ၵူၼ်းဝၢၼ်ႈၵူၼ်းမိူင်း ပွတ်းတႃႈၶီႈလဵၵ်း ၺႃးၽေးယုၵ်း ယၵ်းၼဝ်ႈမဵၼ်လႄႈ ဢၢႆၵႂၼ်းယုၵ်းယၵ်း၊ ယွၼ်ႉၾၢႆႇ မူတ်းသႂ်မၢၼ်ႈၸတ်းဢွင်ႈတီႈပႅတ်ႈယုၵ်းယၵ်း/ၽဝ်ယုၵ်း ယၵ်း ၸမ်ဝၢၼ်ႈၵူၼ်း။

ၵူၼ်းၼႂ်းပိုၼ်ႉတီႈပွတ်းတႃႈၶီႈလဵၵ်း ဢၼ်ၸႂ်ႉၸိုဝ်ႈဝႃႈၵူၼ်းမိူင်းလီ ၵေႃႉၼိုင်ႈလၢတ်ႈဝႃႈ- ယွၼ်ႉပိူဝ်ႈတီႈ ပႅတ်ႈယုၵ်းယၵ်း လႄႈတီႈၽဝ်ယုၵ်းယၵ်း ၸမ်ဝၢၼ်ႈၵူၼ်းယူႇသဝ်း၊ ႁဵတ်းႁႂ်ႈဢၢႆတူႇဢၢႆမဵၼ်ယုၵ်းယၵ်း တင်းဢၢႆၵႂၼ်းၾႆးၽဝ်ယုၵ်းယၵ်း ဢၼ်ၶဝ်ၽဝ်ၼၼ်ႉ ၶဝ်ႈမႃးၼႂ်းဝၢၼ်ႈၼႂ်းၶူင်ႇႁဝ်းၶႃႈသေ ႁဵတ်းႁႂ်ႈတုမ်ႉတိူဝ်ႉ ပၢႆးယူႇလီၵူၼ်းဝၢၼ်ႈၵူၼ်းမိူင်း၊ ပၼ်တၢင်း တုၵ်ႉၶလူင်တီႈၵူၼ်းမိူင်း- ဝႃႈၼႆ။

လၢတ်ႈပႃးထႅင်ႈဝႃႈ- ၸဝ်ႈၼႃႈတီႈမၢၼ်ႈၾၢႆႇမူတ်းသႂ်ၶဝ်ၵေႃႈ ငိုၼ်းတႃႇႁဵတ်းလွင်ႈမူတ်းသႂ်ၼၼ်ႉ ၵဵပ်းၵိၼ်ၵူႈလိူၼ် ၼပ်ႉႁူဝ်ႁဵင်ႁူဝ်မိုၼ်ႇပေႃးဢမ်ႇၼပ်ႉလႆႈ၊ ၵူၺ်းၵႃႈ ဢမ်ႇႁဵတ်းပၼ်လွင်ႈမူတ်းသႂ်ပၼ် ၵူၼ်းမိူင်းသင်။ ၵဵဝ်ႇၵပ်းလွင်ႈၼႆႉ ၶႂ်ႈတုၵ်းယွၼ်းထိုင်ၸဝ်ႈၼႃႈတီႈၾၢႆႇလိူမ်ႈလႆႇမူတ်းသႂ်ဝဵင်း တႃႈၶီႈလဵၵ်း၊ ႁႂ်ႈၶၢႆႉတီႈပႅတ်ႈယုၵ်းယၵ်း- ဝႃႈၼႆ။

ယုၵ်းယၵ်းၸိူဝ်းၼမ်းမႃးပႅတ်ႈပဵၼ်ၵွင်ယႂ်ႇ မဵၼ်တူႇမဵၼ်ၼဝ်ႈ၊ ဢဝ်ၾႆးၽဝ်ယူႇၼႆႉ လုၵ်ႉမႃးၼႂ်းပွၵ်ႉၼႂ်းယွမ်ႇ ဝဵင်းတႃႈၶီႈလဵၵ်း လႄႈ ၸွမ်းဝၢၼ်ႈဢိူင်ႇ ၸႄႈဝဵင်းတႃႈၶီႈလဵၵ်း၊ ယိင်ႈႁိုင်မႃး ယိင်ႈၵွင်ယႂ်ႇမႃးတိၵ်းတိၵ်း၊ ႁဵတ်းႁႂ်ႈၵူၼ်းဝၢၼ်ႈ ၵူၼ်းသူၼ် ယူႇသဝ်းၵိၼ်သၢင်ႈၵႂႃႇယၢပ်ႇၽိုတ်ႇၶၢၼ်ၸႂ်တႄႉတႄႉ- ၼႆယဝ်ႉ။