ၵူၼ်းသိုၵ်းၼႂ်းတပ်ႉတႆး (RCSS/SSA) 3 ၵေႃႉ ၵႂႃႇဢႅဝ်ႇ ပွၵ်ႈၶိုၼ်းလတ်းၼႃႈတပ်ႉမၢၼ်ႈ ယၢမ်းတဵင်ႈ ၶိုၼ်းလိုၵ်း၊ ၺႃးသိုၵ်းမၢၼ်ႈတပ်ႉ 504 တိၺွပ်းၵုမ်းတူဝ်ဝႆႉ ႁၢၼ်ႉတေႃႇမိူဝ်ႈလဵဝ်ပႆႇပွႆႇၶိုၼ်း။

ပူၼ်ႉမႃးမိူဝ်ႈၶိုၼ်းဝၼ်းၽတ်း 13/06/13 ၼႂ်ဝၼ်းသုၵ်းထိ 14 ၼၼ်ႉ ၵူၼ်းသိုၵ်းၼႂ်းတပ်ႉသိုၵ်း ၸိုင်ႈတႆး (RCSS/ SSA) 3 ၵေႃႉ ထုၵ်ႇသိုၵ်းမၢၼ်ႈတိၺွပ်းၵႄႈၵၢင်တႃႈတေႈ-သီႇပေႃႉ၊ ၼႃႈတပ်ႉ မၢၼ်ႈၶမယ 504 ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ၊ ႁၢၼ်ႉတေႃႇထိုင်မိူဝ်ႈလဵဝ် လႆႈငိၼ်းဝႃႈ ယင်းပႆႇပွႆႇပၼ်ၶိုၼ်း။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈၼႂ်းၸႄႈဝဵင်းသီႇပေႃႉၵေႃႉၼိုင်ႈလၢတ်ႈဝႃႈ- ၸိူဝ်းၶဝ်ၵႂႃႇဢႅဝ်ႇ ပွၵ်ႈမႃးလိုၵ်း၊ လတ်းမႃး ၼႃႈတပ်ႉမၢၼ်ႈ 504 ၽွင်းတဵင်ႈၶိုၼ်းလိုၵ်းၸၢႆႉ ၺႃးသိုၵ်းမၢၼ်ႈႁႄႉၵိုတ်း။ သိုၵ်းမၢၼ်ႈၵူတ်ႇထတ်းတူၺ်းႁၼ်ၼႂ်း ၶိူင်ႈလဵၼ်ႈ MP4 မီးၸိူဝ်းၶဝ်ၼုင်ႈသႂ်ႇသိူဝ်ႈၶူဝ်းလၢႆးဝႆႉလႄႈ သိုၵ်းမၢၼ်ႈၼႄးၶဝ်ဝႃႈပဵၼ်ၵူၼ်းထိူၼ်ႇ၊ ၸိူဝ်းၶဝ်လၢတ်ႈဝႃႈ  ႁဝ်းဢမ်ႇၸႂ်ႈၵူၼ်းထိူၼ်ႇ၊ ႁဝ်းပဵၼ် ၵူၼ်း RCSS ၼႆၵေႃႈဢမ်ႇလႆႈ၊ ယင်းပၢႆၺႃးပၢပ်းႁႅမ်ထႅင်ႈလူးၵွၼ်ႇ- ဝႃႈၼႆ။

ၵူၼ်းသိုၵ်းတႆး 3 ၵေႃႉ ၺႃးသိုၵ်းမၢၼ်ႈတိၺွပ်းၵမ်းၼႆႉ ပဵၼ်ၽွင်းႁူဝ်ပဝ်ႈ RCSS/SSA တင်းၸုမ်း ၸိူဝ်းဢွၵ်ႇၶၢဝ်းတၢင်း ၵႂႃႇမိူင်းမၢၼ်ႈ/ၼေႇပျီႇတေႃႇ ႁူပ်ႉထူပ်းဢုပ်ႇဢူဝ်းၸွမ်ၸိုင်ႈတဵင်းၸဵင်ႇ၊ ပႃႊတီႊၵၢၼ်မိူင်း၊ ၸုမ်းတူင်ႇဝူင်းၵူၼ်း။ ဝၼ်းတီႈ 17/06/13 (မိူဝ်ႈၼႆႉၵေႃႈ) ယင်းတိုၵ်ႉလူင်းပိုၼ်ႉ တီႈႁူပ်ႉထူပ်းပီႈၼွင်ႉၵူၼ်းမိူင်း ပွတ်းၵျွၵ်ႉမႄး ၸိုင်ႈတႆးပွတ်းႁွင်ႇ- ၼႆယဝ်ႉ။

တပ်ႉသိုၵ်းၸိုင်ႈတႆး (RCSS/SSA)ၼႆႉ လႆႈဢုပ်ႇဢူဝ်းၸၼ်ႉၸႄႈမိူင်း၊ တူၵ်းလူင်းႁဵတ်းလွင်ႈငမ်း ယဵၼ် ၵိုတ်းယိုဝ်းၵၼ် တင်းလူင်ပွင်ၸိုင်ႈတဵင်းၸဵင်ႇမႃး  မိူဝ်ႈဝၼ်းတီႈ 02/12/2011 တီႈဝဵင်းတူၼ်ႈတီး။ ပွၵ်ႈၵမ်း 2 ဢုပ်ႇဢူဝ်း ၸၼ်ႉၸိုင်ႈ မိူင်းႁူမ်ႈတုမ် ဝၼ်းတီႈ 16/01/2012 တီႈဝဵင်းတူၼ်ႈတီး။ ပွၵ်ႈၵမ်း 3 ၸၼ်ႉၸိုင်ႈမိူင်းႁူမ်ႈတုမ် မိူဝ်ႈဝၼ်းတီႈ 19/05/2012 တီႈၵဵင်းတုင်။ ၼွၵ်ႈသေၼၼ်ႉ လႆႈဢုပ်ႇဢူဝ်းၵဵဝ်ႇၵပ်းယႃႈမဝ်းၵမ် တင်းၸဝ်ႈၼႃႈတီႈ UNODC ၊ ၾၢႆႇယႃႈမဝ်းၵမ်မၢၼ်ႈ ဝၼ်းတီႈ 27-28/10/2012 တီႈတႃႈၶီႈလဵၵ်း။