ၸဝ်ႈဢုတ်ႉ ၵေးသီး၊ ၵေႃႉႁၢပ်ႇၵိုတ်ႉၵၢၼ်တီႈၵိူဝ်းၵုမ် ၾၢႆႇမၢႆမီႈ ၼႂ်းၶွင်ႊသီႊဢဝ်ၶိုၼ်းၸိုင်ႈတႆး လုသဵင်ႈမုၼ် ၵႂႃႇၽွင်းၶၢဝ်းတၢင်းၵႂႃႇႁူပ်ႉဢုပ်ႇမၢၼ်ႈၶၵ်ႉၵၢၼ်လွင်ႈငမ်း ယဵၼ် တီႈဝဵင်းတူၼ်ႈတီး၊ ယွၼ်ႉတၢင်းပဵၼ်ႁူဝ်ၸႂ် လူမ်ႉလႅဝ်။

ဝၼ်းထိ 21/11/12 (မိူဝ်ႈဝႃး) ၵၢင်ၶမ်ႈယၢမ်း 21:30 မူင်း၊ ၸဝ်ႈဢုတ်ႉ ၵေးသီး (ဢႃႇယု 65 ပီ)၊ ၵေႃႉႁၢပ်ႇၵိုတ်ႉၵၢၼ်ၸိူဝ်ႉ ၸၢတ်ႈဝၢၼ်ႈမိူင်း ၼႂ်းၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) ၊ ႁပ်ႉပုၼ်ႈၽွၼ်း တၼ်းႁဵင်းၾၢႆႇၵိူဝ်းၵုမ်မၢႆမီႈၶွမ်ႊမတီႊ ဢုပ်ႇဢူဝ်းလွင်ႈငမ်းယဵၼ် ၸၼ်ႉၸိုင်ႈ မိူင်းႁူမ်ႈတုမ် RCSS (ၸူဝ်ႈၶၢဝ်း) သေ ဢွၵ်ႇၶၢဝ်းတၢင်းၵႂႃႇႁူပ်ႉထူပ်းဢုပ်ႇလူင်ပွင် ၸိုင်ႈမၢၼ်ႈ ၸၼ်ႉၸိုင်ႈမိူင်းႁူမ်ႈတုမ် ၵဵဝ်ႇၵပ်းလွင်ႈၽဵဝ်ႈယႃႈ မဝ်းၵမ် မိူဝ်ႈဝၼ်းထိ 27-28/10/2012 တီႈဝဵင်းတႃႈၶီႈလဵၵ်း ယဝ်ႉ ပူၼ်ႉၶဝ်ႈၵႂႃႇၼႂ်းမိူင်းတႆး ပိူဝ်ႈႁူပ်ႉထူပ်း ဢုပ်ႇဢူဝ်းၵူၼ်းမိူင်း၊ လႆႈၸပ်းတၢင်းပဵၼ်ၵတ်းသေလိူတ်ႈလူမ်းဢမ်ႇၽဵင်ႇလႄႈ လုသဵင်ႈမုၼ်ၵႂႃႇတီႈ ႁူင်းယႃထုၼ်း တီႈဝဵင်းတူၼ်ႈတီး၊ လူၺ်ႈ ႁူဝ်ၸႂ်လူမ်ႉလႅဝ်- ၼႆယဝ်ႉ။

ဢွၼ်ၼႃႈၼႆႉ လႆႈငိၼ်းဝႃႈ ပၢႆးယူႇလီမၼ်းၸဝ်ႈဢမ်ႇၶႅမ်ႉလႅပ်ႈသေ လႆႈၶဝ်ႈယူတ်းယႃၶၢဝ်းတၢင်း 3 ဝၼ်းၵေႃႈ ဢမ်ႇလႆႈ ယဝ်ႉလႄႈလုသဵင်ႈမုၼ်ၵႂႃႇ။ ၵွပ်ႈမီးၵၢၼ်ႁၢင်ႈႁႅၼ်းပၢင်ပွႆးလိူၼ်သိပ်းသွင် (ပွႆးႁူင်းၾႆးဝိၼ်) တီႈတူၼ်ႈတီးလႄႈ တေပူၼ်ႉ ၶၢပ်ႈတူဝ်-ႁွပ်ႇႁူဝ်မၼ်းၸဝ်ႈၶဝ်ႈႁဵဝ်ႈ ဝၼ်းထိ 22/11/12 မိူဝ်ႈၼႆႉ - ၼႆယဝ်ႉ။

ၸဝ်ႈဢုတ်ႉၼႆႉ ၵိူတ်ႇမိူဝ်ႈ 19/07/1947 ၼႂ်းႁေႃဝဵင်းၵေးသီး၊ ၸိုဝ်ႈတႄႉၸဝ်ႈၼေႃႇၶမ်းဢူ၊ ပေႃႈၸိုဝ်ႈၸဝ်ႈၸိင်ႇ၊ မႄႈၸိုဝ်ႈ ၸဝ်ႈၵျီႇ (ပဵၼ်လၢၼ်ၸဝ်ႈထုၼ်းယိၼ်ႇ ၼမ်ႉၶူၵ်ႉ-ၼွင်ဝွၼ် - ၵေႃႉဢၼ်လႆႈရၢင်းဝလ်း ၽူႈႁတ်းႁၢၼ်တီႈဢိင်းၵလဵတ်ႈ)။ ၸဝ်ႈၸိင်ႇ (ပေႃႈမၼ်းၸဝ်ႈ) ၼႆႉ တၼ်းလႆႈပဵၼ်ၸဝ်ႈၵႅမ်မိူင်းၵေးသီး။ မီးပီႈၼွင်ႉဢွၵ်ႇ ႁူမ်ႈ 11 ၵေႃႉ၊ ၸၢႆး 7 ယိင်း 4 ၊ ပဵၼ်လုၵ်ႈ ၵေႃႉထိ 8 ၊ တႄႇၼႃႈႁိူၼ်းၵိုၵ်းၼၢင်းမျႃႉၸိင်ႇ၊ မီးလုၵ်ႈလၢင်းႁူမ်ႈၵၼ် 2 ၵေႃႉ၊ ၸၢႆး 1 ယိင်း 1 ။

မိူဝ်ႈလဵၵ်ႉၶဝ်ႈႁူင်းႁဵၼ်းတီႈဝဵင်းတူၼ်ႈတီး (ယၢမ်ႈယူႇႁွင်ႈႁဵၼ်းၸၼ်ႉလိၵ်ႈႁူမ်ႈၵၼ်တင်းၵႅမ်ၸွမ် ၸိုင်ႈၵဝ်ႇ တိၼ်ႇဢွင်ႇ မိၼ်ႉဢူး)။ ႁဵၼ်းယဝ်ႉၸၼ်ႉၸွမ် ၾၢႆႇမၢႆမီႈ (BA law) သေ ႁၢပ်ႇၵိုတ်ႉၵၢၼ် ပဵၼ်ၽူႈတၢင်ဝႃႈၵႂၢမ်း (Lawyer) ၼႂ်းမိူင်း၊ ၶဝ်ႈမႃးၼႂ်းလၢႆးလုၵ်ႉၽိုၼ်ႉ 1995 ဢွၼ်ၼႃႈတပ်ႉသိုၵ်းမိူင်း တႆး (MTA) တေဝၢင်းၶိူင်ႈ ပၼ်ၸုမ်းသိုၵ်းမၢၼ်ႈ။

ၼႂ်းၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ  ဢွၼ်တၢင်းမၼ်းၸဝ်ႈယိပ်း ၵၢၼ်ၾၢႆႇတိတ်းတေႃႇ ၼွၵ်ႈမိူင်း၊ မွၵ်ႈပီ 1997-98 လႆႈဢွၵ်ႇၶၢဝ်းတၢင်းၵႂႃႇမိူင်းယူႊရူပ်ႊပွၵ်ႈၼိုင်ႈ၊ ဝၢႆးၼႆႉၵေႃႈ သိုပ်ႇႁပ်ႉတၼ်းႁဵင်းၾၢႆႇဢူၺ်း လီယၢင်းလႅင်၊ လိုၼ်းသုတ်း ဝၢႆးၶွင်ႊသီႊဢဝ်ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆးႁဵတ်းလွင်ႈငမ်းယဵၼ်တင်းလူင်ပွင်ၸိုင်ႈ တဵင်းၸဵင်ႇ သိုပ်ႇႁပ်ႉပႃးၽူႈ ၵိူဝ်းၵုမ်ၾၢႆႇမၢႆမီႈ။