သိုၵ်းမၢၼ်ႈပႂ်ႉလၢၼ်ႇ  BP1 ပုင်ႇပႃႇၶႅမ် ၶႃၸႂ်ၵၵ်းဝႆႉ ၵူၼ်းထဝ်ႈၸိူဝ်းၵႂႃႇပၢင်ၸႃႉ ပီႈၼွင်ႉ တီႈမိူင်းၼႃႉ ၼႂ်းမိူင်းထႆးၶိုၼ်းပွၵ်ႈ။

ပူၼ်ႉမႃးမိူဝ်ႈဝၼ်းတီႈ 16 ၼၼ်ႉ ၺႃတိပီႈၼွင်ႉ တီႈပုင်ႇပႃႇၶႅမ် ဢွၼ်ၵၼ်ၵႂႃႇပၢင်ၸႃႉ လုင်းသေႃး ဝၢၼ်ႈမိူင်းၼႃႉ ဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ဢၼ်ယူႇတီႈမိူင်းၼႃႉသေ သဵင်ႈမုၼ်ၵႂႃႇတီႈၼႂ်းမိူင်းၼႃႉၼၼ်ႉ တေၽဝ်ၶၢပ်ႈတူဝ် ၼႂ်းဝၼ်းတီႈ 16/06/2013 ၼႆလႄႈပႃးၵၼ် ၵႂႃႇပၢင်ၸႃႉလုင်းသေႃး တီႈမိူင်းၼႃႉ  တင်းမူတ်း 16 ၵေႃႉ။ ၼႂ်း 16 ၵေႃႉၼၼ်ႉ မီးၵူၼ်းထဝ်ႈ ဢႃယု 60 ၶိုၼ်ႈၼိူဝ် 12 ၵေႃႉ ၵူၼ်းၼုမ်ႇဢႃယု ၼႂ်းၵႄႈၵၢင် 25 တေႃႇ 35 ပီ 4 ၵေႃႉ။

မိူဝ်ႈလုၵ်ႉပုင်ႇပႃႇၶႅမ်ၵႂႃႇထိုင် BP1 လၢၼ်ႇလႅၼ်လိၼ် တီႈပုင်ႇပႃႇၶႅမ်ၼၼ်ႉ ထုၵ်ႇသိုၵ်းမၢၼ်ႈ ထၢမ်ဝႃႈ တေၵႂႃႇ လႂ်ၼႆလႄႈ ၸိူဝ်းၶဝ်ၵေႃႈတွပ်ႇဝႃႈ ယွၼ်းၵႂႃႇပၢင်ၸႃႉ ဝၼ်းၽဝ်ၶၢပ်ႈတူဝ် ၵေႃႉပဵၼ် ၼွင်ႉၸၢႆး လုင်းသု ဝၢၼ်ႈပုင်ႇပႃႇၶႅမ်သေတေၶိုၼ်း မႃးဝၼ်းၼႆႉ၊ ၸဝ်ႈၼႃႈတီႈ BP1 တီႈလၢၼ်ႇလႅၼ် လိၼ်ၵေႃႈဝႃႈ ပေႃးသူၶိုၼ်းမႃးမိူဝ်ႈၼႆႉ တေဢမ်ႇၵဵပ်းၶွၼ်ႇၵႃႈၶဝ်ႈဢွၵ်ႇ၊ ၵူၺ်းၵႃႈ ပေႃးပူၼ်ႉမိူဝ်ႈၼႆႉ ၵႂႃႇလႄႈဢမ်ႇၶိုၼ်းမႃးၸိုင် တေၵဵပ်းၶွၼ်ႇၵႃႈၶဝ်ႈဢွၵ်ႇၵႂႃႇမႃးဝႃႈၼႆ။

ဝၢႆးၼၼ်ႉ ၸိူဝ်းၶဝ် 16 ၵေႃႉၵေႃႈလႆႈၵႂႃႇၶဝ်ႈႁူမ်ႈပၢင်ၸႃႉၽဝ်ၶၢပ်ႈတူဝ် လုင်းသု တီႈမိူင်းၼႃႉယဝ်ႉ ယႃႇယဝ်ႉ 3 မူင်း ဝၢႆးဝၼ်း ၶိုၼ်းဢွၵ်ႇမႃး ထိုင်လၢၼ်ႇ BP1 ပုင်ႇပႃႇၶႅမ်၊ ၵူၺ်းၵႃႈ မိူဝ်ႈထိုင်လၢၼ်ႇ ၼၼ်ႉ ၸဝ်ႈၼႃႈတီႈသိုၵ်းမၢၼ်ႈ ဢၼ်ပိူၼ်ႈႁွင်ႉၵၼ်ဝႃႈ ဢၢႆႈၵလႃးၼႆၼၼ်ႉ ဢမ်ႇပၼ်ၸိူဝ်းၶဝ် ပွၵ်ႈၶိုၼ်းပုင်ႇပႃႇၶႅမ် ဝႃႈတေၵဵပ်းငိုၼ်းၵႃႈၶဝ်ႈဢွၵ်ႇ လၢၼ်ႇ ၼႆလႄႈၼႂ်းၼၼ်ႉ မီးၼၢင်းယိင်းၵေႃႉ ၼိုင်ႈဝႃႈ ၵူၼ်းထဝ်ႈၸိူဝ်းၼႆႉ ၶဝ်ဢမ်ႇမီးငိုၼ်း ဢမ်ႇၸၢင်ႈတေဢဝ်လႂ်ပၼ်၊ ၵွပ်ႈၶႂ်ႈႁၼ်ၵေႃႉပဵၼ် ၼွင်ႉၸၢႆး ပဵၼ်ၺၢတ်ႈပီႈၼွင်ႉဢၼ်တၢႆၵႂႃႇၼၼ်ႉ ပဵၼ်ပွၵ်ႈလိုၼ်းသုတ်းလႄႈ ၵႂႃႇၵူၺ်း ဝႃႈၼႆၵေႃႈ ဢၢႆႈၵလႃး ဢၼ်ပၵ်းပႂ်ႉလၢၼ်ႇသေ ပိုတ်ႇႁၢၼ်ႉၶၢႆတၢင်းၵိၼ်တၢင်းယႅမ်ႉယူႇတီႈလၢၼ်ႇၼၼ်ႉဝႃႈ ဢမ်ႇလႆႈ ၶိုၼ်းတဵၵ်းၸႂ်ႉၶဝ်ႈႁႂ်ႈၶဝ်ႈၵႂႃႇမိူင်းထႆးၶိုၼ်း၊ ၶဝ်ၵေႃႈဝႃႈ ႁိူၼ်းႁဝ်းယူႇပုင်ႇပႃႇၶႅမ်လူး ႁႂ်ႈႁဝ်းၶဝ်ႈၵႂႃႇမိူင်းထႆးၶိုၼ်းၸိူင်ႉႁိုဝ် ဢၼ်ႁဝ်းၵႂႃႇၼႆႉ ၵႂႃႇပၢင်ႇၸႃႉပီႈၼွင်ႉၵူၺ်း၊ ၼႂ်းမိူင်းထႆးၵေႃႈ ႁဝ်းဢမ်ႇမီးႁိူၼ်းတေၸၢင်ႈၵႂႃႇႁဵတ်းသင်ၼႆလႄႈ လႆႈထဵင်မေႃးၵၼ်တင်းႁိုင်။

လိုၼ်းသုတ်းတေႃႇထိုင် ၶၢမ်ႈၶိုၼ်း 01.00 မူင်းၶဝ်ႈၼႂ်းဝၼ်းတီႈ 17/06/2013 ၸႂ်ႉၶဝ်ႈလူင်းလၢႆး မိုဝ်းသေ ၸင်ႇပၼ်ပွၵ်ႈၶိုၼ်း ပုင်ႇပႃႇၶႅမ်။