ပၢင်ပွႆးတႅမ်ႈတွပ်ႇၶူၼ်ႉၶႆႈလိၵ်ႈ ပရိယတ်တိသတ်ထမ်မပႃလ ၵႅၼ်ႇၸဝ်ႈၸိုင်ႈတႆး ပွၵ်ႈၵမ်း 55 တီႈဝဵင်းပၢင်လူင်၊ မီးသင်ၶၸဝ်ႈပူၼ်ႉၸၼ်ႉလိၵ်ႈ (ဢွင်ႇလိၵ်ႈ) ထမ်းတင်းၼမ်။

ဢွၼ်ၼႃႈၼႆႉ ပူၼ်ႉမႃးမိူဝ်ႈဝၼ်းတီႈ 23/05/13 ငဝ်ႈငုၼ်းမုၵ်ႉၸုမ်းလူင် သင်ၶၸိုင်ႈတႆး ႁဵတ်းပၢင်ၵုမ်လူင် ၶွပ်ႈၶူပ်ႇ 55 ပီ၊ တမ်ႈတီႈႁူင်းထမ်းလူင် သုဝၼ်ၼၽူမိ ဝတ်ႉပိတၵၢတ်ႈ ဝဵင်းပၢင်လူင်။ ပၢင်ၵုမ်ၼႆႉ တင်ႈတႄႇၵၢင်ၼႂ် ယၢမ်း 7 မူင်း တေႃႇထိုင်ယၢမ်း 10 မူင်းၵမ်းၼိုင်ႈ၊  တင်ႈတႄႇဝၢႆးဝၼ်း ယၢမ်း 1 မူင်းတေႃႇထိုင် 3 မူင်းၶိုင်ႈၵမ်းၼိုင်ႈ၊ ဢုပ်ႇၵုမ်တမ်းဝၢင်း ၽႅၼ်ၵၢၼ် ပိူဝ်ႈတႃႇမိူဝ်းၼႃႈ လႄႈ လွင်ႈၵၢၼ်သႃသၼႃ- ၼႆယဝ်ႉ။

ထိုင်မႃးဝၼ်းတီႈ 24/05/13 ယၢမ်းဝၼ်းတဵင်ႈ 12 မူင်း၊ လႆႈၼိမၼ်တၼ (ၽိတ်ႈပၢင်း) သင်ၶၼႃယၵ ဢိၵ်ႇတင်း သင်ၶတူၼ်ၸိူဝ်းယဝ်ႉၸၼ်ႉလိၵ်ႈထမ်းတင်းသဵင်ႈ လုၵ်ႉတီႈဝတ်ႉမင်ႇ ၵလႃႇမူၺ်ႇတေႃႇ ယေႃးၶိင်းမႃးတီႈႁူင်းထမ်းလူင် သဝၼ်ၼၽူမိ ဝတ်ႉပိတၵၢတ်ႈ ပၢင်လူင်သေ လူႇတၢၼ်းယၢတ်ႇၼမ်ႉၶႂမ်ႈတဝ်ႈ၊ တွၼ်ႈမွပ်ႈရၢင်းဝလ်း (တွၼ်ႈသူး) သင်ၶၸဝ်ႈၸိူဝ်းယဝ်ႉၸၼ်ႉ လိၵ်ႈထမ်း- ၼႆယဝ်ႉ။

ပီ 2013 (ပီသႃသၼႃ 2556)ၼႆႉ သင်ၶၸဝ်ႈၶဝ်ႈတႅမ်ႈတွပ်ႇလိၵ်ႈထမ်း မီးတင်းမူတ်း 1,110 တူၼ်သေ ဢွင်ႇပူၼ်ႉၸၼ်ႉၵႂႃႇ 714 တူၼ်၊ သင်ၶၸိူဝ်းၶဝ်ႈၶူၼ်ႉၶႆႈ/ဢူမ်ဢၢၼ်ႇ တင်းမူတ်းမီး 386 တူၼ်၊ ဢွင်ႇပူၼ်ႉၸၼ်ႉ 345 တူၼ်။ ပၢင်မွပ်ႈရၢင်းဝလ်း ၼၼ်ႉ  ယဝ်ႉတူဝ်ႈၵႂႃႇယၢမ်းဝၢႆးဝၼ်း 2 မူင်း- ၼႆယဝ်ႉ။