ၾၢႆႇၽွင်းငမ်းဝႃႈ ဢၼ်မၢၵ်ႇတႅၵ်ႇတီႈလုမ်းပႃႇမႆႉမူႇၸႄႈ ၵူၼ်းတၢႆၵေႃႉၼိုင်ႈ ပဵၼ်မၢၵ်ႇတႅၵ်ႇၼႂ်းမိုဝ်း ၵူၼ်းႁၢင်ႈ ၵၢင်မၢၵ်ႇ။ ၾၢႆႇၼိုင်ႈၵေႃႈ RCSS/SSA ဝႃႈ ဢၼ်ပိုတ်း ယိုဝ်းၵၼ်တၢႆၼႂ်းဝဵင်းၼမ်ႉၶမ်း ဢမ်ႇၸႂ်ႈၼမ်ႉမိုဝ်း သိုၵ်းတႆး။

ၵၢင်ၶမ်ႈၶိုၼ်းဝၼ်းတီႈ 07/05/13 မွၵ်ႈယၢမ်း 9 မူင်း၊ မၢၵ်ႇတႅၵ်ႇတီႈလုမ်းၾၢႆႇပႃႇမႆႉ တီႈဝဵင်းမူႇၸႄႈ ၸိုင်ႈတႆးပွတ်းႁွင်ႇ၊ ႁဵတ်းႁႂ်ႈၵူၼ်းတၢႆၵေႃႉၼိုင်ႈ- ၼႆယဝ်ႉ။

ၵူၼ်းၵေႃႉဢၼ်တၢႆၼၼ်ႉ ပဵၼ်ၵူၼ်းႁၢင်ႈၵၢင်မၢၵ်ႇလႄႈမၢၵ်ႇတႅၵ်ႇၶမ်ၼႂ်းမိုဝ်းတူဝ်ၵဝ်ႇသေ တၢႆယွၼ်ႉမၢၵ်ႇမၼ်းၶိုၼ်းၵူၺ်း-ၸဝ်ႈၼႃႈတီႈၾၢႆႇၽွင်းငမ်းၵေႃႉၼိုင်ႈ လၢတ်ႈၼႄၵူၼ်းၼႂ်းပွၵ်ႉယွမ်ႇ တီႈဝဵင်းမူႇၸႄႈၼင်ႇၼႆ။

တီႈႁူင်းႁေႃလူင်ၵၢင်ဝဵင်းၵေႃႈ ၸဝ်ႈၼႃႈတီႈၶဝ်ၵူတ်ႇထတ်းႁၼ်မၢၵ်ႇဢမ်ႇပႆႇတႅၵ်ႇ 2 လုၵ်ႈ။ ဢၼ်မၢၵ်ႇတႅၵ်ႇ တီႈလုမ်းၾၢႆႇ ပႃႇမႆႉ မူႇၸႄႈၼၼ်ႉ ၵွပ်ႈမၢၵ်ႇတႅၵ်ႇၼႂ်းမိုဝ်းၶိုၼ်းၵူၺ်းလႄႈ ၵူၼ်းႁၢင်ႈၵၢင်မၢၵ်ႇတၢႆ ၵေႃႉလဵဝ်၊ ဢမ်ႇမီးၽႂ်တၢႆၸွမ်းလႄႈ တိူဝ်ႉဝၢတ်ႇၸဵပ်းၸွမ်း- ၵူၼ်းၸမ်ၸႂ် ၸဝ်ႈၼႃႈတီႈၾၢႆႇၽွင်းငမ်း ၵေႃႉၼိုင်ႈၵေႃႈ လၢတ်ႈၼႄၼင်ႇၼႆ။

ပူၼ်ႉမႃးမိူဝ်ႈဝၼ်းတီႈ 13/05/13 ၼၼ်ႉၵေႃႈ ယွၼ်ႉမီးၵၢၼ်ပိုတ်းယိုဝ်းၶႃႈႁႅမ်ၵၼ် ၼႂ်းဝဵင်းၼမ်ႉၶမ်း သေ ႁဵတ်းႁႂ်ႈပလိၵ်ႈတၢႆ 2 ၵေႃႉ၊ ၵူၼ်းဝၢၼ်ႈတၢႆၸွမ်းၵေႃႉၼိုင်ႈ၊ မီးၵူၼ်းတိူဝ်ႉဝၢတ်ႇၸဵပ်းတင်းမူတ်း 3 ၵေႃႉ။

ၼွၵ်ႈသေၼၼ်ႉ ဢိင်ၼိူဝ်မီးၵၢၼ်ပိုတ်းယိုဝ်းၵၼ် ၼႂ်းဝဵင်းၼမ်ႉၶမ်းသေ ၼႂ်းၽိုၼ်ၶၢဝ်ႇ တွၼ်ႈတၢင်း ႁၼ်ထိုင်လူင်ပွင်ၸိုင်ႈ တႅမ်ႈၸီႉၼႄးသႄႉသွမ်းဝႃႈ ပဵၼ်ၼမ်ႉမိုဝ်းတပ်ႉသိုၵ်းၸိုင်ႈတႆး (RCSS/SS) ၼႃႈလိၼ်သိုၵ်း 701 ၊ ၵဵဝ်ႇၵပ်းလွင်ႈၼႆႉ တၢင်း RCSS/SS ၵေႃႈ တွပ်ႇပၢၵ်ႈထဵင် ဢမ်ႇၸႂ်ႈ- ၼႆယဝ်ႉ။