သိုၵ်းဝႃႉပွတ်းတႂ်ႈ ၼႂ်းၼႃႈလိၼ်သိုၵ်း 171 ၊ ဝၢၼ်ႈႁုင်ႈ-မိူင်းယွၼ်း၊ ႁူၺ်ႈဢေႃႈ ထႅမ်ႁႅင်းသိုၵ်းတၢင်းမိူင်း တုမ်း မိူင်းၵၢၼ်း၊ ဢိူမ်ႈၸမ်ပၢင်သဝ်း တပ်ႉတႆး RCSS/SSA လွႆၵေႃႇဝၼ်း (လႅၼ်လိၼ်တႆး-ထႆး) လူၺ်ႈဢမ်ႇႁူႉလွင်ႈ တၢင်း၊ ၾၢႆႇဝႃႉမီးၵၢၼ်ႁၢင်ႈႁႅၼ်းသိုၵ်း ပႃးၶိူင်ႈၵွင်ႈလူင်။

ၽႅၼ်ႇတီႈတင်ႈလွႆၵေႃႇဝၼ်း (ၼႂ်းဝူင်း)

မိူဝ်ႈဝၼ်းထိ 16/06/12 ယၢမ်းပွတ်းၼႂ် လူတ်ႉၵႃးသိုၵ်းဝႃႉ 50 လမ်း၊ လုၵ်ႉတၢင်းဝၢၼ်ႈႁုင်ႈ-မိူင်းယွၼ်း ဢွၵ်ႇမႃးတၢင်းမိူင်း တုမ်း-မိူင်းၵၢၼ်း ဢၼ်တေႃႇၼႃႈ တပ်ႉပၢင်သဝ်းလွႆၵေႃႇဝၼ်း ၶွင်တပ်ႉသိုၵ်းၸိုင်ႈတႆး RCSS/SSA ၼႃႈလိၼ်သိုၵ်းၵဵင်းတုင်။ ယၢမ်းၵၢင်ၶမ်ႈ ၵႃးသိုၵ်းဝႃႉ 10 လမ်း လုၵ်ႉတၢင်းႁူၺ်ႈဢေႃႈ မႃးထႅမ်ႁႅင်းသိုၵ်းထႅင်ႈ။ လႆႈႁူႉဝႃႈ ဢၼ်လုၵ်ႉတီႈမိူင်းယွၼ်း ဢွၵ်ႇမႃး ပဵၼ်တပ်ႉၸုမ်း 518 ၊ လုၵ်ႉ တၢင်းႁူၺ်ႈဢေႃႈမႃး ပဵၼ်တပ်ႉၸုမ်း 775 ပႃႈတႂ်ႈယၢင်ၵေႃႇၸူင်း ယိပ်းၵုမ်း။

သိုၵ်းဝႃႉတင်းသွင်တပ်ႉၸုမ်းၼႆႉ လႆႈႁူႉဝႃႈ မီးဢဵၼ်ႁႅင်းသိုၵ်းတီႈဢေႇသုတ်းဢမ်ႇယွမ်းမွၵ်ႈ 500 ။ မိူဝ်ႈလဵဝ် ဢိူမ်ႈၸမ်ဝႆႉ တီႈလွႆၵေႃႇဝၼ်း ငဝ်ႈငုၼ်းတပ်ႉသိုၵ်းၸိုင်ႈတႆး RCSS/SSA ၼႃႈလိၼ်သိုၵ်း ၵဵင်းတုင် ပႃႈတႂ်ႈၸဝ်ႈသိုၵ်းလူင်ၵွၼ်းၸိုၼ်ႈ ယိပ်းၵုမ်း၊ တေႃႇထိုင်မိူဝ်ႈလဵဝ် သွင်ၾၢႆႇတေႃႇၼႃႈသိုၵ်း ၵၼ်ဝႆႉၵူၺ်း၊ ဢမ်ႇပဵၼ်ပၢင်တိုၵ်းၵၼ်ၼင်ႇၵဝ်ႇ။

လႅင်ႇၶၢဝ်ႇလႅၼ်လိၼ်လၢတ်ႈဝႃႈ- လွင်ႈဢၼ်သိုၵ်းဝႃႉၶွၼ်ႈႁႅင်းသိုၵ်းသေ မႃးဢိူမ်ႈၸမ်ဝႆႉလွႆၵေႃႇဝၼ်း ၼႆႉ ဢမ်ႇလႆႈလၢတ်ႈ လွင်ႈတၢင်းသင်တီႈ SSA ၊ ပေႃးမႃးထိုင်ၵေႃႈမႃးယႃႉပႅတ်ႈႁူဝ်ႉႁႆႈႁူဝ်ႉသူၼ် လႄႈၶူဝ်းႁႆႈ ၶူဝ်းသူၼ်ၶွင်ၵူၼ်းမိူင်း။ ၼွၵ်ႈသေ ၼၼ်ႉ မႃးပၵ်းတပ်ႉၶုတ်းလုၵ်းထႅၼ်ႉ ႁၢင်ႈႁႅၼ်းၵၢၼ် သိုၵ်း၊ တင်ႈၶိူင်ႈ ၵွင်ႈၵၢင်ႇ ၸိူဝ်းၼႆႉပႃးထႅင်ႈ။

ၽူႈၵွၼ်းၼႃႈလိၼ်သိုၵ်းၵဵင်းတုင် ၸဝ်ႈသိုၵ်းလူင်ၵွၼ်းၸိုၼ်ႈလၢတ်ႈဝႃႈ- လွင်ႈသိုၵ်းဝႃႉမႃးၼႆႉ ဢမ်ႇႁူႉ လွင်ႈတၢင်းမၼ်း၊ ဢမ်ႇၸႅင်ႈလၢတ်ႈသင်။ ၾၢႆႇႁဝ်းလႆႈႁၼ်ၸိူင်ႉၼႆ ၸႂ်ဢမ်ႇပေႃးလီ၊ ၵူဝ်တုမ်ႉတိူဝ်ႉၵၼ်။ မိူဝ်ႈလဵဝ် ၶတ်းၸႂ်တိတ်းတေႃႇၵႂႃႇ တီႈၵူၼ်းလူင်ဝႃႉငဝ်ႈငုၼ်းပၢင်သၢင်း ၵဵဝ်ႇလူၺ်ႈလွင်ႈၼႆႉယူႇ- ဝႃႈၼႆ။

ၾၢႆႇႁူမ်ႇလူမ်ႈလႅၼ်လိၼ် တပ်ႉသိုၵ်းထႆးလၢတ်ႈဝႃႈ- ဢၼ်သိုၵ်းဝႃႉၶဝ်မႃးၼႆႉ ပႃးၶိူင်ႈၵွင်ႈလူင်လၢႆသႅၼ်း၊ ပႃးၸဵမ်ၶိူင်ႈၵွင်ႈ လူင် ဢၼ်ၵိုၵ်းႁွမ်းၵၼ် 8 ဝူၵ်ႇ- ဝႃႈၼႆ။

ၾၢႆႇၼိုင်ႈတၢင်းၼိုင်ႈ တၢင်းတပ်ႉသိုၵ်းထႆးၵေႃႈလႆႈထႅမ်ႁႅင်းသိုၵ်း ပိူဝ်ႈတႃႇဢဝ်ႁူမ်ႇလူမ်ႈၸွမ်းလႅၼ်လိၼ် သေ ပၵ်းတႃတူၺ်း ၸွမ်းလွင်ႈၼႆႉယူႇ။ ၼွၵ်ႈသေၼၼ်ႉ လႆႈတၵ်ႉတိူၼ်ၵႂႃႇတီႈသိုၵ်းဝႃႉဝႃႈ- ယႃႇပေႁႂ်ႈ မီးလွင်ႈ တိုၵ်းတေႃးၵၼ်ၸွမ်းလႅၼ်လိၼ်၊ ၵူဝ်တုမ်ႉတိူဝ်ႉၵူၼ်းမိူင်း၊ ၵူဝ်ၵူၼ်းမိူင်းပၢႆႈၽေးလင်ႇလႆ ၶဝ်ႈမိူင်းထႆး- ဝႃႈၼႆ။