ဢိင်ၼိူဝ်ၸုမ်းတူင်ႇဝူင်းတႆး (Shan CBO) ဢွၵ်ႇလိၵ်ႈ ပိုၼ်ၽၢဝ်ႇ ပူၼ်ႉမႃးမိူဝ်ႈဝၼ်းတီႈ 16/05/13 ၊ တုၵ်းယွၼ်း ႁႂ်ႈၵိုတ်းယိုဝ်းၶူင်းၵၢၼ်တေႃႈလွတ်ႇၵႅတ်ႊသ်/ၼမ်ႉမၼ်းမဵၼ် ၼႂ်းၸိုင်ႈတႆးပွတ်းႁွင်ႇသေ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ၸၢႆးၶိူဝ်းသႅင် ၽူႈၶၢၼ်ပၢၵ်ႇမူႇၸုမ်းဝႆႉၼင်ႇ ၼႆ။

လွတ်ႇတေႃႈၵႅတ်ႊသ်/ၼမ်ႉမၼ်းတီႈၼိုင်ႈ ၼႂ်းၸိုင်ႈတႆး

ထၢမ်-ယူႇတီႈၸုမ်းတူင်ႇဝူင်းၵူၼ်းတႆး (Shan CBO)သေ ဢွၵ်ႇၶေႃႈပိုၼ်ၽၢဝ်ႇ (Statement) ပိူဝ်ႈတႃႇ ၵိုတ်းယုတ်းၶူင်း ၵၢၼ်ၵေႃႇသၢင်ႈ တေႃႈလွတ်ႇၵႅတ်ႊ/ၼမ်ႉမၼ်းမဵၼ်၊ လွင်ႈၼႆႉ ပိုင်ႈလၢတ်ႈၼႄ ဢိတ်းၼိုင်ႈ? ။

တွပ်ႇ- ၵွပ်ႈဝႃႈလွင်ႈတိုၵ်းယိုဝ်းၵၼ်ၼႂ်းၸိုင်ႈတႆးပွတ်းႁွင်ႇ မၼ်းၵဵဝ်ႇၶွင်ႈလွင်ႈတေႃႈလွတ်ႇၵႅတ်ႊသ်ၵမ်းသိုဝ်ႈ၊ ဢွင်ႈတီႈဢၼ် တိုၵ်းယိုဝ်းၵၼ်ၼၼ်ႉ ပဵၼ်ပိုၼ်ႉတီႈဢၼ်တေႃႈၵႅတ်ႊသ်/ၼမ်ႉမၼ်းလတ်းၽၢၼ်ႇ။ မိူဝ်ႈၵူႈပွၵ်ႈ ၸဵမ်မိူဝ်ႈပႆႇၵေႃႇသၢင်ႈၶူင်း ၵၢၼ်တေႃႈၵႅတ်ႊသ်/ၼမ်ႉမၼ်းၼႆႉ မီးသိုၵ်းပၵ်းယူႇဝႆႉၵေႃႈ ဢမ်ႇပေႃးမီးၵၢၼ်တိုၵ်း တေႃးပိုတ်းယိုဝ်းၵၼ်။ ပေႃးဝႃႈတိုၵ်း ယိုဝ်းၵၼ်မႃးၵေႃႈ မၢၵ်ႇလူင်ၶဝ်ႈတူၵ်းၼႂ်းမိူင်းၶႄႇ၊ ၵူၺ်းၵႃႈ လိူဝ်သေၶႄႇ ဢမ်ႇဝႃႈသင်ယဝ်ႉ ၵူၼ်းမိူင်းတႆးၸိူဝ်းပၢႆႈၽေးၶဝ်ႈ ၵႂႃႇၼႂ်းမိူင်းၶႄႇၵေႃႈ ၸိူဝ်းဢမ်ႇမီးဝႂ်ၼၼ်ႉ ၶႄႇၶဝ်သမ်ႉ တိၺွပ်း၊ လွင်ႈၼႆႉ လႆႈႁၼ်ဝႃႈမၼ်းၵဵဝ်ႇၵပ်းတေႃႈၵႅတ်ႊသ်ၵမ်းသိုဝ်ႈ။ ထႅင်ႈၾၢႆႇၼိုင်ႈ ၵွပ်ႈတုမ်ႉတိူဝ်ႉ ၸဝ်ႈႁႆႈ ၸဝ်ႈၼႃးၶဝ်လႄႈ ၶဝ်ၵေႃႈတုၵ်းယွၼ်းႁႂ်ႈၵိုတ်းယိုတ်းၶူင်းၵၢၼ်တေႃႈလွတ်ႇၵႅတ်ႊသ်/ ၼမ်ႉမၼ်းၼႆႉ။

ယွၼ်ႉပၢင်တိုၵ်းသိုၵ်းသိူဝ်သေ ၵူၼ်းဝၢၼ်ႈၵူၼ်းမိူင်းလႆႈတၢႆၵႂႃႇၵေႃႈမီး၊ လႆႈပၢႆႈဢွၵ်ႇႁိူၼ်းယေးၵေႃႈမီး၊ ႁိူၼ်းယေးလုၵွႆၵေႃႈမီး။ ထႅင်ႈလွင်ႈၼိုင်ႈ ၵၢၼ်ၵေႃႇသၢင်ႈလွင်ႈငမ်းယဵၼ်ၵေႃႈဢမ်ႇယဝ်ႉတူဝ်ႈ၊ ဢုပ်ႇဢူဝ်းၵၼ် လွင်ႈၵိုတ်းယိုဝ်းၵူၺ်း ပႆႇလႆႈႁဵတ်း သၢင်ႈဢွၵ်ႇၼမ်ႉႁၼ်တူဝ်င်မႃးၵႃႈႁိုဝ်၊ ယင်းပဵၼ်ပၢင်တိုၵ်းၵၼ်ႁႅင်းမႃး။ လွင်ႈၼႆႉ ႁဝ်းမႆႈၸႂ်ဝႃႈ သင်သိုပ်ႇပဵၼ်ၸိူင်ႉၼႆၵႂႃႇ တိၵ်းတိၵ်း၊ ၵၢၼ်ၵေႃႇသၢင်ႈလွင်ႈငမ်းယဵၼ်ၵေႃႈ တေလုလႅဝ် ၵႂႃႇသေ တေတုမ်ႉတိူဝ်ႉၵူၼ်းမိူင်း။ ဢွၼ်ၼႃႈႁဝ်းတေဢုပ်ႇ ၵၢၼ်မိူင်းၼႆႉ ထုၵ်ႇလႆႈၵိုတ်းဝႆႉၶူင်းၵၢၼ်ၼႆႉၵွၼ်ႇ။

ထၢမ်- မိူဝ်ႈလဵဝ် ပိူဝ်ႈတႃႇဢဝ်ၵႅတ်ႊသ် တင်းၼမ်ႉမၼ်းမဵၼ် သူင်ႇၶဝ်ႈမိူင်းၶႄႇၼႆႉ လႆႈလဵပ်ႈႁဵၼ်းထိုင်ၶၵ်ႉတွၼ်ႈလႂ်၊ ၵၢၼ်ၵေႃႇသၢင်ႈတေႃႈလွတ်ႇမၼ်းၼႆႉ ယဝ်ႉတူဝ်ႈယဝ်ႉၶႃႈႁႃႉ?။

တွပ်ႇ- လွင်ႈတေႃႈၵႅတ်ႊသ်ၼႆႉ ပေႃးသူင်ႇၵႅတ်ႊသ်တင်းၼမ်ႉမၼ်းမႃး မၼ်းၸၢင်ႈႁူဝ်ႈၸိူင်ႉႁိုဝ်ၼၼ်ႉ ၶဝ်တိုၵ်ႉထတ်းသၢင် ယူႇ။  မၢင်တီႈၵေႃႈ တေႃႈလွတ်ႇၸိူဝ်းလုၵွႆၼၼ်ႉ တိုၵ်ႉတၢင်ႇတေႃႈမၼ်းမႃးလူင်းသေ ၶိုၼ်းမႃးမႄးပိၼ်ႇတေႃႈမၼ်းယူႇ။ ၸွမ်းၼင်ႇၶပ်းမၢႆၶဝ်တႄႉ ၶူင်းၵၢၼ်ၼႆႉ ႁႂ်ႈယဝ်ႉတူဝ်ႈၼႂ်းလိူၼ် (လိူၼ်မေႊ)ၼႆႉ။ ပေႃးလိူၼ်ၼႃႈ တေတႄႇသူင်ႇၵႅတ်ႊသ် တင်းၼမ်ႉမၼ်း။ ၵူၺ်းၵႃႈ ပေႃးတူၺ်းငဝ်းလၢႆး ဢၼ်တိုၵ်ႉမီးၵပၢင် တိုၵ်းယိုဝ်းၵၼ်ယူႇလႄႈသင်၊ ပေႃးသူင်ႇၵႅတ်ႊသ်/ၼမ်ႉ မၼ်းမႃး တေႃႈလွတ်ႇသမ်ႉ တေၶႅင်လႅင်း လႆႈၵႃႈႁိုဝ် ၼၼ်ႉ ယင်းပႆႇႁူႉၼႄႉၼွၼ်း။ ၵွပ်ႈၼၼ် ပိူဝ်ႈတႃႇသူင်ႇၼမ်ႉမၼ်း လိူၼ်ၼႃႈၼႆႉ တေယၢပ်ႇတႃႇၶဝ်ယူႇ။ ၵူၺ်းၵႃႈ လူင်ပွင်ၸိုင်ႈသိုၵ်းမၢၼ်ႈတင်းၶႄႇၶဝ်တႄႉ ၶႂ်ႈႁႂ်ႈယဝ်ႉတူဝ်ႈဝႆးဝႆး၊ ပိူဝ်ႈတႃႇ ယဝ်ႉဝႆးဝႆးၼႆႉ မီးသင်ၶႂၢင်တၢင်းၶဝ်ၵေႃႈၶဝ်တေၸတ်းၵၢၼ်။

ထၢမ်- မိူဝ်ႈလဵဝ် ၼွၵ်ႈသေလူင်ပွင်ၸိုင်ႈၶႄႇ တင်းလူင်ပွင်ၸိုင်ႈမၢၼ်ႈၼႆႉ တၢင်ႇမူႇတၢင်ႇၸုမ်းဢၼ်ၵုမ်းၵႅဝ် ၼႂ်းပိုၼ်ႉတီႈ ၵေႃႈ မီးပဵၼ်လၢႆလၢႆၸုမ်း။ ၵွပ်ႈၼၼ် ဢၼ်ၾၢႆႇတူင်ႇဝူင်းၵူၼ်းတႆးႁဝ်းတုၵ်းယွၼ်း တႃႇတေၵိုတ်းယိုဝ်းလွင်ႈၵေႃႇသၢင်ႈ တေႃႈလွတ်ႇ(Pipe)ၼႆႉ လႆႈႁၼ်သၢႆလႅင်းမၼ်းမွၵ်ႈၵႃႈႁိုဝ်၊ မီးတၢင်းမုင်ႈမွင်းမွၵ်ႈၵႃႈႁိုဝ်?။

တွပ်ႇ-ဢၼ်လမ်ႇလွင်ႈသုတ်း သင်ဝႃႈၵူႈၾၢႆႇၾၢႆႇ တူၺ်းၽွၼ်းလီတႃႇၸိူဝ်ႉၸၢတ်ႈသေႁူမ်ႈမိုဝ်းၵၼ် တုၵ်းယွၼ်းႁႂ်ႈၵိုတ်း ယိုတ်းၸိုင် ႁဝ်းမုင်ႈမွင်းလႆႈဝႃႈမၼ်းၵိုတ်းယိုတ်းလႆႈယူႇ၊ ပေႃးဝႃႈဢမ်ႇတူၺ်း ၼမ်ႉတွၼ်းၽွၼ်းလီတႃႇၸုမ်းလႂ်ၸုမ်းၼၼ်ႉ လႄႈတႃႇသုၼ်ႇတူဝ်။

ထၢမ်- ဢၼ်ၸုမ်းတူင်ႇဝူင်းတႆးဝႃႈ ၵူႈၾၢႆႇၾၢႆႇထုၵ်ႇလႆႈႁူမ်ႈမိုဝ်းၵၼ်တုၵ်းယွၼ်း၊ မၼ်းၸင်ႇၵွႆႈၸၢင်ႈၵိုတ်း ဢၼ်ဝႃႈၼၼ်ႉ ၵူႈၾၢႆႇၾၢႆႇၸိူဝ်းၼၼ်ႉ ၶႂ်ႈဝႃႈၸုမ်းလႂ်လၢႆလၢႆ၊ ပိုင်ႈလၢတ်ႈပၼ်ၽွင်ႈ?။

တွပ်ႇ-ၵူႈၾၢႆႇၾၢႆႇတီႈၼႆႈ ႁဝ်းၶႃႈယိူင်းၸူးပဵၼ်ပႃႊတီႊၵၢၼ်မိူင်းၶဝ်၊ ပႃႊတီႊၵၢၼ်မိူင်းၼႂ်းမိူင်းရၶႅင်ႇ၊ ပႃႊတီႊၵၢၼ်မိူင်းၼႂ်း တိူင်းတႃႈလိူဝ်ႇ (မိူင်းမၢၼ်ႈ)၊ ပႃႊတီႊၵၢၼ်မိူင်းၼႂ်းမိူင်းတႆးပွတ်းႁွင်ႇၸိူဝ်းၼႆႉ။ ၼွၵ်ႈသေၼၼ်ႉ ပႃးၸဵမ်ၸုမ်းယိပ်းၵွင်ႈ ၵၢင်ႇၼႂ်းၸၢဝ်းၶိူဝ်းလၢႆလၢႆၸုမ်း၊ မိူၼ်ၼင်ႇ တပ်ႉသိုၵ်းၸိုင်ႈတႆး (SSA) ပွတ်းႁွင်ႇ/ ပွတ်း ၸၢၼ်း၊ တပ်ႉသိုၵ်းၶၢင်၊ တဢၢင်း (ပလွင်ႈ) ပႃးတင်းၸုမ်းပီႇတုၸိတ်ႉ။ ၸုမ်းၸိူဝ်းဢၼ် ၵဵဝ်ႇၶွင်ႈၸိူဝ်းၼႆႉ သင်ၸိူဝ်ႉဝႃႈႁဝ်းတူၺ်းႁၼ်ၽွၼ်းလီတႃႇၵူၼ်း မိူင်းၸိုင်ႈတႆးႁဝ်းၼႆတႄႉမၼ်းၵေႃႈတေၸၢင်ႈႁူမ်ႈမိုဝ်းၵၼ်ယူႇ။ ၵူၺ်းၵႃႈ ပေႃးတူၺ်းႁၼ်ၽွၼ်းလီသုၼ်ႇတူဝ်ၸုမ်းၽႂ် ၸုမ်းမၼ်းၵူၺ်းတႄႉ ႁဝ်းၶႃႈတေတုၵ်းယွၼ်း ယၢပ်ႇ။

လွင်ႈၼႆႉ ၶႂ်ႈပွင်ႇလႅင်းဝႃႈ ဢမ်ႇၸႂ်ႈႁဝ်းသၢၼ်ၶတ်း၊ ႁဝ်းတုၵ်းယွၼ်းႁႂ်ႈၵိုတ်းၼႆႉ ၵွပ်ႈပိူဝ်ႈဝၢႆးမႃး သင်ၸိူဝ်ႉဝႃႈ ပဵၼ်မႃးၽေး သေလွင်ႈလွင်ႈ မိူၼ်ၼင်ႇတေႃႈၵႅတ်ႊသ်/ၼမ်ႉမၼ်းမဵၼ် ႁူဝ်ႈ/တႅၵ်ႇၸိူဝ်းၼႆႉ မၼ်းတေတုမ်ႉ တိူဝ်ႉၵူၼ်းမိူင်းထႅင်ႈ။ ၼွၵ်ႈသေၼၼ်ႉ တေႁဵတ်းပႃးတၢင်းလူတ်ႉၾႆးထႅင်ႈ၊ သင်ၸိူဝ်ႉဝႃႈ သၢင်ႈတၢင်းလူတ်ႉၾႆးထႅင်ႈၼႆ မၼ်းတေတုမ်ႉတိူဝ်ႉ ၵူၼ်းမိူင်းႁဝ်းထႅင်ႈ။ သင်ၸိူဝ်ႉဝႃႈၵူၼ်းမိူင်းႁဝ်းလႆႈ ပၢႆႈဢွၵ်ႇဝၢၼ်ႈသူၼ်ယူႇ တိၵ်းတိၵ်း၊ တေဢမ်ႇၸၢင်ႈပူၵ်းပွင်ပၢႆးပၺ်ၺႃ၊ ပၢႆးယူႇလီ လႄႈ ပိူဝ်ႈတႃႇၸိူဝ်ႉၸၢတ်ႈဝၢၼ်ႈမိူင်းၶိုၼ်ႈယႂ်ႇ၊ ၵွပ်ႈဝႃႈ ၵုမ်ႇပၢႆႈၽေးၸိူဝ်းၼႆႉယူႇတိၵ်းတိၵ်းဢမ်ႇယဝ်ႉဢမ်ႇဝၢႆး။


တူဝ်ယၢင်ႇမၼ်းဢၼ်ၼိုင်ႈ မိူၼ်ၼင်ႇၼႃႈႁိူၼ်းလင်ၼိုင်ႈ၊ သင်ၸိူဝ်ႉဝႃႈလုၵ်ႈလၢင်းႁဝ်းဢမ်ႇယူႇလီၸိုင် ၸွင်ႇၵူၼ်းယူႇ ၼႂ်းႁိူၼ်းႁဝ်းတင်းသဵင်ႈတေၶႅၼ်းၸႂ်လႄႈ ၸွင်ႇတေတုမ်ႉတိူဝ်ႉငိုၼ်းၶဝ်ႈႁဝ်း။ ၵွပ်ႈၼၼ်လႄႈ ၼႂ်းၸိုင်ႈတႆးၵေႃႈမိူၼ်ၼၼ်၊ ပိူင်ပဵၼ်ယူႇၼႂ်းၸိုင်ႈတႆးပွတ်းႁွင်ႇၼႆၵေႃႈ တုမ်ႉတိူဝ်ႉပႃးၼႂ်းၸိုင်ႈတႆးပတ်းပိုၼ်ႉ တင်းမိူင်းမၢၼ်ႈ။ ၵွပ်ႈဝႃႈ ပေႃးတုမ်ႉတိူဝ်ႉ ၵူၼ်းမိူင်းတင်းၼမ်ၵေႃႈ တေတုမ်ႉတိူဝ်ႉပႃးပၢႆးမၢၵ်ႈမီး။ ၵူၼ်းၸိူဝ်း ယူႇသဝ်းၸွမ်းႁိမ်းႁွမ်းတေႃႈလွတ်ႇၵႅတ်ႊသ်/ၼမ်ႉမၼ်း ၸိူဝ်းၼႆႉ ဢမ်ႇၸႂ်ႈဢေႇဢေႇ၊ ပိုၼ်ႉတီႈတိုၵ်းၵၼ်ၼႆႉ ၵူၺ်း မီးၵူၼ်းလႆႈပၢႆႈတင်းမူတ်း 3 ႁဵင်ပၢႆယဝ်ႉ။ သင်ဝႃႈၼပ်ႉသွၼ်ႇပႃး ၵူၼ်းမိူင်း ၸိူဝ်းယူႇသဝ်းၸွမ်း သဵၼ်ႈတၢင်း ၶူင်းၵၢၼ်တေႃႈလွတ်ႇၵႅတ်ႊသ်/ၼမ်ႉမၼ်းတင်းမူတ်း  မီးၼပ်ႉမိုၼ်ႇၼပ်ႉသႅၼ် မၼ်း။ ပေႃးဢဝ် ၶၢဝ်းယၢဝ်းဝႃႈ ၵူၼ်းဝၢၼ်ႈၵူၼ်းမိူင်းၸိူဝ်းၼႆႉ တေလႆႈၺႃးၽေးမၼ်းၵႂႃႇတိၵ်းတိၵ်း။ ၵွပ်ႈၼႆ ႁဝ်းၶႃႈၶႂ်ႈပွင်ႇ လႅင်းၼႄဝႃႈ ၸုမ်းလႂ်ၸုမ်းၼၼ်ႉ ဢမ်ႇဝႃႈပႃႊတီႊၵၢၼ်မိူင်း၊ တူင်ႇဝူင်းတႆး၊ ၸုမ်းယိပ်းၵွင်ႈၵၢင်ႇ၊ သင်ဝႃႈ ႁဝ်းႁူမ်ႈမိုဝ်းၵၼ် တုၵ်းယွၼ်းႁႂ်ႈၵိုတ်းယုတ်းၼႆတႄႉ မၼ်းတေပဵၼ်ၽွၼ်းလီတႃႇၸိူဝ်ႉၸၢတ်ႈတႆးႁဝ်းၵႂႃႇယူႇ ယုမ်ႇယမ်ၼင်ႇၼႆ။

ထၢမ်-ၼွၵ်ႈသေၼၼ်ႉ ဢၼ်ၶႂ်ႈလၢတ်ႈမီးသင်ထႅင်ႈၶႃႈ? ။

တွပ်ႇ-တေႃႈလွတ်ႇၵႅတ်ႊသ်/ၼမ်ႉမၼ်းၼႆႉ ဢမ်ႇၸႂ်ႈၶွင်မိူင်းမၢၼ်ႈ၊ ဢၼ်ပဵၼ်ၸဝ်ႈၶွင်မၼ်း ပဵၼ်ၵူၼ်းလူင်းတိုၼ်း၊ ၵူၼ်းလူင်းတိုၼ်းမၼ်းၵူၺ်းတေလႆႈၼမ်ႉတွၼ်း၊ မိူင်းႁဝ်းမီးတီႈလိၼ်လႄႈ ၵႅတ်ႊသ်/ၼမ်ႉမၼ်းၵူၺ်း။ ၵႅတ်ႊသ်လႄႈ ၼမ်ႉမၼ်းၼႆႉ မၼ်းၸၢင်ႈသဵင်ႈယူႇ၊ ၵူၺ်းၵႃႈ ပိူင်လူင်မၼ်း ၵႅတ်ႊသ်တင်းၼမ်ႉမၼ်း ဢၼ်ဢွၵ်ႇတီႈမိူင်းရၶႅင်ႇၼႆႉ ဢမ်ႇပေႃးၵႃႈႁိုဝ်၊ ၶဝ်ၶႂ်ႈလႆႈပႃးၵႅတ်ႊသ်/ၼမ်ႉမၼ်း တီႈမိူင်းဢပ်ႊၾ်ၾႃႊရိၵ လႄႈ မိူင်းဝၼ်းတူၵ်း ပိူဝ်ႈတႃႇတေႃႉတၢင်ႇမႃး လူင်းတီႈမိူင်းရၶႅင်ႇသေ တေသူင်ႇၶိုၼ်ႈမႃးတေႃႇထိုင်မိူင်းၶႄႇ။ ၵွပ်ႈဝႃႈမိူဝ်ႈလဵဝ် ဢၼ်ၶႄႇၶဝ်တၢင်ႇႁိူဝ်းသၢင်းၽေႃး ၶိုၼ်ႈၵႂႃႇ တၢင်းဢၢဝ်ႇပၢင်ႇလၢႆႇ ၶွင်မိူင်းၶႄႇၼၼ်ႉ သဵင်ႈၵႃႈၸႂ်ႉၸၢႆႇမၼ်း ၼမ်၊ တေႁဵတ်းႁႂ်ႈၵႃႈၶၼ်ၵႅတ်ႊသ်/ၼမ်ႉမၼ်းသုင်လႄႈ တေယၢပ်ႇတႃႇၶႄႇၶဝ်။ သင်ၸိူဝ်ႉဝႃႈ သၢင်ႈလႆႈ တေႃႈလွတ်ႊၵႅတ်ႊသ်/ၼမ်ႉမၼ်းဢၼ်ၼႆႉၸိုင် ဢမ်ႇပူၼ်ႉမွၵ်ႈ 2 ပီ ၶဝ်လႆႈၶိုၼ်းၵႃႈတေႃႈလွတ်ႇတင်းမူတ်း၊ ၼမ်ႉတွၼ်းမၼ်းၵေႃႈတေလႆႈတင်းၼမ်၊ ၵွပ်ႈဝႃႈ ၵၢၼ်တူၵ်းလူင်းၵၼ်ၵဵဝ်ႇၵပ်းၶူင်း ၵၢၼ်ၼႆႉ လူင်းလၢႆးမိုဝ်းဝႆႉ တႃႇ 50 ပီ၊ 5 ပီ ၵမ်းၼိုင်ႈ၊ 10 ၵမ်းၼိုင်ႈသေ တေယၢဝ်းၵႂႃႇတိၵ်းတိၵ်း၊ ၵွပ်ႈႁဝ်းဢမ်ႇမီးငိုၼ်း သဵတ်ႈၵႃႈ သဵတ်ႈႁူဝ်မၼ်းလႄႈ မၼ်းတေပဵၼ်ၶွင်ပိူၼ်ႈၵႂႃႇ တိၵ်းတိၵ်း။

သင်ၸိူဝ်ႉဝႃႈ တေႃႈၵႅတ်ႊသ်/ၼမ်ႉမၼ်းၸိူဝ်းၼႆႉ ပဵၼ်ၽေးမႃး ၽႂ်တေၺႃးၸၢၵ်ႇ?။ လွင်ႈၼႆႉ ႁဝ်းလီလႆႈႁၼ်ဝႃႈ ၼႂ်းၶၢဝ်း တၢင်းလၢႆလၢႆပီမိူဝ်းၼႃႈၼႆႉ ႁဝ်းၸၢင်ႈၺႃးၽေးသၽႃဝၵူၺ်းပႆႇပေႃး၊ ၽေးတေႃႈလွတ်ႇ ၵႅတ်ႊသ်/ၼမ်ႉမၼ်းႁူဝ်ႈ/တႅၵ်ႇၵေႃႈ တေၺႃးပႃးထႅင်ႈ။ ၼွၵ်ႈသေၼၼ်ႉ ၽေးသိုၵ်းၵေႃႈတေၺႃးပႃးထႅင်ႈ။ လွင်ႈၸိူဝ်းၼႆႉ တေႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ႁဝ်းဢမ်ႇၸၢင်ႈၽိုၼ်ႉတူဝ်လႆႈလႄႈ ပူၵ်းပွင်ဝၢၼ်ႈမိူင်းလႆႈ၊ လွင်ႈၼႆႉတေတုမ်ႉတိူဝ်ႉယႂ်ႇလူင်တႄႉတႄႉ။ ၵွပ်ႈၼၼ် တုၵ်းယွၼ်းထိုင် ၵူႈၸုမ်းၸုမ်းႁႂ်ႈႁၼ်ထိုင်လွင်ႈၼႆႉသေ တုၵ်းယွၼ်းႁႂ်ႈၵိုတ်း ယုတ်းၶူင်းၵၢၼ်တေႃႈလွတ်ႇၵႅတ်ႊသ်/ ၼမ်ႉမၼ်းၼႆႉ။