သိုၵ်းမၢၼ်ႈတပ်ႉၵွင် 506 ၶိုၼ်ႈယိုဝ်းသိုၵ်းတႆး SSPP/SSA တီႈလွႆၵူၵ်း ၼႂ်းၸႄႈဝဵင်းၵေးသီး၊ ဢမ်ႇယိုတ်းလႆႈ တပ်ႉတႆး။ ၵူၼ်းဝၢၼ်ႈႁၼ်သိုၵ်းမၢၼ်ႈႁၢမ်ၵူၼ်းဝၢတ်ႇၸဵပ်း ပွၵ်ႈတင်းလႃႈသဵဝ်ႈ လၢႆႁၢမ်။

ဝၼ်းတီႈ 20/06/13 တင်ႈတႄႇပွတ်းၼႂ်ဢွၼ်ဝၼ်း ယၢမ်း 11:00 မူင်းတေႃႇထိုင်ဝၢႆးဝၼ်း ယၢမ်း 13:30 မူင်း၊ သိုၵ်းမၢၼ်ႈ တပ်ႉၶမယ 506 ဢၼ်ၵႂႃႇပၵ်းတီႈဝၢၼ်ႈၼွင်ၵႃး မီးႁႅင်းသိုၵ်းမီး 50 ၵေႃႉၼၼ်ႉ ၸႂ်ႉဢဵၼ်ႁႅင်းသိုၵ်းမွၵ်ႈ 30 ၶိုၼ်ႈလေႃႇ တပ်ႉသိုၵ်းၸိုင်ႈတႆး (SSPP/SSA) တီႈတိၼ်လွႆ ၵူၵ်း ႁိမ်းၼႃးၶီႈလိင်း၊ ၼႂ်းဢိူင်ႇဝၢၼ်ႈၽုၺ်း၊ ၸႄႈဝဵင်းၵေးသီး၊ ဢၼ်ယူႇ ၸဵင်ႇႁွင်ႇဝၼ်းတူၵ်း ၵေးသီး ယၢၼ်7 လၵ်း။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ - ပွၵ်ႈၼႆႉတိုၼ်းဝႃႈပဵၼ်ၾၢႆႇသိုၵ်းမၢၼ်ႈၶိုၼ်ႈငွႆးယိုဝ်း သိုၵ်းတႆးၵမ်းသိုဝ်ႈ၊ သိုၵ်းမၢၼ်ႈ ၶိုၼ်ႈလေႃႇဢမ်ႇလႆႈသေ ၶိုၼ်းထွၼ်သိုၵ်းယၢမ်းဝၢႆးဝၼ်း 1 မူင်းၶိုင်ႈ။ ၵူၺ်းၵႃႈ ဝၢႆးဝၼ်းမွၵ်ႈ 3 မူင်းပၢႆ သိုၵ်းမၢၼ်ႈတပ်ႉၵွင် 131 (ၵေးသီး) လုၵ်ႉတၢင်းၵေးသီးမႃးထႅမ်ႁႅင်း သိုၵ်းထႅင်ႈ မွၵ်ႈ 100 ပၢႆ။ ဢၼ်မႃး ထႅမ်ႁႅင်းသိုၵ်းထႅင်ႈၼႆႉ တေပႃးတၢင်ႇ တပ်ႉယူႇႁိုဝ်ဢမ်ႇပႃး တႄႉပႆႇႁူႉ- ဝႃႈၼႆ။

ၸိူင်ႉႁိုဝ်ၵေႃႈလီ ၵူၼ်းပွတ်းလႃႈသဵဝ်ႈၵေႃႉၼိုင်ႈၵေႃႈလၢတ်ႈဝႃႈ- ႁၼ်သိုၵ်းမၢၼ်ႈ ႁၢမ်မႃးၵူၼ်းၶဝ်မႃး 10 ႁၢမ် ၶဝ်ႈဝဵင်း လႃႈသဵဝ်ႈမႃး တႃႇ 5 ႁၢမ် လႅပ်ႈပဵၼ်ၵူၼ်းဝၢတ်ႇၸဵပ်း- ဝႃႈၼႆ။

ၽူႈမီးၸၼ်ႉၼႂ်းတပ်ႉ SSPP/SSA ၸဝ်ႈၼိုင်ႈလၢတ်ႈဝႃႈ- သိုၵ်းမၢၼ်ႈႁဵတ်းၼိူဝ်ႁဝ်းၸိူင်ႉၼႆၼႆႉ ႁူမ်ႈဝႃႈႁဝ်းပဵၼ်ၸုမ်းၵိုတ်း ယိုဝ်းၵၼ်ဝႆႉယူႇၵေႃႈ မိူဝ်ႈလဵဝ်ၼႆႉတိုၼ်းတိုၼ်ႇတူဝ်ဝႆႉဝႃႈ ႁဝ်းတိုၼ်း တေလႆႈႁၢင်ႈႁႅၼ်း ပိူဝ်ႈတႃႇၵႅတ်ႇၶႄတူဝ်ၵဝ်ႇယူႇ တႃႇသေႇ၊ ပွင်ႇဝႃႈၶဝ်ဢမ်ႇပၼ်ႁဝ်းလိုမ်းတူဝ်၊ ဢမ်ႇပၼ်ႁဝ်းယူႇမဝ်ၵိၼ်မၢင်ၼၼ်ႉယဝ်ႉ- ဝႃႈၼႆ။

လွႆၵူၵ်း ၸႄႈဝဵင်းၵေးသီးၼႆႉ  ၸမ်ၵႂႃႇတၢင်းမိူင်းတုင်-မိူင်းလႃ ၼႂ်းၸႄႈဝဵင်းသီႇပေႃႉ၊ သိုၵ်းတႆး SSPP/SSA တႄႇပၵ်းယူႇမႃး ၸဵမ်မိူဝ်ႈၼႂ်းပီ 2011 တေႃႇထိုင်ဝၼ်းမိူဝ်ႈလဵဝ်။

ပႃႊတီႊမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ၼႆႉ မီးၵၢၼ်ဢုပ်ႇဢူဝ်းၵၼ်တင်းလူင်ပွင် ၸိုင်ႈမၢၼ်ႈ ၸၼ်ႉၸိုင်ႈမိူင်းႁူမ်ႈတုမ်သေ ၶိုၼ်းတႄႇၵိုတ်းယိုဝ်းၵၼ်တင်းတပ်ႉသိုၵ်းမၢၼ်ႈမႃး ဝၼ်းထိ 28/01/12 ၊ မိူဝ်ႈလဵဝ် လႆႈမႃး ၶၢဝ်းတၢင်းပီပၢႆယဝ်ႉၵေႃႈ ၵႆႉပဵၼ်ပၢင်တိုၵ်းၵၼ်တင်းသိုၵ်း မၢၼ်ႈမႃးတႃႇသေႇ။

ပူၼ်ႉမႃးဢမ်ႇႁိုင် မိူဝ်ႈဝၼ်းတီႈ 11/05/13  SSPP/SSA  ႁူပ်ႉထူပ်းဢုပ်ႇဢူဝ်းၶွမ်ႊမတီႊၶိုင်ပွင်လွင်ႈ ငမ်းယဵၼ်ၸၼ်ႉၸိုင်ႈ မိူင်းႁူမ်ႈတုမ် (UPWC) တီႈဝဵင်းတၢင်ႉယၢၼ်း။ သွင်ၾၢႆႇတူၵ်းလူင်းၵၼ် 4 ၶေႃႈ- (1)ပိူဝ်ႈတႃႇႁဵတ်းၸွမ်း ၶေႃႈတူၵ်းလူင်း ၸွမ်းၼင်ႇလႆႈလူင်းလၢႆးမိုဝ်းၵၼ်ဝႆႉ ၸၼ်ႉၸႄႈမိူင်း လႄႈ ၸၼ်ႉၸိုင်ႈမိူင်းႁူမ်ႈတုမ်ၼၵ်းၼၵ်းၼႃၼႃ။ (2) ပိူဝ်ႈတႃႇဢဝ် လွင်ႈငမ်းယဵၼ်သေၵႄႈလိတ်ႈ ပၼ်ႁႃ ဢၼ်လုၵ်ႉတီႈ တင်းသွင်ၾၢႆႇၸတ်းသိုၵ်း/တူင်ႉၼိုင်သိုၵ်း ၼၼ်ႉသေပဵၼ်မႃး။ (3)ႁႂ်ႈလႆႈငိူင်ႉ ဝႄႈလွင်ႈႁႃတၢင်းၽိတ်းပူဝ်ႉသႂ်ႇ ႁူဝ်ၵူၼ်းမိူင်း၊ ပဵၼ်ႁၢပ်ႇၼၵ်းလူင်တေႃႇၵူၼ်းမိူင်း လူၺ်ႈလွၵ်းလၢႆး ဢမ်ႇထုၵ်ႇ မႅၼ်ႈၸွမ်းမၢႆမီႈ။ (4)ပေႃးဝႃႈမီးမႃးပၼ်ႁႃ ဢၼ်ႁဵတ်းႁႂ်ႈသွင်ၾၢႆႇမီးၶေႃႈထၢင်ႇထိူမ်ၵၼ် ၼႆၸိုင် ႁႂ်ႈလႆႈႁူပ်ႉထူပ်းၵၼ်သေ ၵႄႈလိတ်ႈလူၺ်ႈလၢႆးသိုဝ်ႈသႂ်ဝႆးဝႆး- ၸိူဝ်းၼႆႉ။