သိုၵ်းတႆး လွႆတႆးလႅင်း ပဵၼ်ပၢင်တိုၵ်းၵၼ်တင်းသိုၵ်းမၢၼ်ႈ ၼႂ်းၸႄႈဝဵင်းႁူဝ်ပူင်း၊ ၾၢႆႇသိုၵ်းမၢၼ်ႈတၢႆႁိမ်းသိပ်း၊ ဝၢတ်ႇၸဵပ်းတင်းၼမ်။ သိုၵ်းတႆး လုသုမ်းၵေႃႉၼိုင်ႈ။

ပူၼ်ႉမႃးမိူဝ်ႈဝၼ်းတီႈ 17/05/13 တပ်ႉသိုၵ်းၸိုင်ႈတႆး (RCSS/SSA) တင်းသိုၵ်းမၢၼ်ႈ (ပႃႈတႂ်ႈတိူင်းသိုၵ်းဝၼ်းဢွၵ်ႇ) ပဵၼ်ပၢင်တိုၵ်းၵၼ်တီႈၾၢႆႇႁွင်ႇဝၢၼ်ႈၼႃးပုင်ႇ ဢိူင်ႇဝၢၼ်ႈၼမ်ႉၶူၵ်ႉ ၼႂ်းၸႄႈဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။ ဝၼ်းလဵဝ်ၵၼ်ၼႆႉ ပဵၼ်ပၢင်တိုၵ်းၵၼ်ထႅင်ႈၾၢႆႇႁွင်ႇ ဝၢၼ်ႈပျီႇတေႃႇ ဢိူင်ႇၼမ်ႉၶူၵ်ႉထႅင်ႈ၊ ဢွင်ႈတီႈယိုဝ်းၵၼ် 2 တီႈၼႆႉ ပဵၼ်ၼႂ်းၸႄႈဝဵင်းႁူဝ်ပူင်း၊ ၵူၺ်းၵႃႈ ၸမ်ၵႂႃႇတၢင်းလွၵ်ႈၸွၵ်ႇ- ၼႆယဝ်ႉ။

သိုၵ်းမၢၼ်ႈလႆႈၶၢဝ်ႇသိုၵ်းတႆးသေ တပ်ႉၶလယ 249 တင်းတပ်ႉ 250 ႁူမ်ႈႁႅင်းသိုၵ်းၵၼ် 100 ပၢႆ ဢွၵ်ႇတူင်ႉၼိုင်သွၵ်ႈတဝ်ႁႃ သိုၵ်းတႆးလႄႈပဵၼ်ပၢင်တိုၵ်းၵၼ်တင်းသိုၵ်းတႆး RCSS/SSA လွႆတႆးလႅင်း၊ လႆႈငိၼ်းဝႃႈ ၾၢႆႇသိုၵ်းမၢၼ်ႈတၢႆ 9 ၵေႃႉ၊ ဝၢတ်ႇၸဵပ်း 15 ၵေႃႉ။ ၾၢႆႇသိုၵ်းတႆးလုသုမ်း 1 ၵေႃႉလႄႈ ႁုပ်ႈယိုတ်းလႆႈၵွင်ႈ MA 2 လဝ်း၊ မႅၵ်ႉၵွင်ႈ 12 မႅၵ်ႉ၊ ထူင်ပိူဝ်ႉ 2 လုၵ်ႈ။ ပၢင်တိုၵ်းၼႆႉ တီႈၼိုင်ႈပဵၼ်တင်ႈတႄႇ ဝၢႆးဝၼ်းယၢမ်း 2 မူင်း ၶိုင်ႈ တေႃႇထိုင်ႁူဝ်ၶမ်ႈ 4 မူင်း၊ ထႅင်ႈတီႈၼိုင်ႈ ပဵၼ်တင်ႈတႄႇဝၢႆးဝၼ်း ယၢမ်း 3 မူင်းတေႃႇထိုင်ယၢမ်းၵၢင်ၶမ်ႈ 7 မူင်း၊ ဝၼ်းလဵဝ်ၵူၺ်း ပဵၼ်ပၢင်တိုၵ်း 2 ပၢင်- ပီႇတုၸိတ်ႉပဢူဝ်းၵေႃႉၼိုင်ႈ လၢတ်ႈၼင်ႇၼႆ။

ပေႃးဢဝ်ၸွမ်းၶေႃႈတူၵ်းလူင်းၵိုတ်းယိုဝ်းၵၼ်ဝႃႈ ၼႂ်းထိူၼ်ႇ/ဝၢၼ်ႈၼွၵ်ႈၼႃးပၢင်ႇ ပဵၼ်တီႈသိုၵ်းတႆးတူင်ႉၼိုင်၊ ၸွမ်းတၢင်းၵႃး တၢင်းလူင် ၼႂ်းၶူးၼႂ်းဝဵင်းပဵၼ်တီႈသိုၵ်းမၢၼ်ႈတူင်ႉၼိုင်။ ဢၼ်ပဵၼ်ပၢင်တိုၵ်းၵၼ်ပွၵ်ႈၼႆႉ ယွၼ်ႉသိုၵ်းမၢၼ်ႈဢမ်ႇပွင်ႇၶၢဝ်ႇ ငၢဝ်းသေ ၵႂႃႇႁွၼ်ႈထဝ်ႇသွၵ်ႈတဝ်ၼႂ်းထိူၼ်ႇ- ၸဝ်ႈၼႃႈတီႈၼႂ်း RCSS/SSA ၵေႃႉၼိုင်ႈလၢတ်ႈၼင်ႇၼႆ။

ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းၼိုင်ႈၼႂ်း 13 ၸုမ်း ဢၼ်ၵိုတ်းယိုဝ်းၵၼ်ဝႆႉ ပိူဝ်ႈတႃႇႁဵတ်းလွင်ႈငမ်းယဵၼ်တင်းလူင်ပွင်ၸိုင်ႈတဵင်းၸဵင်ႇ။