မိူဝ်ႈၼႆႉ ၵိူတ်ႇပၼ်ႁႃၸၢဝ်းၶိူဝ်း ၵိူဝ်းလီပုတ်ႉထသႃသၼႃ တင်းမူႇသလိမ်ႇတီႈဝဵင်းၼမ်ႉတူႈ၊ ဝၢႆးသေၵိူတ်ႇပၼ်ႁႃ တီႈဝဵင်းလႃႈသဵဝ်ႈ ဢၼ်ဢမ်ႇတွၼ်ႉၵိုၵ်းပိုၼ်းမိူင်းတႆးမႃး။

ဝၼ်းတီႈ 20/06/13 (မိူဝ်ႈၼႆႉ) ၵူၼ်းဝၢၼ်ႈမေႃႇတုၼ်း ဢၼ်ယၢၼ်ၵႆၾၢႆႇဢွၵ်ႇဝဵင်းၼမ်ႉတူႈ 14 လၵ်း ဢွၼ်ၵၼ် ၶဝ်ႈဝဵင်းၼမ်ႉတူႈမႃးသေ မႃးပႂ်ႉႁႅမ်ၸၢဝ်းမူႇသလိမ်ႇ (ၵလႃး)။ ၼႂ်းဝဵင်းၼမ်ႉတူႈမိူဝ်ႈ ၼႆႉ ဢူၼ်ဢၢၼ်ယုင်ႈယၢင်ႈၵႂႃႇသဵင်ႈ၊ ပေႃးဢမ်ႇၶမ်ႈၼႆႉၵေႃႈၼႂ်ၽုၵ်ႈၸၢင်ႈႁႅမ်ၵၼ်။ လွင်ႈၼႆႉ ၵူၼ်းမိူင်းၵမ်ႈၽွင်ႈ ဢွၼ်ၵၼ်မႆႈၸႂ်ယူႇ-ၼႆယဝ်ႉ။

ပၼ်ႁႃပွၵ်ႈၵမ်းၼႆႉ တႄႇၵိူတ်ႇမႃးတီႈႁူင်းႁဵၼ်းၸၼ်ႉငဝ်ႈမၢႆ 3 ။ လွင်ႈၼႆႉ ပွတ်းၼႂ်မိူဝ်ႈၼႆႉ  ၶၢဝ်းယၢမ်း ၶဝ်ႈႁူင်းႁဵၼ်း/ သွၼ်လိၵ်ႈၼၼ်ႉ ပေႃးၶူးသွၼ်ယိင်းၵေႃႉၼိုင်ႈၶဝ်ႈၼႂ်းႁွင်ႈႁဵၼ်းမႃးၵေႃႈ လုၵ်ႈႁဵၼ်းၶဝ်ဢွၼ်ၵၼ်ယုၵ်ႉမိုဝ်းဝႆႈမႂ်ႇသုင် (မိၼ်ႇၵလႃႇပႃသြႃႇမ)၊ မီးလုၵ်ႈႁဵၼ်းၵေႃႉၼိုင်ႈၸၢဝ်းမူႇ သလိမ်ႇ ဢမ်ႇယွမ်းယုၵ်ႉမိုဝ်းဝႆႈ။ ၶူးသွၼ်သမ်ႉဝႃႈ ၵွပ်ႈသင် ဢမ်ႇယုၵ်ႉမိုဝ်းဝႆႈၸိူင်ႉပိူၼ်ႈ၊ လုၵ်ႈႁဵၼ်း ၵေႃႉၼၼ်ႉတွပ်ႇဝႃႈ ၼႂ်းၾိင်ႈထုင်းသႃသၼႃႁဝ်းဢမ်ႇသွၼ်ဝႆႉ။ ၶူးသွၼ်လၢတ်ႈဝႃႈ လွင်ႈၼႆႉဢမ်ႇ ၵဵဝ်ႇၶွင်ႈသႃသၼႃ၊ ပဵၼ်လူင်ပွင်ၸိုင်ႈတတ်းမၵ်းဝႆႉ။ လုၵ်ႈႁဵၼ်းၵေႃႉၼၼ်ႉၵေႃႈ လူင်းႁူင်းႁဵၼ်း မိူဝ်းၵႂႃႇ လၢတ်ႈၼႄႁူဝ်ပဝ်ႈမူႇသလိမ်ႇ၊ ႁူဝ်ပဝ်ႈမူႇသလိမ်ႇၵေႃႈမႃးလၢတ်ႈတီႈႁူင်းႁဵၼ်းဝႃႈ ပေႃးသူ ႁဵတ်းၼၼ် ႁဝ်းတေဢဝ် လုၵ်ႈဢွၼ်ႇမူႇသလိမ်ႇ ဢၼ်ယူႇႁူင်းႁဵၼ်းၼႆႉဢွၵ်ႇႁူင်းႁဵၼ်း တင်းမူတ်း- ၼႆယဝ်ႉ။

ၵူၼ်းၼုမ်ႇၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- ၾၢႆႇၼိုင်ႈၵေႃႈ မၼ်းပႃးပယေႃးၵတၢင်းလႃႈသဵဝ်ႈ၊ ၵွပ်ႈဝႃႈ ဝၢႆးၵိူတ်ႇ ပၼ်ႁႃတီႈလႃႈသဵဝ်ႈယဝ်ႉ မီးၵူၼ်းဢဝ်ၶႅပ်းႁၢင်ႈ/ ၶႅပ်းဝီႊသီႊၻီႊ ဢၼ်ၸၢဝ်းမူႇသ လိမ်ႇႁဵတ်း ႁုၵ်းႁၢႆႉၼိူဝ် ၸၢဝ်းပုတ်ႉထ တီႈလႃႈသဵဝ်ႈၸိူဝ်းၼၼ်ႉ မႃးပိုၼ်ၽႄႈၼႂ်းၵူၼ်းမိူင်း ပွတ်းၼမ်ႉတူႈ၊ ႁဵတ်းႁႂ်ႈ ၵူၼ်းမိူင်းပွတ်းၼမ်ႉတူႈ ဢမ်ႇႁၢၼ်ႉၸႂ်သေ ဢွၼ်ၵၼ်တိုၼ်ႇသၢၼ်ႈမႃး ပိူင်ၼိုင်ႈၵေႃႈၸၢင်ႈပႃး- ဝႃႈၼႆ။

ဢိင်ၼိူဝ်ဢမ်ႇတမ်းၸႂ်ငဝ်းလၢႆးလွင်ႈၼႆႉသေ မိူဝ်ႈၼႆႉ ၸဝ်ႈၼႃႈတီႈပလိၵ်ႈၶဝ်ပႂ်ႉဢဝ်ႁူမ်ႇလူမ်ႈၸွမ်း သဵၼ်ႈတၢင်းၵႂႃႇမႃး၊ ၸွမ်းႁူင်းႁဵၼ်းလူင်ပွင်ၸိုင်ႈၵူႈတီႈ၊ ၸွမ်းဝတ်ႉမုၼ်ၸဝ်ႈ၊ ၸွမ်းၵျွင်းပလီႇမူႇ သလိမ်ႇ ၸိူဝ်းၼႆႉ။ ႁၢၼ်ႉၶၢႆၶူဝ်းၶၢႆယႃႈယႃ ၸိူဝ်းၼႆႉၵေႃႈ ဢွၼ်ၵၼ်ဢိုတ်းႁပ်းဝႆႉ- ၼႆယဝ်ႉ။

ၵူၼ်းပွတ်းၼမ်ႉတူႈၵေႃႉၼိုင်ႈၵေႃႈလၢတ်ႈဝႃႈ- ၵူၼ်းၼႂ်းဝဵင်းၼမ်ႉတူႈတႄႉဢမ်ႇပဵၼ်သင်၊ ဢၼ်မႃးပႂ်ႉႁႅမ်ၸၢဝ်းမူႇသလိမ်ႇ ယူႇၼႆႉ ပဵၼ်ၵူၼ်းၸိူဝ်းလုၵ်ႉတၢင်းၼွၵ်ႈဝဵင်းမႃး- ဝႃႈၼႆ။