸၢင်ႈႁဵတ်းၸၢင်ႈႁႃ ယွၼ်ႉမိူင်ၶမ်း/မေႃႇၶမ်းၸိူဝ်းၼႆႉ ၵူၼ်းဝၢၼ်ႈၵူၼ်းမိူင်းၶဝ် လႆႈတၢင်ႇလိၵ်ႈထိုင်ပႃႈၼိူဝ်လၢႆလၢႆပွၵ်ႈ၊ မိူဝ်ႈလိူၼ် ဢေႊပရိူဝ်ႊလ်ၼၼ်ႉ လူင်ပွင်ၸိုင်ႈမိူင်းတႆးပူင်သင်ႇႁႂ်ႈၵိုတ်းယင်ႉၸူဝ်ႈၵႅပ်ႉၼႆၵေႃႈ ၶွမ်ႊပၼီႊၸိူဝ်းၼႆႉ ဢမ်ႇယွမ်း ၵိုတ်း။ ၾၢႆႇၼိုင်ႈၵေႃႈၶွမ်ႊပၼီႊၸၢႆးတိပ်ႉလႄႈၶွမ်ႊပၼီႊလွႆၶမ်းလူင်မႃးၸူးၵူၼ်းဝၢၼ်ႈသေ ၸႂ်ႉလူင်းလၢႆးမိုဝ်းဝႃႈ ႁႂ်ႈပူတ်းထွၼ်ၶိုၼ်းၶေႃႈၵႂၢမ်းဢၼ်တုၵ်းယွၼ်းထိုင်ၸၼ်ႉပႃႈၼိူဝ်တင်းသဵင်ႈ။ မိူၼ်ၼင်ႇႁႂ်ႈၵူၼ်းဝၢၼ်ႈလၢတ်ႈဝႃႈ ဢၼ်ႁဝ်းလႆႈလူႉသုမ်းတီႈလိၼ်သူၼ်ႁႆႈၼႃးယွၼ်ႉၵၢၼ်ၶုတ်းၶမ်းၼၼ်ႉ ႁဝ်းလႆႈငိုၼ်းၵႃႈသၢႆႈတႅၼ်းယဝ်ႉ၊ ဢၼ်ႁဝ်း တၢင်ႇမႃးၸိူဝ်းၼၼ်ႉ ႁႂ်ႈယဝ်ႉၵၼ်ၵႂႃႇ၊ ႁဝ်းဢမ်ႇဢဝ်လိူင်ႈယဝ်ႉလႂ်ၸိူဝ်းၼႆႉ။