ၽူႈၼမ်းတႆးလၢႆၸဝ်ႈလၢႆၵေႃႉ ႁူပ်ႉထူပ်းၵိၼ်ၶဝ်ႈႁူမ်ႈမူႇ ၵၼ်တီႈတႃႈၵုင်ႈ၊ ဝၢႆးၸဝ်ႈယွတ်ႈသိုၵ်း ႁူပ်ႉဢုပ်ႇ ၸဝ်ႈၶုၼ်ထုၼ်းဢူး။ ဢုပ်ႇၵၼ်ဢမ်ႇပဵၼ်တၢင်းၵၼ် ၵဵဝ်ႇၵပ်းလွင်ႈတေႁဵတ်းႁိုဝ်ၶဝ်ႈပႃး ႁဵတ်းသၢင်ႈ ႁႂ်ႈၸိုင်ႈမိူင်း ၵတ်းယဵၼ်။

ဝၼ်းတီႈ 12/06/13 ပွတ်ႈၶမ်ႈ၊ မီးပၢင်ၵိၼ်ၶဝ်ႈႁူမ်ႈမူႇၵၼ် ဝူင်ႈၵၢင် ပႃႊတီႊႁူဝ်သိူဝ် (SNLD) ၊ ပႃႊတီႊသိူဝ်ၽိူၵ်ႇ (SNDP) တင်း ၶွင်ႊသီႊဢဝ်ၶိုၼ်းၸိုင်ႈတႆး (RCSS) တီႈႁူင်းႁႅမ်း (Chatrium Hotel) ၼိူဝ်သဵၼ်ႈတၢင်းၵၢၼ်ႇ တေႃႇၵျီး ၼႂ်းဝဵင်းတႃႈၵုင်ႈ။ ၽူႈယႂ်ႇၵူၼ်းလူင်ၸိူဝ်းၶဝ်ႈႁူမ်ႈ ပၢင်ၵိၼ်ၶဝ်ႈႁူမ်ႈမူႇၼၼ်ႉ မီးႁူဝ်ပဝ်ႈၸဝ်ႈၶုၼ်ထုၼ်းဢူး၊ ႁူဝ်ပဝ်ႈလုင်းၸၢႆးဢၢႆႈပဝ်း၊ ၽူႈၼမ်းၼႃႈ (SSPP) ၸဝ်ႈသိူဝ်ထႅၼ်ႈ၊ ၸဝ်ႈႁၢၼ် ယွင်ႁူၺ်ႈ ၽူႈပွင်ၵၢၼ် EBO ၸိူဝ်းၼႆႉ။ ယိူင်းဢၢၼ်းပိူင်လူင် ႁပ်ႉတွၼ်ႈၸဝ်ႈယွတ်ႈသိုၵ်း ၼႂ်းတိုဝ်ႉတၢင်းမၼ်းၸဝ်ႈႁွတ်ႈၽႅဝ်တီႈတႃႈၵုင်ႈ ပွၵ်ႈၵမ်းႁႅၵ်ႈ- ၼႆယဝ်ႉ။

ၼႂ်းပၢင်ၵိၼ်ၶဝ်ႈႁူမ်ႈမူႇၼၼ်ႉ ဢုပ်ႇဢူဝ်းၵၼ်ဝႃႈ- မိူဝ်ႈလူင်ပွင်ၸိုင်ႈမႂ်ႇတဵင်းၸဵင်ႇၶိုၼ်ႈမႃး ပွင်ဝၢၼ်ႈပွင်မိူင်းယူႇၼႆႉ ၶဝ်ၸဝ်ႈပိုတ်ႇပၼ်ၽၵ်းတူၵၢၼ်မိူင်း၊ ပိုတ်ႇပၼ်ၽၵ်းတူႁႂ်ႈပေႃးလႆႈသၢင်ႈ လွင်ႈငမ်းယဵၼ်။ ၵွပ်ႈၼၼ် ၼင်ႇႁိုဝ်တေ ပဵၼ်မႃးလွင်ႈငမ်းယဵၼ်မၼ်ႈၵိုမ်း (ထႃဝရ)ၼၼ်ႉ ႁဝ်းတေႁဵတ်းႁိုဝ်ၶဝ်ႈပႃး။  ၼင်ႇႁိုဝ်တေ ၵႄႈလိတ်ႈလႆႈပၼ်ႁႃ ၵၢၼ်မိူင်း ၼႂ်းၸိုင်ႈမိူင်းႁဝ်းဢၼ် ယုင်ႈယၢင်ႈမႃးပီယၢဝ်းၶၢဝ်းႁိုင် ႁႂ်ႈပေႃးယဝ်ႉတူဝ်ႈပဵၼ်ၵၢၼ်၊ ႁႂ်ႈမီးလွင်ႈၶဝ်ႈၸႂ် ၵၼ်သေႁူမ်ႈၵၼ်ပွင် ဝၢၼ်ႈပွင်မိူင်း၊ ၵေႃႇတင်ႈၸိုင်ႈမိူင်းႁူမ်ႈၵၼ်ႁႂ်ႈပေႃး ၵတ်းယဵၼ်ၼၼ်ႉ တေႁဵတ်းႁိုဝ်ၸိူဝ်းၼႆႉ။ ဢုပ်ႇၵၼ်ပႃးဝႃႈ လွင်ႈၸိူဝ်းၼႆႉထုၵ်ႇလႆႈမီးလွင်ႈႁူပ်ႉထူပ်း ဢုပ်ႇဢူဝ်းၵၼ်ၵႂႃႇထႅင်ႈ- ၼႆယဝ်ႉ။

လႆႈငိၼ်းဝႃႈ မိူဝ်ႈၼႆႉ (13/06/13) ၸုမ်းၸိူဝ်း RCSS မီးၶပ်းမၢႆႁူပ်ႉထူပ်းၸဝ်ႈၼႃႈတီႈ ၾၢႆႇၽဵဝ်ႈ မူၺ်ႉယႃႈမဝ်းၵမ် လႄႈရႃၸဝတ်ၸၢတ်ႈၸိုင်ႈၽွမ်ႉႁူမ်ႈ (UNODC) တီႈလုမ်း UNODC ၊ ပေႃးယဝ်ႉ တေႁဵတ်းပၢင်သပ်းလႅင်းၸႅင်ႈၶၢဝ်ႇ ပွတ်းၼႂ်ဢွၼ်ဝၼ်း။ ဝၢႆးဝၼ်း သမ်ႉတေႁူပ်ႉထူပ်းၵၼ်တင်း ၽွင်းတၢင်ၵူႈၸိုင်ႈမိူင်း ဢၼ်မႃးမီးယူႇၼႂ်းၸိုင်ႈမိူင်းႁူမ်ႈတုမ်မၢၼ်ႈ။ တေဢုပ်ႇဢူဝ်းၵၼ်လွင်ႈ ငဝ်းလၢႆးၵၢၼ်မိူင်း ဢၼ်ပဵၼ်ယူႇ မီးယူႇဝၼ်းမိူဝ်ႈၼႆႉလႄႈ လႅၵ်ႈလၢႆႈပၢႆး ဝူၼ်ႉၵၼ်ၵႂႃႇ၊ တေၼမ်းဢဝ်ငဝ်းလၢႆးမိူင်းႁဝ်း/ ပၼ်ႁႃဢၼ်ႁဝ်း ထူပ်းၺႃးယူႇ တၢင်ႇထိုင်တီႈၵူႈၸိုင်ႈမိူင်း ႁႂ်ႈလႆႈႁူႉၸွမ်း- ၽူႈၶၢၼ်ပၢၵ်ႇ RCSS ၸဝ်ႈႁၢၼ်လၢဝ်သႅင် လၢတ်ႈၼႄၼင်ႇၼႆ။