ၵူၼ်းဝၢၼ်ႈၵူၼ်းမိူင်း ၸိူဝ်းၺႃးၽေးသိုၵ်းပွတ်းထုင်ႉမၢဝ်းၼၼ်ႉ ပဵၵ်ႉသမ်ႉၾၢႆႇသိုၵ်းမၢၼ်ႈၵႂႃႇၸွႆႈ ထႅမ်ပၼ်ၶူဝ်းၶွင်/ ၶဝ်ႈသၢၼ်ၵေႃႈ ဢမ်ႇဝၢင်းၸႂ်ၼိူဝ်သိုၵ်းမၢၼ်ႈ၊ ၵွပ်ႈဝႃႈ ဢၼ်ယိုဝ်းမၢၵ်ႇလူင်သႂ်ႇ ၾႆးမႆႈဝၢၼ်ႈမႆႈႁိူၼ်း ပဵၼ်ၼမ်ႉ မိုဝ်းသိုၵ်းမၢၼ်ႈ။
ပဵၵ်ႉသမ်ႉၾၢႆႇသိုၵ်းမၢၼ်ႈဢဝ်ၵူႈလွၵ်းလၢႆးသေၸွႆႈထႅမ်၊ ၵႂႃႇၸႅၵ်ႇပၼ်ၼိုင်ႈၼႃႈႁိူၼ်းၶဝ်ႈသၢၼ် 5 ပေႇ တီႈၵူၼ်းမိူင်း ၸိူဝ်းပၢႆႈၽေး ပွတ်းၼႃႈလိၼ်သိုၵ်း 701 ဢၼ်တပ်ႉသိုၵ်းမၢၼ်ႈႁုပ်ႈယိုတ်း လႆႈၵႂႃႇၵေႃႈ ႁၢၼ်ႉတေႃႇမိူဝ်ႈလဵဝ် ၵူၼ်းဝၢၼ်ႈၵူၼ်း မိူင်းပွတ်းတွၼ်ႈၼၼ်ႉ ယင်းပႆႇမီးလွင်ႈ ယုမ်ႇယမ်/ဝႆႉဝၢင်းၸႂ်ၼိူဝ် သိုၵ်းမၢၼ်ႈ၊ ယွၼ်ႉပိူဝ်ႈဢၼ်မႃးယႃႉၶူဝ်းႁိူၼ်းၵူၼ်းဝၢၼ်ႈ လုလႅဝ်၊ ယိုဝ်းမၢၵ်ႇလူင်သႂ်ႇဝၢၼ်ႈၵူၼ်းၸိူဝ်းၼႆႉၵေႃႈ ပဵၼ်သိုၵ်းမၢၼ်ႈ- ၵူၼ်းၼႂ်းပိုၼ်ႉတီႈပွတ်းထုင်ႉမၢဝ်း ၵေႃႉၼိုင်ႈလၢတ်ႈ ၼင်ႇၼႆ။

သိုပ်ႇလၢတ်ႈဝႃႈ- ၾၢႆႇသိုၵ်းမၢၼ်ႈ ၵေႃႉဢၼ်ၵႂႃႇၸႅၵ်ႇၶဝ်ႈသၢၼ်ၼၼ်ႉ ပဵၼ်တူဝ်ၽူႈၵွၼ်းပိဝ်ႇႁႃႇ ၸဝ်ႈသိုၵ်းမိၼ်းလုၼ်ႇ။ မိူဝ်ႈဝၼ်းတီႈ 20/05/13 (မိူဝ်ႈသိုၼ်း)ၵေႃႈ ၾၢႆႇပူၵ်းပွင်လႅၼ်လိၼ် ၵႂႃႇၸႅၵ်ႇၶဝ်ႈသၢၼ်ၼိုင်ႈႁိူၼ်း 1 ထူင်။ ၼွၵ်ႈသေၼၼ်ႉ တင်ႈတႄႇမိူဝ်ႈသိုၼ်းမိူဝ်ႈဝႃးမႃးတေႃႇ ထိုင်မိူဝ်ႈလဵဝ် ပႃႊတီႊႁူဝ်သိူဝ် တင်း သိူဝ်ၽိူၵ်ႇ ၵေႃႈဢွၼ်ႁူဝ်ၼမ်းၼႃႈသေ ၵဵပ်းၶူဝ်း ၶွင်ငိုၼ်းတွင်း၊ ၼမ်ႉမီႇၼမ်ႉမၼ်း ပွတ်းဝဵင်းၼမ်ႉၶမ်း ၵႂႃႇၸွႆႈထႅမ်ၵူၼ်းပၢႆႈၽေး ပွတ်းၼႃႈလိၼ်သိုၵ်း 701 ယူႇ- ဝႃႈၼႆ။

ဢိင်ၼိူဝ်မီးၶၢဝ်ႇဝႃႈ ၵူၼ်းမိူင်းၸိူဝ်းပၢႆႈၽေးသိုၵ်းပွတ်းထုင်ႉမၢဝ်း ပွၵ်ႈမႃးယူႇၶိုၼ်းႁိူၼ်း တီႈဢေႇသုတ်း ဢမ်ႇယွမ်း 290 လင်ၼႆသေ  ၽူႈၼမ်းၼႂ်းသိူဝ်ၽိူၵ်ႇတီႈၼမ်ႉၶမ်း လၢတ်ႈဝႃႈ- ၶဝ်မႃးၵၢင်ဝၼ်းၵူၺ်း၊ ၵၢင်ၶမ်ႈဢမ်ႇႁတ်းမႃး။ ပေႃးဝႃႈၵၢင်ဝၼ်း မႃးႁဵတ်းသူၼ်ႁဵတ်းၼႃးၶဝ်၊ ပေႃးၵၢင်ၶိုၼ်းတႄႉ ၶဝ်ၶိုၼ်းၶၢမ်ႈၵႂႃႇ ၼွၼ်းၼႂ်းမိူင်းၶႄႇ။ ယႃႇဝႃႈၵူၼ်းမိူင်းၸိူဝ်းယူႇသဝ်းပွတ်း ၼႃႈလိၼ်သိုၵ်း 701 ၊ ဢမ်ႇလိူဝ်သေၵူၼ်းမိူင်း ၼႂ်းဝဵင်းၼမ်ႉၶမ်းၵေႃႈ ပေႃးထိုင် 8 မူင်းၵၢင်ၶမ်ႈ ယင်းဢမ်ႇႁတ်းဢွၵ်ႇႁိူၼ်း- ဝႃႈၼႆ။

ဝၢၼ်ႈၼွင်သွမ်းၼႆႉ တင်ႈယူႇသၢပ်ႇၼမ်ႉမွၼ်း ဢၼ်လႆၵႂႃႇၶဝ်ႈၼမ်ႉမၢဝ်း၊ မီးလင်ႁိူၼ်းၵူၼ်း 100 ပၢႆ၊ မိူဝ်ႈလဵဝ် ပဵၼ်ဝၢၼ်ႈ ႁၢမ်းဝႆႉ။ တင်းမူတ်းသၢပ်ႇၼမ်ႉမွၼ်းမီးဝၢၼ်ႈၵူၼ်း 6 ဝၢၼ်ႈ၊ ဢၼ်ပၢႆႈၽေး ၶဝ်ႈၵႂႃႇ ယူႇသဝ်းတီႈၼႂ်းလႅၼ်လိၼ်မိူင်းၶႄႇ ယၢမ်းလဵဝ်ၵေႃႈ ပဵၼ်ၵူၼ်းဝၢၼ်ႈ 6 ဝၢၼ်ႈၸိူဝ်းၼႆႉ၊ ၵႂႃႇႁဵတ်းသုမ်ႉ ပၢင်သဝ်း တင်းမူတ်း 6 သုမ်ႉသေယူႇသဝ်းၸွမ်းၵၼ်၊ မီးႁူဝ်ၵူၼ်းၼပ်ႉႁူဝ်ပၢၵ်ႇ-ၼႆယဝ်ႉ။

ဢွင်ႈတီႈပၢင်သဝ်းၵူၼ်းပၢႆႈၽေး (6 သုမ်ႉ)ၼႆႉ ပဵၼ်ၼႂ်းၾင်ႇမိူင်းၶႄႇသေတႃႉ ပိူဝ်ႈတႃႇၶဝ်ႈၵႂႃႇၸူး ဝၢၼ်ႈၵူၼ်း ၼႂ်းမိူင်းၶႄႇ တီႈၼွင်တဝ်းၼၼ်ႉ ယင်းမီးၶူဝ်လင်ၼိုင်ႈၶႅၼ်ႈဝႆႉ။ တီႈၶူဝ်ၼၼ်ႉသမ်ႉ မီးပလိၵ်ႈၶႄႇ (ပီႇတုၸိတ်ႉတႆးၼႂ်းမိူင်းၶႄႇ) ပၵ်းပႂ်ႉ ယူႇဝႆႉသေ  ပေႃးဝႃႈမီးၵူၼ်းဝၢၼ်ႈၶၢမ်ႈၶူဝ်ၼႆႉ မိူၼ်ၼင်ႇလူတ်ႉၶိူင်ႈ လမ်းၼိုင်ႈ တၢင်ႇၵူၼ်းၼိုင်ႈၵေႃႉ ၵဵပ်း 1 ႁဵင်ယႂၼ် ငိုၼ်းၶႄႇ၊ ၵွပ်ႈၼၼ် ႁဵတ်းႁႂ်ႈၵူၼ်းဝၢၼ်ႈ ၸိူဝ်းပၢႆႈၽေး သိုၵ်းၶဝ်တေၵႂႃႇႁႃၵိၼ်ၼႂ်းမိူင်းၶႄႇၵေႃႈယၢပ်ႇ၊ ပိူဝ်ႈတႃႇ ၸုမ်းၸွႆႈ ထႅမ်ၵူၼ်းပၢႆႈၽေးၵႂႃႇၸွႆႈထႅမ်ၵေႃႈယၢပ်ႇ။ ၵူၺ်းၵႃႈ ဢွင်ႈတီႈပၢင်သဝ်းၵူၼ်းပၢႆႈၽေးၼႆႉ ယင်းဝၢင်း ၸႂ်လႆႈလွင်ႈႁူမ်ႇလူမ်ႈယူႇ- လႆႈႁူႉၼင်ႇၼႆ။

မိူဝ်ႈလဵဝ် လႆႈငိၼ်းဝႃႈ သိုၵ်းမၢၼ်ႈၵႂႃႇထႅမ်ႁႅင်းသိုၵ်းတၢင်းဝၢၼ်ႈၼွင်သွမ်း ၸႄႈဝဵင်းၼမ်ႉၶမ်း၊ တီႈဝၢၼ်ႈၼွင်သွမ်းယၢမ်းလဵဝ် သိုၵ်းမၢၼ်ႈပၵ်းယူႇတႃႇၽၢၵ်ႇၼိုင်ႈသေ ၶဵင်ႈၶႅင်ၵၢၼ်သိုၵ်းငႃၵၼ် ဝႆႉတင်း သိုၵ်းတႆး (RCSS/SSA) ၼႃႈလိၼ်သိုၵ်း 701 ယူႇ။ လွင်ႈသိုၵ်းမၢၼ်ႈပႆႇယိုဝ်းၼၼ်ႉ ၵမ်ႈၽွင်ႈ တၵ်ႉလၢမ်းဝႃႈ သိုၵ်းမၢၼ်ႈပႆႇလႆႈၶေႃႈၸိသင်ႇပႃႈၼိူဝ်ၵေႃႈၸၢင်ႈပဵၼ်လႆႈ။ ၵမ်ႈၽွင်ႈသမ်ႉဝႃႈ တိုၵ်ႉပႂ်ႉၸွမ်ၸိုင်ႈတဵင်းၸဵင်ႇ ပွၵ်ႈဢမႄႊရိၵႃႊမႃးၵွၼ်ႇ- ဝႃႈၼႆ။

ၼွၵ်ႈသေသိုၵ်းမၢၼ်ႈထႅမ်ႁႅင်းသိုၵ်းၼမ်ယဝ်ႉ သမ်ႉမီးၶၢဝ်ႇဝႃႈ- လူတ်ႉၵႃးတႅင်ႊ ၵႃးၵၢပ်ႇလဵၵ်းသိုၵ်း မၢၼ်ႈၸိူဝ်းၼႆႉမႃး တၢင်းၼမ်ႉၶမ်း၊ တီႈတႄႉမၼ်း ၽႂ်ၵေႃႈပႆႇႁၼ်သိုဝ်ႈၼႃႈသိုဝ်ႈတႃ။ ၵူၺ်းၵႃႈ ဢိင်ၼိူဝ်မီးၶၢဝ်ႇၸိူဝ်းၼႆႉသေ ႁဵတ်းႁႂ်ႈၵူၼ်း ဝၢၼ်ႈၵူၼ်းမိူင်းတူၵ်းၸႂ်လႂ်တိုၼ်ႇၵူဝ်ႁႄသေ ၵၢင်ၶမ်ႈၵေႃႈဢမ်ႇႁတ်း ဢွၵ်ႇႁိူၼ်းယေး၊ ဢမ်ႇဝၢင်းၸႂ်၊ ယွၼ်ႉၵူဝ်မၢၵ်ႇတႅၵ်ႇ မီးၵၢၼ်ပိုတ်းယိုဝ်း ၵၼ်ၸိူဝ်းၼႆႉ။

ယွၼ်ႉသိုၵ်းမၢၼ်ႈ ပိုတ်ႇၼႃႈသိုၵ်းတိုၵ်းယိုဝ်းတပ်ႉသိုၵ်းၸိုင်ႈတႆး (RCSS/SSA) ၼႃႈလိၼ်သိုၵ်း 701 ပွတ်းထုင်ႉမၢဝ်း (09/05/13) ဢွၼ်တၢင်းသေ ႁဵတ်းႁႂ်ႈမီးမႃးၵူၼ်းမိူင်းတႆးပၢႆႈၽေး ၶဝ်ႈပိုင်ႈဢိင်မိူင်း ၶႄႇၼပ်ႉ ႁူဝ်ပၢၵ်ႇ။ RCSS/SSA ၼႆႉ ပဵၼ်ၸုမ်းၼိုင်ႈၼႂ်း 13 ၸုမ်း ဢၼ်ၵိုတ်းယိုဝ်းဢဝ်လွင်ႈငမ်း ယဵၼ် ၵၼ်ဝႆႉတင်းလူင်ပွင်ၸိုင်ႈတဵင်းၸဵင်ႇ။