ၸၢဝ်းမူႇသလိမ်ႇ ၵေႃႉသၢင်ႈပၼ်ႁႃၸၢဝ်းၶိူဝ်းတီႈလႃႈသဵဝ်ႈ ဝူင်ႈၵၢင်မူႇသလိမ်ႇတင်းမၢၼ်ႈ ပူၼ်ႉမႃးၽွင်း ႁၢင်လိူၼ်မေႊ (2013) ၺႃးလုမ်းတြႃးတတ်းသိၼ် ပၼ်တူတ်ႈတၢမ်ႇၶွၵ်ႈ 26 ပီ။

ပူၼ်ႉမႃးမိူဝ်ႈဝၼ်းတီႈ 10/06/13 လုမ်းတြႃးဝဵင်းလႃႈသဵဝ်ႈ တတ်းသိၼ်ပၼ်တူတ်ႈတၢမ်ႇ ၼေႇဝိၼ်း ၵေႃႉဢၼ် ဢဝ်ၼမ်ႉမၼ်းၸိူဝ်ႉၾႆး ႁူတ်းသႂ်ႇမဢေးဢေးဝိၼ်း ဢႃႇယု 29  (လုၵ်ႈဢူးမွင်ႇမွင်ႇဢေး ယူႇပွၵ်ႉ 8 ဝဵင်းလႃႈသဵဝ်ႈ)သေ ပဵၼ်ၵဝ်ႉငဝ်ႈပၼ်ႁႃၸၢဝ်းၶိူဝ်းမႃး တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ 26 ပီ-ၼႆယဝ်ႉ။

ၼေႇဝိၼ်းၼႆႉ ယွၼ်ႉၵေႃႇပၼ်ႁႃလႄႈ လႆႈထုၵ်ႇတိၺွပ်း လူၺ်ႈသႂ်ႇၸိူၵ်ႈ/ထူးလဵၵ်းတီႈတိၼ်ဝႆႉ။ ၼႂ်းပီ 2013 ၼႆႉ တၢင်းၽိတ်းယႂ်ႇလူင်ဢၼ်ၵိူတ်ႇၶိုၼ်ႈၼႂ်းၸိုင်ႈမိူင်း မီး 3375 ၵမ်းပႃးပွၵ်ႈၼႆႉ။ ၵွပ်ႈၼၼ် ၼေႇဝိၼ်း ထုၵ်ႇလုမ်း တြႃးတတ်းသိၼ်ယွၼ်ႉတၢင်းၽိတ်းလူင် 3375/2013 မၢႆမီႈမတ်ႉတႃ 307 ဝႃႈလူၺ်ႈလွင်ႈတင်ႈၸႂ် ၶႃႈႁႅမ်ၵူၼ်း တူတ်ႈတၢမ်ႇၶွၵ်ႈ 7 ပီ၊ မၢႆမီႈမတ်ႉတႃ 26 တင်ႈၸႂ်ႁဵတ်းႁႂ်ႈတၢင်ႇၵေႃႉ ၸဵပ်းသႅပ်ႇ တူတ်ႈတၢမ်ႇၶွၵ်ႈ 7 ပီ၊ သူႇၵိၼ်ၸႂ်ႉ တိုဝ်းယႃႈမဝ်းၵမ် မၢႆမီႈမတ်ႉတႃ 15 တူတ်ႈတၢမ်ႇၶွၵ်ႈ 5 ပီ။ ယႃႈမဝ်းၵမ်မီးၼႂ်းမိုဝ်း မၢႆမီႈမတ်ႉတႃ 16 တူတ်ႈၶွၵ်ႈ 7 ပီ၊ တင်းမူတ်းႁူမ်ႈ 26 ပီ။

ၼေႇဝိၼ်းၼႆႉ ဢႃႇယု 48 ၊ ပေႃႈၸိုဝ်ႈဢူးတိၼ်ႇသူၺ်ႇ၊ ပဵၼ်ၵူၼ်းၵဵင်းတုင်- လိၼ်းလိၼ်း လႃႈသဵဝ်ႈ ပွင်ႇလၢတ်ႈ မႃးၼင်ႇၼႆ။

ၼၢင်းဢေးဢေးဝိၼ်း ပေႃႈပဵၼ်ၶႄႇၸၢဝ်းၵႂၢင်းတူင်ႇ (မိူင်းၶႄႇ) ၸိုဝ်ႈဢူးမွင်ႇမွင်းဝိၼ်း (ၸၢဝ်းၶိူဝ်းမၢၼ်ႈ)၊ မႄႈပဵၼ် ၸၢဝ်းၶိူဝ်းယၢင်းၽိူၵ်ႇ၊ ၽူဝ်မၼ်းၼၢင်းပဵၼ်တႆး ၸိုဝ်ႈၸၢႆးထုၼ်း- ၼႆယဝ်ႉ။

ပူၼ်ႉမႃးမိူဝ်ႈဝၼ်းတီႈ 28/05/13 တီႈဝဵင်းလႃႈသဵဝ်ႈ ၵိူတ်ႇပဵၼ်ပၼ်ႁႃၵၼ်ဝူင်ႈၵၢင်ၸၢဝ်းၶိူဝ်းသေ မီးၵၢၼ်ၽဝ် ႁူင်းႁဵၼ်းလုၵ်ႈဢွၼ်ႇၽၢၼ်ပေႃႈမႄႈၶွင် ဢိတ်ႊသလၢမ်ႊလင်ၼိုင်ႈ၊ ပလီႊဢိတ်ႊ သလၢမ်ႊလင်ၼိုင်ႈ၊ ၾႆးမႆႈ ႁိူၼ်း 7 လင်၊ ၵူၼ်းတၢႆၵေႃႉၼိုင်ႈ ဝၢတ်ႇၸဵပ်း 4 ၵေႃႉ။