ပႃႊတီႊသိူဝ်ၽိူၵ်ႇ (SNDP) တေလူင်းၶဵင်ႇၵၢၼ်လိူၵ်ႈတင်ႈ ပီ 2015  ၼႂ်းၸႄႈဝဵင်းသီႇသႅင်ႇ တင်းႁူဝ်ပူင်း၊ ၵူၺ်းၵႃႈ ႁူဝ်ပဝ်ႈၸၢႆးဢၢႆႈပဝ်း တေၶဝ်ႈဢမ်ႇၶဝ်ႈၶေႉၼၼ်ႉ တေဢိင်ၼိူဝ်ပၢႆးယူႇလီ။

ႁူဝ်ပဝ်ႈ ပႃႊတီႊ ၻီႊမွၵ်းၶရႅတ်ႊတိၵ်ႊၸိူဝ်ႉၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) ၸၢႆးဢၢႆႈပဝ်း ပိုတ်ႇလၢတ်ႈဝႃႈ- ၵၢၼ်လိူၵ်ႈ တင်ႈပီ 2015 ၼႆႉပႃႊတီႊသိူဝ်ၽိူၵ်ႇႁၢင်ႈႁႅၼ်းဝႆႉ ပိူဝ်ႈတႃႇၶဝ်ႈၶေႉၼႂ်းၸိုင်ႈတႆး ပႃးတင်းၸႄႈဝဵင်းသီႇသႅင်ႇလႄႈႁူဝ်ပူင်း၊ တေၶႂၢၵ်ႈၼႃႈလိၼ်ၶဝ်ႈၶေႉၵၢၼ်လိူၵ်ႈတင်ႈ ၼမ်မႃးလိူဝ်သေ ၵၢၼ်လိူၵ်ႈတင်ႈပီ 2010 - ၼႆယဝ်ႉ။

ပိုၼ်ႉတီႈၼႃႈလိၼ်/ၶဵတ်ႇလိူၵ်ႈတင်ႈ မိူၼ်ၼင်ႇၼႂ်းတိူင်းၸၵၢႆး (ၸႄႈၵႅင်ႇ၊ မိူင်းမၢၼ်ႈ)  ဢၼ်ပဵၼ်တီႈပီႈၼွင်ႉၸၢဝ်းတႆးလႅင် ယူႇသဝ်းၼမ်ၼၼ်ႉ ပႃႊတီႊသိူဝ်ၽိူၵ်ႇ တေဢမ်ၶဝ်ႈၶေႉလိူၵ်ႈတင်ႈ။ ၵူၺ်းၵႃႈ ၼႂ်းမိူင်းၶၢင် 6 ၸႄႈဝဵင်း၊ ပိုၼ်ႉတီႈၼႃႈလိၼ် ဢၼ်ပီႈၼွင်ႉတႆးလူင် တင်းတႆးမၢဝ်း ယူႇသဝ်းၼမ် မိူၼ်ၼင်ႇၸႄႈဝဵင်းမိူင်းယၢင်း/မိူင်းၵွင်း/ဝၢၼ်ႈမေႃႈ/ဝၢၼ်ႈၸေႈ/ဝဵင်းမႂ်ႇ/ ၼမ်ႉတီးၸိူဝ်းၼႆႉ တေၶဝ်ႈၶေႉယူႇ၊ ယွၼ်ႉပိူဝ်ႈ ပဵၼ်တႆး လူင် တႆးမၢဝ်း ၵမ်ႈၼမ်- ၼႆယဝ်ႉ။

မိူဝ်ႈလဵဝ် ဢဵၼ်ႁႅင်း/လုၵ်ႈၸုမ်းပႃႊတီႊသိူဝ်ၽိူၵ်ႇ မီးသႅၼ်ႁႃႈပၢႆ (150,000+) ၊ တေလႆႈဝႃႈဢဵၼ်ႁႅင်းၼမ်မႃး၊ ၼႂ်းၸႄႈဝဵင်းသီႇပေႃႉၵူၺ်း မီးမွၵ်ႈ 3 မိုၼ်ႇ (30,000) ၊ ၵွပ်ႈၼၼ် ၼႂ်းၸိုင်ႈတႆးပွတ်းဢွၵ်ႇၶူင်း ၼႃႈလိၼ် ဢၼ်ၶဝ်ႈၶေႉ လႆႈၼၼ်ႉ တေလူင်းၶေႉလိူၵ်ႈတင်ႈၵူႈၸႄႈဝဵင်း။ ပိူဝ်ႈတႃႇၶဝ်ႈၶေႉၵၢၼ်လိူၵ်ႈတင်ႈၼၼ်ႉ လႆႈႁၢင်ႈႁႅၼ်းဝႆႉၵူၼ်းၼုမ်ႇ ၸိူဝ်းလႆႈႁပ်ႉၸုမ်ႈၶူး ၼိုင်ႈၸႄႈဝဵင်း 5 ၵေႃႉ၊ ၼႂ်း 5 ၵေႃႉၼႆႉ တေလိူၵ်ႈ 1 ၵေႃႉ၊ တႃႇ 4 ၵေႃႉသမ်ႉတေဝႆႉပဵၼ်ၵႅမ်ႁွင်း၊ ပေႃးဝႃႈမီးလွင်ႈၸဵပ်းမႆႈၶႆႈၼၢဝ်ၼႆၵေႃႈ တေဢဝ်ၼႂ်း 4 ၵေႃႉၼၼ်ႉ ၵေႃႉလႂ်ၵေႃႉၼိုင်ႈပုတ်ႈတႅၼ်းႁႂ်ႈလႆႈ- ၼႆယဝ်ႉ။

ဢိင်ၼိူဝ်လၢႆၵေႃႉလၢႆၾၢႆႇလၢတ်ႈဝႃႈ- ၸၢႆးဢၢႆႈပဝ်း တေဢမ်ႇလူင်းၶေႉၵၢၼ်လိူၵ်ႈတင်ႈပီ 2015 ယဝ်ႉၼႆသေ မၼ်းၸဝ်ႈ တွပ်ႇလၢတ်ႈဝႃႈ- သုၼ်ႇတူဝ်မၼ်းၸဝ်ႈ တေၶဝ်ႈၶေႉၵၢၼ်လိူၵ်ႈတင်ႈ ႁိုဝ် ဢမ်ႇၶဝ်ႈၶေႉၼၼ်ႉ ယင်းပႆႇၸၢင်ႈလၢတ်ႈ၊ ၵွပ်ႈဝႃႈ ၵၢၼ်လိူၵ်ႈတင်ႈယင်းတိုၵ်ႉၵိုတ်းယူႇထႅင်ႈ 2 ပီ၊  တေဢိင်ၼိူဝ် ပၢႆးယူႇလီ၊ သင်ဝႃႈပၢႆးယူႇလီၶႅမ်ႉ၊ လႅပ်ႈတေႁဵတ်းၵၢၼ်လႆႈ ယူႇၵေႃႈ တေၶဝ်ႈၶေႉယူႇ- ဝႃႈၼႆ။

ၸၢႆးဢၢႆႈပဝ်း ယင်းလၢတ်ႈဝႃႈ ဢၼ်ပႃႊတီႊတႆး 3 ပႃႊတီႊ (ႁူဝ်သိူဝ်၊ သိူဝ်ၽိူၵ်ႇ၊ တႆးလႅင်) ပႆႇႁူမ်ႈၵၼ်ၼႆႉ ဢမ်ႇမီးပၼ်ႁႃ၊ ပႃႊတီႊတႆးလႅင်ၵေႃႈႁဝ်းဢုပ်ႇၵၼ်လႆႈ၊ ပႃႊတီႊႁူဝ်သိူဝ်ၵေႃႈ ႁဝ်းဢမ်ႇၸႂ်ႈၽူႈၶဵၼ်ၵၼ်၊ ဢၼ်ပႃႊတီႊတႆးမီးၼမ်ၼႆႉမၼ်း လီယူႇ၊ မီးၽွၼ်းလီၵူၺ်း၊ ဢမ်ႇမီးၽွၼ်းၸႃႉ- ဝႃႈၼႆ။

ပႃႊတီႊသိူဝ်ၽိူၵ်ႇ (SNDP) ဢၼ်ၸၢႆးဢၢႆႈပဝ်းဢွၼ်ႁူဝ်ၼႆႉ ၵေႃႇတင်ႈမႃးလူၺ်ႈပိူင်ငဝ်ႈပိုင်းမိူင်း 2008 ၊ မီးၽွင်းတႅၼ်းပေႉ ၵၢၼ်လိူၵ်ႈတင်ႈမိူဝ်ႈၼႂ်းပီ 2010 လႄႈ ပေႉၵၢၼ်လိူၵ်ႈတင်ႈသွမ်ႈပီ 2012 တင်းမူတ်း 58 ၵေႃႉ။